Më fol sonte lehtë si erë
Kokën në duar ma merr të pushoj
M’i puth sytë si atëherë
I verbuar të të shikoj
Të jem diku në qenien tënde
Me frymën tënde të fluturoj
Mos ta dijë kush në cilat vende
Dashuria jonë shkeli, shkoi
Ku dha shpirt, ku e varrosën
Ç’gurë mbi kokë një ditë i vunë
Cilët shenjtë për të u gjakosën
Cilët djaj me gurë e zunë
S’dua të mbetem i coptuar
I harruar si në tragjedi
Nëse s’do të kisha dashuruar
Unë murg do isha, ti perëndi!
