Kreu i shtetit, Ilir Meta e quan një ngjarje tepër të rëndë dhe të dënueshme kërcënimin e prokurorit të Përmetit, Asllani Bajrami.
Në një reagim në rrjetet sociale, Presidenti Meta kërkon hetim të shpejtë teksa thekson se “revanshi i krimit kërkon masa të menjëhershme efektive, reaguese dhe parandaluese, nga të gjitha institucionet e ngarkuara me ligj për mbrojtjen e rendit dhe të sigurisë publike”.
Kujtojmë që prokurori i Përmetit bëri denoncim në Polici pasi gjeti në dritaren e zyrës së tij fishekë.
REAGIMI I PLOTE
Kërcënimi për shkak dhe në krye të detyrës i Prokurorit të Përmetit, z.Asllani Bajrami, është një ngjarje tepër e rëndë dhe e dënueshme.
Nevojitet një hetim i shpejtë për vendosjen para ligjit të kujdo, që guxon të kërcënojë përfaqësuesit e shtetit, për t’i penguar ata të ushtrojnë detyrën të pandikuar.
Revanshi i krimit kërkon masa të menjëhershme efektive, reaguese dhe parandaluese, nga të gjitha institucionet e ngarkuara me ligj për mbrojtjen e rendit dhe të sigurisë publike. 🇦🇱
