Turqia ka lëshuar një urdhër arresti ndërkombëtar për themeluesin e një platforme të tregtisë së kriptomonedhave, njofton BBC. Mediat shtetërore raportojnë se Faruk Fatih Ozer u arratis drejt Shqipërisë me gjasa me 2 miliardë dollarë nga 391,000 investitorë.
Policia arrestoi gjithashtu 62 persona në bastisjet e njëkohshme në agim në tetë qytete turke për lidhje të dyshuara me kompaninë e z. Ozer, Thodex.
Z. Ozer i quajti akuzat kundër tij “të pabazuara” dhe tha se ai është në Shqipëri për takime pune.
Ministria turke e Drejtësisë ka filluar procedurat ligjore për të kërkuar arrestimin dhe ekstradimin e z. Ozer nga kryeqyteti shqiptar Tirana, njoftoi Anadolu, duke shtuar se Ministri i Brendshëm Suleyman Soylu kishte folur me homologun e tij shqiptar në telefon.
Interpoli lëshoi një njoftim të kuq për z. Ozer të premten, pasi mori një kërkesë nga Ankaraja.
Një numër në rritje i qytetarëve turq po vendosin të përdorin kriptovaluta në përpjekje për të mbrojtur kursimet e tyre nga një rënie e mprehtë e vlerës së monedhës vendase, lira. Por tregu turk i kriptovalutave është i parregulluar.
Javën e kaluar, Turqia tha se do të ndalonte përdorimin e kriptovalutave për të paguar për mallra dhe shërbime nga 30 prilli.
Çfarë ndodhi me Thodex?
Gjërat filluan të dukeshin keq të mërkurën kur Thodex postoi një mesazh misterioz duke thënë se duheshin pesë ditë për të marrë në dorëzim një investim nga jashtë, të paspecifikuar. Më pas pezulloi tregtinë.
Investitorët filluan të kontaktojnë autoritetet, me ankesa kundër Thodex për më shumë se 1,160% krahasuar me javën e kaluar.
Të enjten, zyrtarët turq të sigurisë lëshuan një foto të z. Ozer, që besohet të jetë 27 vjeç, në Aeroportin e Stambollit duke udhëtuar në një vend që nuk dihej.
Më vonë u konfirmua nga burimet e sigurisë se ai kishte qenë në Shqipëri që të martën.
Në një mesazh të postuar në llogarinë zyrtare të Thodex në Tëitter atë ditë, z. Ozer mohoi akuzat.
Ai tha se ishte jashtë vendit për takime me investitorë të huaj dhe se do të kthehej në Turqi “brenda pak ditësh dhe të bashkëpunonte me autoritetet gjyqësore në mënyrë që e vërteta të dilte në dritë”.
Pastaj në 06:00 me orën lokale (03:00 GMT) të premten, policia nisi bastisjet në tetë qytete të ndryshme turke, përfshirë Stambollin, ku ata kontrolluan selinë e kompanisë dhe sekuestruan kompjutera dhe materiale dixhitale.
Ata kishin urdhër të arrestonin gjithsej 78 të dyshuar dhe kanë arrestuar 62 deri më tani. Zyrtarët gjithashtu kanë ngrirë llogaritë bankare të z. Ozer.
