Ç’janë këta që bëjnë ligjin
me gjithë soj e sorrollop?
Ç’janë këta që Shqipërinë
e kanë kthyer mish për top?
Ç’janë këta që rrijnë në krye,
që përditë shtojnë pasurinë?
Ç’janë këta që vendin tonë
e kanë kthyer në çmendinë?
Ç’janë këta me privilegje:
vetëm vidh e ha e pi
dhe çdo zyrë në këtë vend
e mbushën me Shukuri?
Edhe majtas edhe djathtas
që të gjithë të harbuar
në çdo zyrë të këtij shteti
mbenë me allate në duar…
Çjanë këta uzurpatorë,
që na tallin, që na qeshin,
që do ikin nga pushtetet
vetëm ditën që do vdesin?
Ç‘janë këta kaq të babzitur,
që na hiqen shpëtimtarë
tek ky vend që 20 vite
më shumë vdiqën sa janë gjallë…!
Çjanë këta politikanë
që të ardhmen morrën zvarrë,
që vranë shpresën që vranë dritën
katër -pesë mijë të vrarë…!
Ç‘janë këta që kapën kreun,
që prej vitesh po na tallin
dhe që për kolltuk të tyre
Shqipërinë në grykë e varin…
Ç‘janë këta që zunë qoshenë
e na mbinë në tribunë?
T‘ju lashë baltën e mashtrimit
s‘mjaftojnë arka me sapunë…
Ç‘janë këta politikanë,
që vendit si bëjnë derman!
Këta njerëz të pangopur,
që ne i bëmë Sulltanë…
Ç‘janë këta politikanë:
që të gjithë Xhuveleri,
që për një buzkuq të grave
shkojnë gjer në Itali…?
Ç‘janë këta që jetën japin
vetëm për dollarë franga?
Ç’janë këta që shpresën tonë
e mbajnë lidhur nëpër pranga…!
Ç‘janë këta që vranë të drejtën?
Drejtësi na mori malli!
Pa më gjeni ju një zyrë
që s‘të rrjepin për së gjalli…
Ç’janë këta që llomotitin
tash prej 25 vjet…!?
Ç’janë këta që Shqipërinë
e kthyen në pronë të vet…
Ç‘janë këta politikanë,
ku i kanë duart e pastra?
Këta kërcimtarë të shtirur
Siç ndodh në ballo me maska…
Çjanë këta që na ngatruan,
porsi leshi dele rudes
dhe e bënë Shqipërinë
njësoj si surrati Sudes…
Ç‘janë këta politikanë
dhe krenarë dhe të dhjerë?
Këta dhjakonarë të djeshëm,
që u kthyen në bejlerë…
Ç‘janë këta politikanë?
Ç‘janë këta zaberhanë:
Kush më shumë e kush më pak
ngjajnë me Esat Toptanë…
Çjanë këta politikanë,
që na rropën, që na grinë
dhe që Shqipërinë e gjorë
po e çojnë në greminë…