(Pjesa e parë)
Ismail Xhaferri
Prap i dashur komandant
frikë na ka armiku.
Ecim në gjurmët e tua,
s’na dridhet qerpiku.
Prap i dashur komandant!
Siç na ka dhe hije
shumë nga ish-komunistët
i kemi në krye.
Ne i dashur komandant
nuk e thyem gjurin.
Nga kongreset në kongrese
lartë e ngremë flamurin!
Me ty flasim si me babën
dhe s’na del sekreti.
Më të ligjtë ndër komunistët
s’kanë rënë nga pushteti.
Armët që na le në depo
na kanë pasuruar:
Shit e shit kudo në botë
dhe s’kanë të mbaruar.
Ne me popullin e thjeshtë
bëjmë si në teatër!
Çdo ditë me armët që morën
vriten nga tre –katër.
Shumë nga armët që na le
i kemi shpërndarë,
prandaj prapë populli ynë
është popull ushtar.
Prap gjerdanët mbajmë në mes
dhe nuk i shkërmoqim,
se grabisim ndonjë bankë,
vrasim dhe sho-shoqin.
Prap i dashur komandant,
siç na ke mësuar:
luftë klasash bëjmë sërish,
por të moderuar.
Që të jemi të besueshëm
dhe mos biem erë,
shumë nga shtyllat e tensionit
i hodhëm në erë
As dhe njeri midis nesh
me prona s’u ngop!
Morëm nga kooperativat
dhen e dhi e lopë.
Ne i morëm dhe fabrikat
çdo gjë e qëruam.
Prishëm Spaçin e Burrelin,
Drenovën ndërtuam.
Prishëm Spaçin e Burrelin
të ulnim tërbimin,
por kemi Bencën pranë malit:
kemi dhe Peqinin.
Mësimet që na ke lënë
na ndriçojne përditë.
Ne tani në burgje kemi
sa pesë-fishi yt.
Në rrugën që na ke lënë
ne rendim me vrap
dhe me njerëz të pafajshëm
burgjet mbushim prapë.
Ata që burgosëm dje
rrugëve mbeten sot!
Ndaj sa herë që bëjnë greva
u hedhim një kockë.
Të na falësh komandant
për atë që iku…
Ka ca vite që gjermanin
ne e bëmë ballë miku.
Por të vazhdojmë kuvendin
Dhe mos t’i vemë pikën.
Mëmë e babë tani kemi
vetëm Amerikën.
Të na falësh komandant
që biem pak erë.
NATO-n që ti nuk e deshe
e kemi në derë.
Tani kemi shumë parti:
me yll e me shkaba.
Po të gjitha janë njësoj
ngjajnë vetëm nga baba.
Të na falësh komandant,
se s’na mban me zigji.
Sa herë bie shi atdheu
bëhet si Maliqi.
Dikur ne bëmë betimin,
për ty jepnim jetën.
Por të gjithë patëm gënjyer
s’të thamë të vërtetën.
Të na ndjesh o komandant
se s’është si më parë.
Tani jetën ne e japim
vetëm për dollar.