Viron Kona
ETYDE
Deti
Më rrëmbeu në prehër deti i kaltër,
më ledhatoi ëmbël me valëzat e tij,
s`doja të ndahesha asnjë çast prej tij,
nëse do të iki, të gjithin “do ta pij!”
Pranverë
Nga bulevardi vinin valë të qeshurash,
ecnin grupe – grupe vajza dhe djem,
ngrinin zërat dhe qeshnin pas çdo fjale,
pranvera çelte lule e lidhte kokrra në pemë.
Atje…
I ndjej brenda vetes këngët e pyllit,
erën që përkëdhel lule, shkurre e drurë,
cicërimat e zogjve që diç i thonë njëri-tjetrit,
atje mes tyre dua të ngre një fole edhe unë.
Mirësi
Mirësia është fjalë urtë dhe e pa bujë,
ajo shprehet thjesht dhe me ëmbëlsi:
-Ju lutem, uluni në vendin tim zonjë!
-Lutem, kaloni përpara meje, zotëri!
Xixëllonjë
Respektoje një xixëllonjë,
se jetën nuk e çon dëm,
kur natën fluturon,
një dritëz edhe ajo e bën.
Kur dola në pension
Kolegët më uruan, ta gëzoj moshën e pensionit,
nxënësit mblodhën për mua trëndafila të freskët,
roja i shkollës si kalimthi më kujtojë fjalën e urtë:
“Meloditë e bukura, luhen në volinë të vjetër!”