Maturantët do të ulen sot në banka për t’u testuar në lidhje me njohuritë që kanë marrë tre vjeçarin e fundit në lëndën e matematikës.
Ata do të plotësojnë sot testet, me rregullat e reja që u vendosën nga Ministria e Arsimit, pas protestave që kanë zhvilluar.
Provimi do të zgjasë dy orë e gjysmë, dhe jo dy orë, siç ishte vendosur më parë në rregullore.
Pas provimit, maturantët kanë lajmëruar sërish protestë në orën 13:00.
Maturantët kanë dorëzuar në Ministrinë e Arsimit një draft me 10 pika, me shkeljet e pretenduara në provimin e Gjuhë-Letërsisë. Sipas maturantëve përmbajtja e testit nuk korrespondonte me kohën e vënë në dispozicion, ndërsa pretendojnë se pyetjet ishin jashtë programit mësimor.
Ata kërkojnë ripërsëritjen e provimit, pasi sipas tyre pyetjet ishin subjektive dhe niveli i testit ishte mbi mesataren. Njëkohësisht maturantët kërkuan uljen e pikëve për futjen në Universitet dhe uljen e peshës së provimit të Gjuhë-Letërsisë në llogaritjen e pikëve.
Ata janë shprehur se do të vijojnë luftën e tyre deri në plotësimin e të gjitha kërkesave që i kanë dorëzuar tek Ministria e Arsimit dhe shtojnë se nuk do ketë bojkot të provimit të matematikës, por as protestat nuk do të ndalen.
