Ç’ja thoshte bilbili…
Arben Duka
Ç’ja thoshte bilbili…
Mu në Lazarat:
“Rrofsh, Baba Berisha,
Që nuk na le thatë!”
Që nuk na le thatë
Pa ikur Shtatori
Se ti je, o mik
Kombinat humori!
Kombinat humori
Nga gjithë më i zoti
Të të marrë pleshtat
Edhe Don Kishoti!
Don Kishoti vetë
Zylua i Dritëroit
Ty nuk të arrijnë
As te majë e thoit!
As te majë e thoit
O, shoku Sali!
Mjeri, unë i mjeri
Ç’do bëja pa ty!
Ç’do bënte pa ty
Pelua, Arben Duka
S’do t’i dilte gjella
S’do t’i dilte buka!
Shpesh, vendos mos shkruaj
Dhe s’ngrihem nga shtrati,
Por, sa ti më shfaqesh
Ngrihem si lugati!
Ngrihem si lugati
Rrëmbej stilografin,
Furnizoj me miell
Çdo ditë “Telegrafin”!
Jetë sa më të gjatë
Çdo çast të uroj
Se pa ty i dashur
Unë falimentoj!
Unë falimentoj
Kjo është e vërteta
Goditje të rëndë
Merr edhe gazeta!
Sa të jesh ti Sali
Mirë e kemi punën
Dhe nga të fryjë era
Nuk e kthejmë gunën!
Se ç’mu këput koka
Si lopës në grazhd
Kur fole një ditë
Atje në Librazhd!
Fole në Librazhd
Varda more varda:
“Kemi vënë mënjanë
Disa miliarda!”
Disa miliarda
Shifra me nëntë zero
Dhe jo lekë shqiptare,
Po katër miliardë euro!
Ç’ja thoshte bilbili
Me oi-oi
“Katër miliarda
Ku janë, o Sali?”
Ç’ja thoshte bilbili,
U çmend i shkreti
Katër milliard’ euro
Dy buxhete shteti!
Ç’ia thoshte bilbili
Me ca ngashërime
S’janë të buxhetit
Po janë kursime!
Ç’ja thoshte bilbili
Në zheq e furtunë:
“O Sali i dashur,
S’është kështu kjo punë!”
O Sali i dashur
S’është kështu kjo punë,
O je çmendur ti
O jam çmendur unë!
O je çmendur ti,
Siç thotë shoku Mero
Dhe nuk i kupton,
Shifrat me shumë zero!
Po të kemi kaq
Ka ardh’ ditë e lume
Na takon të hamë
Tri vakte llokume!
Po kjo ngjarje e madhe,
Akoma s’ka ngjarë,
Shyqyr që të kemi
Goxha shakatar!
Goxha shakatar
Të dytë s’ka bota
Dhe fjalët e tjera
Janë fare të kota!
Dhe fjalët e tjera
Janë fare të kota
Ty s’ta marrin dot
Njëqind Don Ki Shota!
Njëqind Don Kishotë
As dhe njëqind Zylo,
Ndaj për qejfin tënd
Këndo, o bilbilo!