Dhoma e Tregtisë/Propozimet e sipërmarrjeve private për partitë politike
Dhoma e Tregtisë dhe Industrisë me kryetar zotin Nikolin Jaka zhvilloi një takim ditën e djeshme për nevojën e sipërmarrjeve në treg. Në takim u vu në dukje që kryesia e saj në bashkëpunim me aktorë të tjerë të sipërmarrjes private, e ndjejnë si një detyrim respektimin e rolit që ka sipërmarrja private në zhvillimin e ekonomisë shqiptare. Duke e trajtuar në këtë kontekst kërkojmë përfshirjen në programin e formacioneve politike që aspirojnë mandatin e ardhshëm qeverisës, si më poshtë:
Kërkesat për përfshirje në programet elektorale si dhe zbatimi i tyre nga qeveria e ardhshme:
1. Shlyerja e detyrimeve të qeverisë ndaj sipërmarrjes private në të gjitha fushat e ekonomisë ku ekziston kjo marrëdhënie..
2. Rimbursimi i TVSH-së, akcizave si dhe të gjithë taksave të tjera që buxheti i shtetit mund ti ketë sipërmarrjes private gjate ushtrimit te aktivitetit te saj brenda afatit 3 mujor. Kjo te realizohet duke bere ndërhyrjet e nevojshme ligjore.
3. Heqja e barrierave dhe taksave të fshehura që pengojnë promovimin e produkteve Made in Albania për eksport.
4. Heqja e sistemit të referencave ndaj sipërmarrjes private për import -eksport me të gjithë vendet e BE-së.
5. Heqja e sistemit të referencave ndaj sipërmarrjes private në sistemin fiskal.
6. TVSH jo më e lartë se 10 për qind për produktet bujqësore, blegtorale vendase si dhe shërbimet turistike.
7. Hapja e bankës ekonomike për zhvillim me fokus kreditimin e sipërmarrjes private me tarifa të reduktuara.
8. Heqja e TVSH-së për të gjithë makineritë dhe pajisjet që i nënshtrohen skemës së rimbursimit të TVSH-së dhe që i shërbejnë aktivitetit të sipërmarrjes private.
9. Aplikimi i TVSH-së në të gjithë qarkullimin tregtar duke hequr kufirin e ndarjes së bizneseve.
10. Platformë e qartë lidhur me trajtimin e kredive të këqija deri në ngrirjen e tyre për një afat dy vjeçar.
11. Lidhur me transportin rrugor kërkohet:
a. Heqja e TVSH-se për abonentë dhe biletat.
b. Heqja e akcizës për karburantin.
c. Rimbursimi në kohë i transportit të të gjithë kategorive të qytetarëve që përfitojnë me ligj fiskal këtë shërbim
d. Rishikimi i çmimit të biletës urbane duke përdorur metodën e krahasimit me vendet e rajonit (Maqedoni, Mali i Zi, Kosovë).
12. Heqja e TVSh-së për të gjithë artikujt që shërbejnë si lëndë e parë për prodhimin e plastmasit dhe produkteve të tjera që janë në shërbim të sektorit bujqësor .
Sugjerimet për promocionin e biznesit
1. Hartimi dhe përgatitja e menaxhimit territorial duke përcaktuar qartë sektorët prioritarë të ekonomisë së vendit për investim dhe zhvillim.
2. Partneritet i qëndrueshëm publik privat. Ngritja dhe funksionimi i institucionit të dialogut dhe konsultimit. Konsultim paraprak, eficient dhe me fuqi vendimmarrje në sektorin privat duke rritur rolin e KKB-së për çdo nismë ligjore që ka karakter ekonomik.
3. Përjashtimi nga tatim fitimi për tre vitet e para për sipërmarrjet e reja.
4. Përjashtimi nga dividenti për tre vitet e para për sipërmarrjet e reja.
5. Qëndrueshmëri e legjislacionit fiskal duke garantuar parimin e sigurisë juridike për sipërmarrjen private. Çdo akt normativ apo urdhër që cenon aktivitetin e sipërmarrjes private duhet të konsultohet paraprakisht jo më pak se gjashtë muaj me grupet e interesit.
6. Garantimi i infrastrukturës rrugore, energjetike, ujësjellës kanalizime për të gjithë investimet fillestare.
7. Aplikimi i sistemit (vlerësim performance) për sistemin tatimor doganor me indicie nga sipërmarrja private si dhe matja e performancës të inspektorëve të kontrollit fiskal me rezultatet e procedurave gjyqësore të fituara apo të humbura.
8. Strukturimi i sistemit tatimor për qarkun e Tiranës, duke u shndërruar në zyra shërbimi tatimore në varësi të dendësisë së biznesit.
9. Politika të përcaktuara qartë dhe efikase lidhur me sistemin e punësimit në përgjithësi dhe të të rinjve në veçanti:
a. Rimbursimi i çdo punësimi të ri në sipërmarrjen private për tre muaj nga ana e qeverisë.
b. Heqja e ngarkesës fiskale mbi pagat për çdo punësim të ri për një periudhë tre vjeçare me kusht që afati i kontratës të jetë jo më pak se gjashtë vjet, me përjashtim të rasteve të parashikuara nga kodi i punës për zgjidhjen e kontratës.
c. Ngritja, funksionimi dhe financimi i qendrave të trajnimit nga qeveria shqiptare brenda strukturave të Dhomave të Tregtisë (duke aplikuar sistemin gjermano- austriak) për: trajnimin, kualifikimin dhe përshtatjen e burimeve njerëzore të diplomuara dhe të padiplomuara dhe përfshirjen e tyre në sektorin privat.
d. Përcaktimi me ligj ku 20 për qind e stafit me arsim të lartë të sipërmarrjes private duhet të trajnohet çdo vit si dhe 10 për qind e stafit teknik profesional.
e. Përjashtimi nga çdo ngarkesë fiskale për sistemin e vetëpunësimit.
10. Mundësimi për eksport i të gjithë produkteve ushqimore drejt vendeve të BE-së brenda një periudhë 12 mujore.
11. Të merren masat për zbatimin e ligjit urbanistik lidhur me ndërtimet pa leje brenda vitit 2013.
12. Të merren masa të rrepta nga qeveria shqiptare lidhur me mbrojtjen e mjedisit duke respektuar standardet e bashkimit evropian në investimet e kryera.
13. Të merren masa nga qeveria shqiptare që brenda vitit 2013 të miratohen të gjitha planet rregulluese të bashkive dhe komunave në të gjithë territorin e Shqipërisë.
