Piva shpesh ca lot trishtimi,
për të fshehur dhimbjen time,
piva kupa dashurie,
piva kupa me zhgënjime.
Piva borë nga Mali i Gjerë,
sa herë shkrinte përfund prillit.
Piva në kodrat e Lunxhit,
vesë nga lulet e tërfilit.
Piva hënën e argjendtë,
fshehur nën lulet e ftoit.
Piva yjet sa herë zbrisnin,
pranë liqenit të Viroit.
Piva ujin nëpër Vjosë,
që s’shteroi asnjëherë.
Piva kupa me gëzime,
piva dhe kupa me vrer.
Piva dhjetëra thashetheme,
tek rrugica e Kako Pinos,
në një gotë e mblodha erën,
nëpër luginën e Drinos.
Piva vjeshtën e bekuar;
Anembanë në Shqipëri.
Piva dhjetëra thashetheme,
dhe i volla përsëri.
Piva shpesh ca lot trishtimi,
për të fshehur dhimbjen time!
Piva kupa dashurie,
piva kupa me zhgënjime.
