Tre parti të vogla PAA, PR dhe PBDNJ kanë depozituar në kuvend propozimet për ndryshimet në Kodin Zgjedhor, ndërsa risi është korrektimi kombëtar me pra 0.5% tyre. Duka, Mediu dhe Dule kërkojnë që nga hapja e listave deri te rikthimi i listave të përbëra në koalicionet zgjedhore. Depozitimi direkt në Kuvend i propozimeve të tyre tregon se kanë pak besim te grupi i dialogut, që do të prodhojë një produkt konkret. Në projektligjin e depozituar më datë 24 prill 2024 nga Agron Duka i PAA, mbështetur me firmat edhe të Fatmir Mediut dhe Vangjel Dules, kërkohet rikthimi i listave për koalicionet parazgjedhore si para ndryshimeve të korrikut 2020, votim me lista të hapura për të paktën 2/3 e listës dhe korrektim kombëtar. Hapja e listave në propozimin e 3 partive të vogla duhet të përfshijë edhe korrektimin kombëtar duke përjashtuar nga shpërndarja e mandateve me këtë metodë subjektet që kanë marrë më pak se 0.5% të votave në shkallë vendi, një pra që përgjysmohet në krahasim me 1% që është aktualisht në Kodin Zgjedhor. Një variant që PAA, PR dhe PBDNJ e propozojnë në këmbim të uljes së numrit të zonave zgjedhore të artikuluar më herët. Shtrirja e votimit elektronik dhe numërimit elektronik në të gjithë vendin dhe vota e diasporës janë dy propozimet e tjetra të aleatëve, të cilët në tryezën e dialogut përfaqësohen nga Oerd Bylykbashi, Dhurata Çupi dhe Erisa Xhixho nga Partia e Lirisë. Një tjetër risi që 3 partitë e vogla propozojnë gjithashtu është mundësia që edhe kryetarët e bashkive, të cilët me kodin aktual duhet të japin dorëheqjen për të garuar në zgjedhjet parlamentare, të çlirohen nga ky detyrim, duke u dhënë mundësinë të garojnë në një tjetër zonë elektorale dhe jo në vendin ku ata ushtrojnë detyrën e tyre, ashtu si aktualisht qëndron për prefektët.
