Pak minuta pas nisjes së provimit të lëndës me zgjedhje, tezat e Ekonomisë dhe Fizikës janë shpërndarë në mënyrë të paligjshme në rrjetet sociale, duke ngritur shqetësime serioze për sigurinë dhe besueshmërinë e Maturës Shtetërore.
Ky incident tregon se dekonspirimi po bëhet gjithnjë e më i sofistikuar, duke cenuar rëndë integritetin e këtij procesi të rëndësishëm për nxënësit. Provimi nisi në orën 10:00 dhe zgjat deri në orën 12:30, nën masa të rrepta sigurie të vendosura nga Ministria e Arsimit dhe Sportit.
Megjithatë, masat parandaluese nuk kanë mjaftuar për të ndaluar rrjedhjen e tezave, një problem që prej vitesh përsëritet në sistemin arsimor shqiptar. Këtë vit, Ministria zbatoi masa shtesë, përfshirë teste të personalizuara për maturantët me aftësi të kufizuara, me synim rritjen e barazisë dhe drejtësisë në qasjen ndaj arsimit të lartë. Por përpjekjet për një proces të drejtë janë vënë sërish në pikëpyetje për shkak të rasteve të kopjimit dhe dekonspirimit.
