Sulmohet biznesi i shqiptarit në Serbi, detyrohet të largojë familjen nga frika

70

Mbrëmjen e së premtes pas mesnatës, është vandalizuar furra e një shqiptari në Bella Cërkvë, Serbi.

Mediat serbe thonë se sulmi ka ndodhur në furrën “Banat-Çolaku“, ku sipas portalit “Belocrkvanske novosti”, pronari i furrës, Lutfi Çollaku, është detyruar ta largojë familjen e tij në një vend të sigurt.

Raportohet se në kohën e sulmit, në furrë ishte pronari, ku bashkë me të punësuarit po përgatisnin bukën për shitje. Autori i kësaj vepre, i cili është incizuar nga kamerat e sigurisë, ka thyer xhamin e derës së hyrjes, ndërsa portali “Belocrkvanske novosti” ka publikuar edhe fotigrafinë dhe emrin e sulmuesit.

Sipas fjalëve të të punësuarvë në furrë, policia ka dalë në vendin e ngjarjes.

Fqinjët me të cilët ka biseduar gazetari i portalit në fjalë, kanë shprehur keqardhjen për këtë ngjarje, duke theksuar se nuk kanë asgjë të keqe me pronarin dhe se aty e blejnë bukën tash e sa vite.

Ata nuk mbajnë mend të ketë ndodhur një sulm i tillë në Bella Cërkvë.