Panairi Ndërkombëtar i Tiranës, B2B Meetings mbledh kompanitë më në zë të Ballkanit Perëndimor

142
Sigal

Panairi Ndërkombëtar i Tiranës ka hapur dyert ditën e djehshme  për dhjetëra biznese shqiptare dhe ballkanike, të cilët kanë shpalosur për konsumatorin shqiptar dhe jo vetëm, produktet dhe shërbimet e tyre të shumëllojshme.

Një nga organizimet më të mëdha të Panairit ishte takimi “B2B”, i organizuar nga ËB6CIF, i cili bëri bashkë përfaqësues të bizneseve shqiptare, kosovare, boshnjake, serbe, maqedonase, malazeze e shumë të tjerë.

Nga ora 10:00 deri në 16:30, bizneset dhe përfaqësuesit e tyre patën mundësi të shkëmbejnë eksperiencat e tyre, por edhe të ndërlidhin marrëveshje mes tyre në vazhdimësi deri në përfundim të këtij panairi.

Marco Mandic, përfaqësuesi i 6 Dhomave të Tregtisë dhe Biznesit të 6 vendeve të Ballkanit Perëndimor shprehet për këtë eksperiencë.

“Unë vij nga Dhoma e Biznesit dhe Investimeve të Serbisë, ne vijmë çdo vit në këtë panair që nga vitit 2016. Ne kemi punuar në fakt për diçka që tani është realitet… që është një Ballkan i bërë bashkë për të bashkëpunuar. Unë gjithashtu vij edhe nga ËB6CIF, që përbëhet nga 6 Dhomat e Tregtisë së: Shqipërisë, Bosnje-Hercegovinës, Kosovës, Maqedonisë, Malit të Zi dhe Serbisë. Këtë vit sollëm një grup të bizneseve të vogla agrokulturore nga të 6-a vendet e ËB6CIF. Në këtë moment po zhvillohet B2B Meetings, ku po prezantohet distributorët më të mëdhenj të 6 vendeve. Jo vetëm kaq, por B2B bën bashkë njerëz dhe biznese, që është diçka shumë e mirë për ekonominë e të gjashta vendeve”, tha ai.

I pyetur për vështirësitë që do të eliminojë ky takim dhe ky panair, Mandic tregon se viteve të fundit, bashkëpunimi dhe tregtia mes kompanive shqiptare dhe serbe është rritur vazhdimisht.

“Di t’ju them që vitet e fundit vazhdimisht vijnë turistë nga Serbia në Shqipëri dhe di t’ju them që kjo do të vazhdojë të intensifikohet akoma dhe më shumë”, u shpreh Mandic.

Sakaq, përgjatë orëve të B2B Meeting, përfaqësuesit e bizneseve patën mundësi të prezantohen edhe me produktet, të cilët u afishuan në stendat e bizneseve përkatëse duke e bërë më të prekshme ofertën që ata kanë për tregjet e rajonit.

Promovohet libri “Xhamitë e Shqipërisë” nga Aleksandër Meksi në gjuhën turke

 

Mesditën e djeshme është promovuar libri “Xhamitë e Shqipërisë” i përkthyer në turqisht i ish-kryeministrit dhe profesor i shkencave, Aleksandër Meksi.Ceremonia u zhvillua në ambientet e Pallatit të Kongreseve në kuadër të Panairit Ndërkombëtar të Tiranës, i cili po mbahet pas një periudhe të vështirë prej pandemisë.

Në ceremoni ishin të pranishëm personalitete të jetës akademike dhe politike të Tiranës dhe Ankarasë, të cilët morën fjalën për të përshëndetur punën e rëndësishme të profesor Meksit dhe rëndësinë që përkthimi në turqisht ka për kulturën dhe historinë e të dy vendeve mikeve, Turqisë dhe Shqipërisë.Fjalën hapëse e pati drejtuesja e Panairit dhe njëkohësisht, CEO e Klik Ekspo Group, Elona Agolli, e cila vlerësoi kontributin e profesor Meksit me veprën e tij historike e kulturore.“Ju falenderoj përzemërsisht që më bëtë pjesë të këtij eventi. Është gjithmonë kënaqësi të flasësh për libra dhe për botimet e reja, sidomos për përkthimin e autorëve shqiptarë në gjuhën e një kombi tjetër”, u shpreh Agolli.

“Është vlerësim, sepse shkëmbimet kulturore kanë rrënjë më të thella në personalitetin njerëzor sesa shkëmbimet tregtare apo të biznesit”, shtoi ajo.

“Panairi Ndërkombëtar i Tiranës është prej dekadash pritës i ngjarjeve kulturore, siç është promovimi i këtij libri me autor profesor Aleksandër Meksi, i përkthyer së fundmi në gjuhën turke. Urojmë që faktet historike dhe kulturore mbi xhamitë e Shqipërisë të dokumentuara në libër si të dhëna arkitekturore, me vlera historike e kulturore si një simbol i një bashkëjetese të hershme mes kombesh dhe besimit islam në Shqipëri të ngjallin interes përmes librit për lexuesin elitar”, tha Agolli.

Profesor Aleksandër Meksi mbajti një ligjërim të shkurtër mbi librin që do të jetë një vlerë e shtuar në shkëmbimet kulturore të dy kombeve.

“Botimi i një libri në një gjuhë tjetër, është jo vetëm një sukses për autorin, por edhe për vendin, i cili bën botimin. Të jep mundësinë të njohësh e të lidhesh mirë me kulturën që ka lidhje të jashtëzakonshme me kulturën e një vendi tjetër, siç është Republika e Turqisë”, u shpreh Meksi.

“Unë e kam nisur këtë angazhim para 60 vitesh, pra më ka dhënë mundësinë të shoh monumente, të cilat u prishën pas vitit të mbrapshtë të 1967 për fatin e keq të kulturës shqiptare. Patëm fatin që një pjesë të mirë të tyre t’i përfshinim në libër dhe t’i dokumentonim si dëshmi të arkitekturës. Sepse ndër to ka pasur monumente të shekullit XV si në Përmet, të cilat u shembën apo si Xhamia e Karafilit, në Tiranë, e cila u prish për t’u ndërtuar Bashkia e Vjetër. Pra, ne jemi munduar t’i përfshijmë të gjitha në libër që të gjithë studiuesit, dhe lexuesit të jenë të informuar mbi këtë trashëgimi”, – tregoi ish-kryeministri shqiptar.Meksi theksoi se “”Xhamitë e Shqipërisë” është një dritare e hapur edhe për lexuesin turk për t’u njohur më shumë me kulturën e historinë osmane/turke në Shqipëri. Jo vetëm kaq, por ai shtoi se Zyra e Vakteve, në varësi të Kryeministrisë ka të gjitha lejet e ndërtimit të xhamive, çka mund të vlejë për studiuesit e tjerë për t’u thelluar”.

Përkthimin e kësaj vepre e përshëndeti edhe zv.presidenti i Dhomës së Tregtisë së Stambollit, Israfil Kurulay dhe ambasadori i Turqisë në Shqipëri, Murat Ahmet Yörük.“Jam me të vërtetë i lumtur që ndodhem mes jush në këtë ceremoni, – u shpreh Kurulay. – Ndonëse marrëdhëniet ekonomike i bëjnë bashkë dy vende, kultura i dallon ato. Edhe sot, ne po përjetojmë gëzim dhe emocionet që i marrim fale urave tona kulturore. Ka shumë mënyra për të forcuar marrëdhëniet kulturore dhe historike mes dy vendeve… një prej tyre është edhe restaurimi i objekteve historike e arkitekturore. Libri ‘Xhamitë e Shqipërisë’ është shumë i rëndësishëm dhe shumë i vlefshëm për historinë e dy vendeve. Si Dhomë Ekonomike e Stambollit jemi shumë të lumtur për botimin e këtij libri, që do të forcojë më shumë marrëdhënien e dy vendeve.”

Yurulay u shpreh se, në momentin e vizitës në Ambasadën turke në vendin tonë, kur është vënë në kontakt me librin e profesor Meksit ka shprehur dëshirën e menjëhershme për ta përkthyer këtë libër në turqisht, por zhvillimet politike, ekonomike e sociale e shtynë deri në muajt që jemi aktualisht.

Në fjalën e tij, Murat Ahmet Yoruk u shpreh se libri “Xhamitë e Shqipërisë” nga Meksi nuk do të jetë i vetmi apo investimi i fundit turk në lidhjet kulturore mes dy vendeve.

“Kjo nuk do të jetë ‘ura’ e vetme që do të forcohet mes dy vendeve. Ne jemi aktualisht në proces financimi për restaurimin e Xhamisë së Plumbit në Shkodër, të cilën e shpëtuam nga përmbytjet. Dhe mezi presim që ky proces të përfundojë e jemi shumë entuziastë për këtë”, – u shpreh Yoruk.

Përfaqësuesit turq në këtë ceremoni vlerësuan investimin kulturor që ky Panair Ndërkombëtar po bën për forcimin e bashkëpunimit ekonomik, kulturor dhe jo vetëm mes Shqipërisë dhe Turqisë.

Krijimi i një ure të re bamirësie dhe solidariteti në Shqipëri, Bashkisë Casalvekio e Puglias, donacion për bashkinë Lezhë

Kryetari i Bashkisë Casalvekio të Puglias, Noe Andreano,  në një ceremoni të veçantë që u zhvillua të enjten në Panarin Ndërkombëtar të Tiranës,  i dhuroi çekun simbolik kryetarit të Bashkisë Lezhë, Pjerin Ndreu, në vijim të nismës së donatorëve për rimëkëmbjen nga tërmeti i nëntorit 2019.

Duke qenë se Lezha është qyteti ku ndodhen eshtrat e Skënderbeut, një bashki arbëreshe, dhe në praninë e Don Antonio Leuçi, Drejtor i Caritas Shqipëria, Kryetari i Bashkisë Casalvekio të Puglias  Noe Andreano tha se “Qëllimi i këtij takimi ishte jo vetëm dhurimi i një ndihmë financiare në vlerën e 6 mijë euro, me dëshirën e madhe që të mbetet një vepër në bashkinë Lezhë dhe të mbetet në memorien e komunitetit të Lecies dhe Casalvekio”. Kryetari i Bashkisë Lezhë, Pjerin Ndreu duke falenderuar shprehu konsideratën për nga gjesti i bujarisë u shpreh i gatshëm për mundësinë e një vepre që të mbetet si dokument i shënuar në memorien e komunitetit të Lezhës.

Takimi u mundësua në bashkëpunim me Integra Onlus dhe organizatorët e Panairit Ndërkombëtar të Tiranës, nga Klik Exopo Group, me synimin që përmes aktit të bamirësisë të kultivohet kultura e solidaritetit edhe në Shqipëri, që në Itali dhe në botë është në përmasa të mëdha, u shpreh Klodiana Çuko, presidente e Integra Onlus, themeluar në Itali në 2002, dhe në 2017 Fondacioni “Bridge for the future” në Shqipëri për të sjellë pasqyrën e eksperiencës 20 vjeçare për krijimin e një ure të re bamirësie dhe solidariteti në Shqipëri.

Më pas të ftuarit vizituan ekspozitën “IntegrAzione 30 vjet eksodit të madh shqiptar në Itali”, prezantuar nga Integra Onlus dhe të kuruar nga fotoreporteri pulian Vittorio Arciers. Një vepër “që kujton dhimbjen dhe shpresën e një populli të shtypur nga regjimi, i cili e shikonte Italinë si një tokë të re të premtuar”, shpjegon kryetarja e Integra Klodiana Çuka, “si dhe bujarinë e jashtëzakonshme të popullit të Pulias”.

Panairi Ndërkombëtar i Tiranës, fokus rritjen e sigurisë ushqimore sipas standardeve tee BE 

Siguria ushqimore, gjithëpërfshirja, duke filluar nga prodhuesit deri tek konsumatori, nga interesi import-eksportit apo aplikimi i standardeve, impakti tek konsumatorët, baza ligjore, përputhja e kurrikulave me tregun, si dhe aplikimi i teknologjisë dhe inovacionit në sektor, ishin temat kryesore e forumit të sotëm, i zhvilluar në kuadër të serisë së aktiviteteve të Panairit Ndërkombëtar të Tiranës, organizuar nga Klik Expo Group.

“Siguria ushqimore, është një ndër katër prioritetet e qeverisë dhe Ministrisë së Bujqësisë dhe Zhvillimit Rural, së bashku me inovacionin, eksportin dhe turizmin rural. Si një prioritet parësor, do jetë pjesë e investimeve në kapacitet, përmirësimin e analizave dhe kontrolleve, gjurmueshmërisë, higjienës dhe paketimit”, tha zv/ministri i Bujqësisë dhe Zhvillimit Rural, Enio Civici. Duke shtuar se synimi është rritja e sigurisë ushqimore dhe arritja në nivelin e Bashkimit Evropian, nëpërmjet krijimit të laboratorëve modernë dhe trajnimeve të burimeve njerëzore.

“Përmes autoriteteve kontrolluese, që prekin gjithë spektrin e kontrollit për ushqimin, veterinarinë dhe bimët, ne do sigurojmë që kontrolli të jetë efektiv, përmes një qasjeje proaktive, bashkëpunuese me secilin subjekt në terma të cilësisë dhe sigurisë ushqimore,” përfundoi fjalën e tij Civici.Të ftuarit në panel ishin prodhues, drejtues kompanish të telekomunikacionit në Shqipëri dhe akademikë, të cilët vlerësuan iniciativën e këtij forumi dhe ndanë mendimet e tyre mbi teknologjinë e avancuar IOT (Internet of Things) në prodhim, bazuar në indikatorë të suksesshëm dhe impaktit që ka siguria ushqimore në aspektin social dhe ekonomik të vendit.