Shqiptarët e bllokuar në kufi. Reagon presidenti Meta: Shteti të zbatojë detyrimet kushtetuese ndaj qytetarëve të tij

75

Presidenti Ilir Meta ka reaguar ashpër për bllokimin nga policia shqiptare të qytetarëve shqiptarë që duan të hyjnë në territorin e vendit tonë. Në një deklaratë për mediat, Presidentit shprehet se shteti shqiptar duhet të zbatojë detyrimet kushtetuese që ka për shtetasit e tij.

Deklaratë e Presidentit të Republikës, Ilir Meta

“Jam shumë i shqetësuar mbi situatën e qytetarëve shqiptarë të cilët vijojnë ende të bllokuar në pikat e kalimit kufitar të Kakavijës dhe Kapshticës.

Kjo situatë duhet të marrë zgjidhje të menjëhershme.

U bëj thirrje sërish të gjithë qytetarëve shqiptarë të respektojnë kushtet e urgjencës dhe domosdoshmërisë të imponuara nga pandemia e COVID-19 në pikat tona kufitare e njëkohësisht kërkoj nga autoritetet tona përgjegjëse të respektojnë, jo vetëm kërkesat e situatës së gjendjes së fatkeqësisë natyrore, por edhe detyrimet kushtetuese dhe ndërkombëtare që shteti ka ndaj qytetarëve të vet në një situatë të tillë.

Edhe njëherë kërkoj nga të gjithë më shumë bashkëpunim e mirëkuptim, solidaritet e përgjegjësi mes qytetarëve dhe autoriteteve tona në dobi të interesit publik dhe sigurisë së jetës”.