Nënkryetari i LSI-së, Petrit Vasili, duke komentuar 5- vjetorin e Reformës në Drejtësi, e cilësoi ndër të tjera këtë reformë, si një gjueti shtrigash që u përdor kundrejt disa gjyqtarëve dhe prokurorëve, ndërkohë që të tjerë, vazhdojnë qetësisht detyrën, paçka se pasuria e tyre është ku e ku më e madhe.
“Sot kemi një fakt kokëfortë. Sot në Shqipëri, nuk kemi asnjë gjykatë të vetme që funksionon me kapacitetin e duhur, që të mund të përballojë me fuqinë e duhur dhe me cilësinë e duhur.
Në vend të saj, kemi gjykata të përgjysmuara.
Produkti i vetëm, që nëse qytetarët nuk kanë ndonjë të mirë, është fakti kokëfortë që vetëm në Gjykatën e Lartë, janë mbi 30 mijë dosje të akumuluara dhe në sistemin gjyësor në të gjitha nivelet e gjykatave të tjera, janë rreth 70 mijë dosje të tjera.
Pra janë 100 mijë çështje që presin përgjigje.
E gjithë reforma në drejtësi, rezultati i saj është katandisur në largimin e 200 gjyqtarëve.
Por sot 63 përqind e shqiptarëve nuk e besojnë më këtë reformë.
Ndërkohë që, shumica dërrmuese e të larguarve nga Reforma në Drejtësi, 95 përqind, janë larguar për kriterin e pasurisë.
Pra, Komisioni i Vettingut, është kthyer në një ILDKP të dytë.
Ndërkohë që Vettingu, nuk kishte pasurinë, si kriter të parë.
Pra, edhe treguesi për 200 largime, nuk i bën nder kësaj reforme, që në thelb ka dështuar.”