Të dielën e 26 Dhjetorit në “Tv Klan” u transmetua episodi i fundit i sezonit të parë të “H.O.T”, seriali që bëri për vete shqiptarët duke i mbërthyer pas ekranit.
Këtë e ka vërtetuar dhe një sondazh i realizuar nga Ermal Mamaqi në “YouTube”.
Pyetjes “Çfarë note i jepni serialit “H.O.T”?”, i janë përgjigjur me notën 10-7600 njerëz nga 10 mijë votues.
Në total 9400 votues, pra 94% e audiencës e ka vlerësuar me mbi 8 dhe vetëm 6%, pra 600 persona, e kanë votuar më pak se 8.
Të gjitha episodet e “H.O.T” ndodhen tashmë dhe në “YouTube”, ku kanë thyer rekord shikueshmërie.
Ky prodhim është bërë seriali më i ndjekur shqiptar në “YouTube”, me mbi 80% të komenteve vetëm pozitive.
“H.O.T” do të ketë dhe një sezon të dytë, të cilin tashmë të gjithë mezi po presin sepse jeta e personazheve ka marrë një kthesë të papritur.
Dani u takua me të ëmën që e kërkonte prej vitesh, ndërsa një djalë i ri hyri në jetën e Amandës.
Seriali vjen me producentë Ermal Mamaqin e Dritan Huqin dhe autorë Klaudia Brahimajn dhe Bjordi Mezinin.