Shoqata e ushtarakëve: Ja si po diskriminohemi nga ISSH-ja, ministria e Financave dhe e Mbrojtjes. Jemi i vetmi vend ku “Statusi i Ushtarakut” nuk respektohet për pensionet, trajtimin shëndetësor, ilaçet me zbritje, strehimin dhe pushimet
Ja si diskriminohen ish-ushtarakët shqiptarë. Jemi i vetmi vend ku “Statusi i Ushtarakut” përdhoset dhe vendimi i Gjykatës Kushtetuese për pensionet nuk zbatohet. Mungesa e trajtimit shëndetësor, dhënia e barnave me 80% zbritje, trajtimi për të pastrehët, i qëndrimit në kampet e pushimit etj.
Qeveria e “Rilindjes” kundër ushtarakëve veteranë
Institucionet e ndërtuara nga pushtetet e përkohshëm politikë në Shqipëri nuk e respektojnë sa dhe si duhet, figurën atdhetare të ushtarakut veteran; madje nuk janë në gjedje t’a konceptojnë dhe vlerësojnë atë, si gjenerali famëmadh Xhorxh S. Patton, i cili ka thënë: “Pavarësisht nga njohja apo respekti që i japin burokratët politikanë apo zyrtarë, ushtaraku është ushtarak për tërë jetën. Detyra dhe privilegji i tyre kurrë nuk mbaron, as kur del në pension, dhe as kur vdes, sepse, pasi ka veshur atë uniformë nderi e respekti, ushtaraku kurrë nuk e heq atë, me të ai edhe varroset.” Miratimi i ligjit organik nr.10142/2009, e zgjidhi në favor të interesit publik trajtimin e ushtarakëve që merrnin 41,000 lekë e lart pension të parakohshëm për vjetërsi shërbimi në muaj, sepse në nenin 14, pika 2, gërma “a” të ligjit të lartpërmendur ligjbërësi ka sanksionuar se masa e pensionit të parakohshëm: “..nuk mund të jetë më e madhe se dyfishi i pensionit bazë,.”, ndërsa në pikën 4 të po këtij neni, sanksionoi se: “në rastet kur punësohet në vende të tjera pune, masa e pensionit të parakohshëm për vjetërsi shërbimi bëhet sa një pension bazë.” Por pushtetet e përkohshëm politikë në Shqipëri, gjatë periudhës 3 korrik 1991 deri më 29 Shkurt 2020, asnjëherë nuk e kanë rreshtur luftën e tyre antiligjore kundër statusit organik të ushtarakut, duke shkelur haptazi nenin 1 (ndalimi i përgjithshëm i diskriminimit), të Protokollit nr.12 të Konventës Europiane për të Drejtat e Njeriut, ku përcaktohet: “1. Gëzimi i çdo të drejte të parashikuar me ligj duhet të sigurohet pa asnjë diskriminim të bazuar në shkaqe të tilla, si..{..}, mendimet politike ose çdo mendim tjetër, origjina kombëtare ose shoqërore,..{..}..ose çdo situatë tjetër. 2. Askush nuk duhet të diskriminohet nga një autoritet publik për ndonjë nga arsyet e parashikuara në paragrafin 1.”
- Gjykatat e nivelit të zakonshëm të gjykimit shkelin nenin 48 të ligjit nr.9210/2004
Asnjë gjykatë, e tre niveleve të sistemit të zakonshëm të gjykimit, nuk ka reaguar kundër përmbajtjes antikushtetuese të pikës 1 të nenit 29 të ligjit nr.10142, datë 15.5.2009; ku mëtohet përmbajtja vijuese absolutisht e pavlefshme: “1. Dispozitat e ligjeve nr.8087, dt.13.3.1996 “Për sigurimin shoqëror suple-mentar të ushtarakëve të Forcave të Armatosura të Republikës së Shqipërisë ”, të ndryshuar..{..}.. zbatohen deri në datën e hyrjes në fuqi të këtij ligji.”
- Asnjë Gjykatë nuk ka mbajtur parasysh nenin 48 të ligjit nr.9210, datë 23.3.2004, ku i vihet detyrë Këshillit të Ministrave, që brenda 24 muajve nga hyrja në fuqi e këtij ligji, “..të paraqesë ndryshimet përkatëse në ligjin nr.8087, datë 13.3.1996, i ndryshuar, në zbatim të neneve 35 dhe 36 të këtij ligji.”
- Të gjitha nivelet e gjykatave të sistemit të zakonshëm të gjykimit kanë “harruar” faktin se ligji nr.9418, datë 20.5.2005, hyri “..në fuqi në datën 1 janar 2006”, dhe se, referuar nenit 32 të këtij ligji, Këshilli i Ministrave “brenda 3 muajve nga data e hyrjes në fuqi, të nxjerrë aktet nënligjore të neneve 3, 4 dhe 14 të këtij ligji .”, kurse, në bazë të nenit 33, gjykatat përjashtohen “nga zbatimi i ligjit nr.8087, dt.13.3.1996, “Për sigurimin shoqëror suplementar të ushtarakëve të Forcave të Armatosura në Republikën e Shqipërisë,”, sepse: “Ligji nr.8087, dt.13.3.1996 ..{.}, i ndryshuar, dhe aktet e dala në zbatim të tij, pas hyrjes në fuqi të këtij ligji, nuk do të zbatohen për ushtarakët e Forcave të Armatosura të Republikës së Shqipërisë, që përfitojnë sipas këtij ligji.”
Ligji nr.9481, dt.16.02.2006, nuk kish tagër të ndryshonte statusin e ushtarakut, ose ligjin organic nr.9210/2004; nuk kish tagër t’i kundërvihej ‘me evazivitete absurde’, nenit 18 -të Kushtetutës, ku përcaktohet: “1. Të gjithë janë të barabartë përpara ligjit.”, gjithashtu nuk kish akses procedurial t’i kundërvihej pikës nr.7 , të nenit 14 të ligjit nr.9418, dt.20.05.2005, ku është sanksionuar: “7. Për ushtarakët, të cilëve u ka lindur e drejta e përfitimit të pensionit të parakohshëm para datës së hyrjes në fuqi të ligjit nr.9210, datë 23.3.2004, ku niveli i masës së përfitimit të llogaritur vendoset në kufijtë e parashikuar në këtë nen.
- Keqtrajtimi shëndetësor dhe social i ushtarakëve veteranë
Ndonëse grupi social i ushtarakëve barabitet me atdhedashurinë, ndershmërinë, sakrificën sublime, respektin e madh ndaj ligjit dhe besnikërinë deri në vdekje ndaj sovranit Popull dhe Shtetit të munguar Juridik; Ministria e Mbrojtjes, pasi e nxjerr ushtarakun në lirim, rezervë dhe pension pleqërie, për 28 vite rresht, ngurron t’a pajisë atë me uniformë, kundrejt pagesës, siç parashikon ligji 9210/2004, ose statusi ekzistues i ushtarakut.
Duke filluar nga shtatori i vitit 2005, deri në shtator të vitit 2013, ushtarakët në lirim, rezervë e pension pleqërie, nuk marrin për vete dhe familjet e tyre shërbim shëndetësor falas në Spitalin Ushtarak; as pushime verore në shtëpitë klimatike të Ministrisë së Mbrojtjes. Nuk zbatohet e drejta e ushtarakëve në lirim, rezervë dhe pension pleqërie për rimbursimin 80 për qind të ilaçeve; nuk janë pajisuar ata me uniformë parade, kundrejt pagesës, për t’a përdorur në raste përvjetorësh; mungon paisja me kartën e Indentitetit Ushtarak; mungon përcjellja me ceremoni e ushtarakëve, kur ndahen nga jeta; mungon rimbursimi i qerasë së strehimit të familjeve të ushtarakëve të nxjerrë në lirim dhe reserve, të cilët paguajnë për apartamentet e banimit, sepse nuk zotërojnë prona të patundshme.
Aq e madhe konstatohet moskokëçarja për zbatimin e statusit të ushtarakut, sa Ministria e Mbrojtjes, nuk është në gjendje të zbatojë as nenin 33 pika 2, (e drejta e pushimeve në shtëpitë e pushimit); kurse QPR-ja e këtij digasteri, sillet sikur të jetë në vartësi të drejtorive rajonale të ISSH-së, si dhe në kundërshtim me parimin e sigurisë juridike, lidhur me lëshimin e vërtetimeve për vjetërsinë e shërbimit ushtarak dhe llogaritjen e pagave referuese.
Nuk është zbatuar neni 36 i ligjit nr.9210/2004, (e drejta për pension suplementar), për ushtarakët e nxjerrë në lirim nga data 3.7.1991, deri më 31.12.1995; të cilëve, në bazë të Vendimit të Këshi –llit të Ministrave nr.225/1992, u njihet si vjetërsi shërbimi peridha që kanë ndjekur studimet në shkollat ushtarake, si dhe kryer studimet e larta civile si kontigjente të Ministrisë së Mbrojtjes.
Asnjëherë s’është zbatuar neni 38 pika 2, e drejta për sigurim banese; ku taksativisht mëtohet : “2. Ushtarakët aktive të Forcave të Armatosura, (oficerë, nënoficerë, ushtarë me pagesë/
profesionistë), të cilët kur dalin në rezervë, lirim, ose në pension pleqërie, dhe janë të pastrehë,
ose me sipërfaqe të vogël banimi, trajtohen për strehim si ushtaraku aktiv.”
Nuk është realizuar zbatimi i së drejtës së parashikuar në nenin 40, (trajtimi shëndetësor) pikat 3 e 4; ku mëtohet: “3. Ushtaraku në rezervë, në lirim ose në pension, (oficer, nënoficer) dhe pjestarët e familjes, që janë në ngarkim të tij,[..].., përfitojnë ndihmë mjekësore falas në institucionet mjekësore shtetërore ushtarake dhe civile brenda vendit. 4. .. gëzojnë të drejtën për t’u kuruar ose për t’u diagnostifikuar në institucionet mjekësore shtetërore jashtë vendit, duke përfituar ndihmë mjekësore falas.”.
Nuk zbatohet asnjëherë e drejta e parashikuar në nenin 41, (kompesimi i barnave), pikat 1 dhe 4; ku mëtohet se oficerëve: “1. ..të cilët kanë dalë në rezerve, në lirim, ose në pension pleqërie , u rimbursohen barnat në masën 80 për qind në rast se në akte të tjera nuk parashikohet një përqindje më e lartë.
- Forma dhe kriteret e rimbursimit përcaktohen me vendim të Këshillit të Ministrave
Konstatohet fakti se nuk ekziston asnjë VKM-ë, për kriteret e rimbursimit të barnave për ushtarakët në rezervë, lirim dhe pension pleqërie. Nuk zbatohet neni 42 gërma “d” e statusit të ushtarakut, ose e drejta për të përdorur uniformën dhe gradat në ceremoni përvjetorësh ushtarakë dhe festa kombëtare; si dhe e drejta e parashikuar në nenin 45 pika 2, ku mëtohet e drejta e përcjelljes me ceremonial ushtarak, kur vdes ushtaraku në rezervë, lirim dhe pension pleqërie. ISSH-ja vijon t’i “grabisë financiarisht..” ushtarakët e liruar, në rezervë dhe pension pleqërie. Gjatë periudhës nga data 1.06.2005, deri më 30.06.2009, ISSH-ja dhe drejtoritë e saj rajonale, nuk e kanë trajtuar grupin e ish ushtarakëve, të nxjerrë në lirim dhe rezervë nga 1.3.1991 deri më 30.04.2004, në përputhje me ligjin nr.9418, dt.20.05.2005, “Për sigurimin shoqëror suplementar të ushtarakëve të FA të RSH”, i ndryshuar me ligjin nr.9481, datë 16.2.2006; (shih: nenet 1, 2, 4,), ku përcaktohet: “2. Përfitimet suplementare që jepen sipas neneve 12, 13, 19 e 23 të këtij ligji, rillogariten sa herë që ndryshon paga referuese, me të cilën është bërë llogaritja e këtyre përfitimeve.”
S’është zbatuar Vendimi nr. 34, dt.20.12.2005 I Gjykatës Kushtetuese, dhe shkelur Vendimi nr.1 datë 31.01.2003 i Gjykatës Kushtetuese, ku theksohet se: “Përsa i takon aspektit kushtetues, ligji me fuqi prapavepruese është i kundërshtueshëm, në qoftë se cënon të drejtat e fituara me ligjet ekzistuese”.
3 – ISSH-ja nuk respekton vendimin nr.10, datë 6.03.2014, të Gjykatës Kushtetuese
ISSH-ja ka “shkelur” në dëm të ish ushtarakëve, nenet: 1(dinjiteti njerëzor), 6 (e drejta për liri dhe siguri), 20 (barazia para ligjit), 21 (mosdiskriminimi), 25 (të drejtat e të moshuarve), 34/3 (sigurimet shoqërore dhe ndihma sociale), 41/2 gërmat ‘a, c’, (“ të drejtën e çdo personi që të dëgjohet përpara se kundër tij të merren masa që do ta cënonin atë); (c) detyrimin e administratës që të argumentojë vendimet e marra te “Karta e të drejtave themelore të Bashkimit Europian”, dhe nuk ka mbajtur parasysh konceptin juridik të Gjykatës së Drejtësisë të Bashkimit Europian: “..pritshmëritë e ligjshme duhet të mbrohen, dispozitat prapavepruese, që vendosin detyrime apo prapësojnë të drejta të fituara në mënyrë të ligjshme ndalohen,..”;
Nuk ka respektuar Protokollit nr.12 të KEDNJ-së; ku, në nenin 1, përcaktohet ndalimi i përgjithshëm i diskriminimit.
ISSH-ja, asnjëherë nuk ka mbajtur parasysh vendimin nr.10, datë 6.03.2014, të Gjykatës Kushtetuese dhe as faktin se VKM-ja nr.5/2010, konstatohet nul, absolutisht e pavlefshme dhe pa asnjë fuqi juridike; sepse bie ndesh me nenin 81/2 gërmat ‘a, d’, të Kushtetutës; kurse ligji nr.10142, datë 15.05.2009, është ligj organik, i miratuar me shumicë të cilësuar, (3/5, ose 84 vota), nga Kuvendi Popullor; kurse akti normativ me forcën e ligjit nr.5/2010, është miratuar me shumicë të thjeshtë, (1/2 ose 71 vota), si ligj i zakonshëm nr.10367/ 2011; ndaj nuk mund të sjellë ndryshimin e nenit 14 të ligjit organik nr.10142, datë 15.05.2009.
Drejtoritë rajonale të ISSH-së kanë ushtruar gjenocid antiligjor kundër ish ushtarakëve; sepse nuk kanë respektuar parimin e sigurisë juridike; kanë shkelur vendimin nr. 33, datë 24.06.2010, etj., të Gjykatës Kushtetuese; kanë mohuar të drejtat e fituara me ligjet e mëparëshme dhe 16 Vendimet që ka nxjerrë Këshilli i Ministrave, për rritjen dhe indeksimin e pensioneve nga data 1.01.1999, deri më 1.11.2011, kurse nga data 1.06.2005, deri më 30.06.2009, nuk i kanë trajtuar ushtarakët në përputhje me ligjin nr.9418, datë 20.05.2005, “Për sigurimin shoqëror suplementar të ushtarakëve të FA të RSH”.
- QPR-ja e Ministrisë së Mbrojtjes manipulon të dhënat për pagën referuese dhe vjetërsinë e shërbimit ushtarak
Ministria e Mbrojtjes nuk e ka kryer drejt detyrimin ligjor të përcaktuar në nenin 29 të ligjit nr.7496/1991, në kuptim të përcaktimit të vjetërsisë së shërbimit për ish ushtarakët, që kanë përfituar të drejtën për pension të pjesshëm për vjetërsi shërbimi, siç përcakton Kreu V, “Rillogaritja e Përfitimeve”, gërma “B”, pika nr.5 e VKM-së, nr.793, datë 24.9.2010. Ministria e Mbrojtjes nuk ka mbajtur parasysh plotësimin korrekt të dokumentave të ish ushtarakëve “Për Pagën Referuese”, conform përcaktimeve të kreut II, ‘gërma “B”, të VKM-së nr.579, datë 8.12.1999, “Për kushtet dhe masën e përfitimeve nga sigurimi shoqëror suplementar i ushtarakëve dhe antarëve të familjeve të tyre në rastet e nxjerrjes së tyre në rezervë, lirim apo pension”, si dhe ka lejuar ISSH-në dhe Drejtoritë e saj rajonale, të përcaktojnë pagat referuese të ushtarakëve të nxjerrë në pension të parakohshëm për vjetërsi shërbimi, si dhe pagat e tyre mesatare referuese, në kundërshtim të hapur me përmbajtjen e VKM-së nr.393, datë 3.9.1992, “Për pagat e punonjësve të institucioneve buxhetore”; ku mëtohet se pagat mujore përbëhen nga: “..madhësia e pagës bazë dhe shtesës mbi pagë”. Shtesat mbi pagë janë: a) shtesa për vjetërsi pune; b) shtesa për funksion; c) shtesa për gradë; d) shtesa për vështirësi në vendin e punës.
Ministria e Mbrojtjes nuk ka nxjerrë akte në zbatim të VKM-së nr.1619, datë 2.7.2008, ku përcaktohet se: “shtesa për vjetërsi në punë jepet në masën 2 për qind pas çdo viti pune, deri në 25 vjet vjetërsi pune; pra arrin deri në 50% të pagës bazë.” Nuk ka nxjerrë akte në zbatim të VKM-së nr.561, datë 12.8.2005, “Për caktimin e pagave referuese për llogaritjen e pensioneve”, për periudhën e sigurimit para datës 1.1.1994. Antiprocedurialisht ka lejuar ISSH-në dhe Drejtoritë e saj Rajonale të bëjnë spekullime antiligjore, duke shkelur të drejtat e fituara nga ushtarakët sipas statusit të tyre. Si dhe antiligjërisht ka lejuar sigurimet shoqërore, të diskriminojnë ushtarakët, duke ua llogaritur pagën referuese bazë, para vitit 1994, vetëm 4,384 lekë, ose thjesht si ‘specialistë të lartë’; d.m.th, pa shtesat për funksion, pa shtesat për gradë, pa shtesat për vjetërsi shërbimi dhe vështirësitë e vendit të punës.
- Kryeministri duhet të japë llogari për moszbatimin e statusit të ushtarakut
Konstatohet se zbatimi nen për nen i statusit ligjor organik të ushtarakut në Shqipëri, me dashje dhe paramendim antinligjor, është shtyrë drejt “kalendave inekzistuese greke”; pra situata ligjore ka degjeneruar krejt, sepse për tridhjetë vite rresht, nga data 3 korrik 1991, deri më 1 mars 2020, asnjë kryeministër nuk jep llogari, nuk kërkon zbatimin dhe nuk mban përgjegjësi për moszbatimin e statusit të ushtarakut. Ish kryeministri Sali Berisha, nga shtatori i vitit 2005, deri shtator 2013, nuk desh t’a zbatonte statusin e ushtarakut, ndaj nxorri VKM-në antikushtetuese nr.5/2010, për të ushtruar gjenocid financiar kundër mijra ushtarakëve patriotë. Kryeministri Edi Rama, për 7 vite rresht, nga shtatori i vitit 2013, deri në 31 Maj 2020, nuk ka lejuar zbatimin e statusit të ushtarakut. Ai, kur ishte kryetar i opozitës, premtoi shfuqizimin e VKM-së antikushtetuese nr.5/2010; por kur erdhi në pushtet politik, vijoi rrugën antiligjore berishiane, madje shtoi keqtrajtimin, duke thelluar gjenocidin financiar kundër ushtarakëve pas shpalljes së Vendimit, gjoja Unifikues dhe antikushtetues, nr.3/2016 të Kolegjeve të bashkuara të Gjykatës së Lartë, që kryesohej nga gjyqtari “shërbëtor politik”, Xhezair Zaganjori.
Në historinë e re të Republikës së Shqipërisë deri më sot, asnjë kryeministër nuk është hetuar, në pikëpamje gjyqësore, për shkelje të Kushtetutës, të ligjeve materiale dhe procedurialë organikë, për qëndrime superligjore, mospërfillje, përbuzje, moszbatim, ose keqzbatim shumëvjeçar të kërkesave ligjore taksative. Por dihet fakti se ish kryeministri i Republikës së Italisë, Silvio Berluskoni, në një nga shumë procedurat e ngritura kundër, u dënua nga gjykata për shkelje të ligjit, duke e detyruar më pas, të lerë edhe postin e kryeministrit. Ky precedent mëton konkluzionin se kur një qytetar, i cili gjendet në funksionin e përkohshëm të Kryeministrit politik të vendit, paditet në Gjykatë, me pretendimin se ka shkelur ligjin; ndonëse ishte person VIP, i pamposhtur politikisht në qendra votimi, mund të humbasë juridikisht në gjykatë; nëse përpara kontrollit të pushtetit të pavarur shtetëror gjyqësor provohet fakti se ka shkelur ligjin. Këtë pistë ligjore do ndjekim deri në fund.
Shoqata “Lidhja Kombëtare e Ushtarakëve Atdhetarë”, nuk është politike, as kundërshtare e pushtetit politik ekzistues..; por, duke mbajtur parasysh faktin, se për 30 -vite rresht, nuk ka gjetur zbatim statusi organik i ushtarakut, ndjen detyrimin të denoncojë dhe kërkojë të nxirren përpara përgjegjësisë administrative e ligjore të gjithë personat zyrtarë të çdo rangu, që me veprimet dhe mosveprimet e tyre antiligjore sfidojnë dhe shkelin fshehtasi, ose haptazi, Sovranin Ligj.
Komiteti Drejtues i Shoqatës “Lidhja Kombëtare e Ushtarakëve Atdhetarë” – qershor 2020.
