Përfaqësuesja A zhvilloi si rrallëherë 9 ndeshje në 2012-n. Të gjitha ndeshjet U-21, U-19 dhe U-17
Viti 2012 ishte tepër i ngjeshur për ekipet kombëtare shqiptare, duke nisur nga ai A, dhe deri tek ato U-21, U-19 dhe U-17. Nuk mungojnë këtu edhe miqësoret e përfaqësueses së femrave, dhe ato të futbollit në sallë. Gazeta “Telegraf” bën një bilanc të gjitha ndeshjeve të zhvilluar këtë vit, që përkoi me debutimet e Xhani De Biazit në stolin e Kombëtares A, si dhe të Foto Strakoshës në atë U-19.
KOMBËTARJA A
Nëntë ndeshje ndërkombëtare, katër zyrtare për eliminatoret e Kampionatit Botëror “Brazil 2014” dhe pesë ndeshje miqësore, madje tre tepër të veçanta, pasi u përballëm me Katarin në Madrid, Iranin në Stamboll dhe Kamerunin në Gjenevë. Në nëntë ndeshje, De Biazi koleksionoi katër fitore, dy barazime dhe tri humbje, çka e bën atë më të suksesshmin në se çdo trajner tjetër i përfaqësueses në nëntë ndeshjet e para.
ZYRTARET – Trajneri italian i Shqipërisë, Xhani De Biazi, grumbulloi gjashtë pikë në katër ndeshjet e para të tij, në kualifikueset e Botërorit “Brazil 2014”, duke barazuar rekordin e mbajtur nga gjermani Hans-Peter Brigel, me këtë të fundit që i mori po gjashtë pikë në eliminatoret e Kampionatit Botëror 2006, finalet e të cilit u luajtën në Gjermani. Xhani De Biazi ishte në “qiellin e shtatë” pas përfundimit të ndeshjes së fituar 3-1 me Qipron, por italiani vuajti tmerrësisht shumë, kur qipriotët barazuan me një gol tërësisht të evitueshëm. Italiani u ndje i superlumtur. Golat e Shqipërisë u shënuan nga Armando Sadiku, Edgar Çani dhe një supergol nga Erjon Bogdani. Në takimin e radhës, Kombëtarja jonë humbi 2-0 me Zvicrën në Lucernë, pas dy gabimeve të mbrojtjes sonë, ku veçohet gafa e Dallkut, ky i fundit shkaktoi një penallti të panevojshme. Dramatike ishte humbja me Islandën: 2-1, në “Qemal Stafa”. Birkir Bjarnason shënoi i pari për islandezët (19’), ndërkohë që barazoi Edgar Çani (28’). Golin fitues për miqtë e shënoi Gylfi Sigurdson (81’), duke na shkaktuar humbjen e dytë rresht. Pas katër ditësh,
Falë një goli të Odise Roshit, Shqipëria triumfoi 1-0 ndaj Sllovenisë. Kuqezinjtë tanë kanë grumbulluar gjashtë pikë nga katër ndeshjet e para, me dy fitore dhe dy humbje, duke e mbyllur vitin 2012 në vendin e tretë, përpara se ato të rinisin në mars të vitit të ardhshëm. Kjo ishte fitorja e 13-të e Kombëtares sonë në 88 ndeshje në kualifikueset e Kupës së Botës.
MIQËSORET – Pesë miqësore brenda një viti është një luks për çdo trajner, për më tepër kur në përfundim të tyre bilanci është plotësisht pozitiv: dy fitore, dy barazime dhe një humbje. Aventura e Kombëtares me De Biazin në bankinë nisi me ndeshjen
Gjeorgji-Shqipëri 2-1 (në Tbilisi), por me portierin Samir Ujkani që priti dy penallti. Një ndeshje e humbur më shumë si pasojë e gabimeve të gjyqtarit. Më 22 maj, Shqipëria luajti një miqësore të rrallë me Katarin, një takim i zhvilluar në Madrid. Kombëtarja fitoi 2-1 me golat e Elis Bakajt (46’) dhe Erjon Bogdanit (50’). Pesë ditë më pas, më 27 maj, Shqipëria fitoi 1-0 miqësoren me Iranin, në Stamboll, falë një goli të Emiljano Vilës (60’), duke dëshmuar se shpesh herë statistikat e renditjeve në FIFA nuk vlejnë, po të kemi parasysh se iranianët vinin në testin e Stambollit, me plot +33 vende në ranglistën botërore prej 208 shtetesh. Më 15 gusht, Shqipëria bëri një paraqitje të varfër në barazimin 0-0 ndaj një Moldavie, që ndodhet 58 vende më dobët se ne në renditjen e FIFA-s, pikërisht në premierën shqiptare në “Qemal Stafa”, të trajnerit italian. Barazim pa gola pati edhe ndaj Kamerunit të Samuel Etosë, një ndeshje e luajtur në Gjenevë të Zvicrës, më 14 nëntor 2012, por me një paraqitje të mirë të kuqezinjve, pavarësisht se afrikanët goditën një herë shtyllën e portës së mbrojtur nga Etrit Berisha. De Biazi ka një bilanc pozitiv në ndeshjet miqësore: dy fitore, një barazim dhe një humbje.
KOMBËTARJA U-21
Kombëtarja U-21, e drejtuar nga Skënder Gega, zhvilloi tri ndeshje zyrtare për eliminatoret e Kampionatit Europian, duke humbur me Portugalinë 3-1 (6 qershor 2012), në Marina Grande (gol i Bekim Balajt); barazoi pa gola në Moskë me Rusinë (12 qershor 2012) dhe humbi 2-1 me Moldavinë (6 shtator 2012) në Tiraspol (gol i Elvis Prençit). Duhet theksuar se portieri Stiv Frashëri priti dy penallti në atë takim. Shpresat e mbyllën në vendin e fundit në grupin e tyre, duke grumbulluar 5 pikë në 8 ndeshje. Armando Sadiku ishte dhe shënuesi më i mirë i Kombëtares U-21, me 6 gola në 7 ndeshje. Shpresat luajtën dhe dy ndeshje miqësore në Austri, me Ukrainën, të humbur 3-0 (22 maj) dhe barazuan 2-2 me Maqedoninë (25 maj).
KOMBËTARJA U-19
Për eliminatoret e Euro U-19 (grupi 7), të zhvilluara në Vlorë dhe Fier, Kombëtarja e drejtuar nga Foto Strakosha humbi ndeshjen e parë 3-0 me Italinë (12 tetor), por duke bërë një lojë të mirë.
Më 14 tetor 2012, Kombëtarja U-19 mposhti 3-1 Belgjikë, në ndeshjen e zhvilluar në Vlorë. Golat mbajnë firmat e kosovarit Ervis Kavazajt, mesfushori të Juventusit U-19, Elvis Kabashit dhe Lorenc Shehajt të Flamurtarit. Belgjika e shënoi golin e vetëm me anë të Natan Kabaseles. Kur i kishte të gjitha shanset për të shpresuar për një kualifikim, ajo humbi 2-0 me Bjellorusinë, duke u renditur në vendin e fundit në grup. Kombëtarja U-19 zhvilloi edhe disa miqësore: fitoi 3-1 me Bosnjën (29 maj), me golat e Kabashit, Maganit dhe Koliqit. Në shortin e hedhur, për eliminatoret e Kampionatit Europian 2013-2014 të asaj moshe.
Shqipëria ndodhet në grupin 6, së bashku edhe me Greqinë, Sllovakinë dhe Bullgarinë. Ndeshjet do të luhen në Bullgari vitin e ardhshëm.
KOMBËTARJA U-17
Në eliminatoret e Kampionatit Europian U-17 2013, në eliminatoret e zhvilluara në Hungari, gjatë muajit tetor, Shqipëria e drejtuar nga boshnjaku Xhemal Mustedanagiç luajti me Italinë, Hungarinë dhe Lihteshtejnin. Humbëm 1-0 me italianët (në minutën e fundit të ndeshjes, ndërkohë që Elezaj priti një penallti), dhe po me këtë rezultat humbëm edhe me hungarezët dhe fituam thellësisht me lihteshtejnasit, me rezultatin e thellë 6-0. Golat mbajnë firmat e Xhemo, Aliu, Lokaj, Tahiraj, Rashica dhe një autogol i Tshutsherit. Aliu humbi dhe një penallti në atë takim. Në shortin e Kampionatit Europian 2014, të hedhur para pak javësh, Shqipëria do të jetë në një grup me Bjellorusinë, Rumaninë dhe Finlandën. Ndeshjet kualifikuese do të zhvillohen në vendin tonë, nga datat 18-23 tetor 2014. Trajneri boshnjak i Kombëtares U-17, Xhemal Mustedanagiç, ishte shumë i kënaqur me shortin dhe me faktin, që ndeshjet do të zhvillohen në Vlorë dhe Fier. Kjo do të jetë hera e tretë që, në vendin tonë do të zhvillohen eliminatoret e Kampionateve Europiane të moshave,. Pas atyre të U-17 (2007, në Tiranë dhe Durrës) dhe U-19 (2012, në Vlorë dhe Fier).
KOMBËTARJA A BOTËRORI 2014
NDESHJET E SHQIPËRISË
7 shtator, Tiranë
Shqipëri-Qipro 3-1
11 shtator, Lucernë
Zvicër-Shqipëri 2-0
12 tetor, Tiranë
Shqipëri-Islandë 1-2
16 tetor, Tiranë
Shqipëri-Slloveni 1-0
RENDITJA
Zvicra 4 10
Norvegjia 4 7
Shqipëria 4 6
Islanda 4 6
Qipro 4 3
Sllovenia 4 3
Bilanci: 2 fitore, 0 barazime, 2 humbje
MIQËSORET
29 shkurt 2012, Tbilisi
Gjeorgji-Shqipëri 2-1
22 maj 2012, Madrid
Shqipëri-Katar 2-1
27 maj 2012, Stamboll
Shqipëri-Iran 1-0
15 gusht, Tiranë
Shqipëri-Moldavi 0-0
14 nëntor, Gjenevë
Shqipëri-Kamerun 0-0
Bilanci: 2 fitore, 2 barazime, 1 humbje
Bilanci në total: 4 fitore, 2 barazime, 3 humbje
Skandali me Anglinë
Skandal me miqësoren ndërkombëtare Shqipërisë U-21 dhe Anglisë U-23 (16 tetor 2013). E programuar për t’u luajtur në “Niko Dovana” të Durrësit, ajo nuk u zhvillua. Shkaku është banal dhe tregon mjerimin e stadiumeve tona. Për shkak të rrebeshit të shiut të rënë thuajse gjatë gjithë ditës, në Durrës, dhomat e zhveshjes së “Niko Dovanës” ishin përmbytur duke u bërë të pashfrytëzueshme.
Shqipëria tani renditet në e 63-ta në botë, lë pas 24 shtete europiane
Kombëtarja merr dhurata nga FIFA
Shqipëria e mbylli me sukses vitin futbollistik ndërkombëtar duke u renditur në vendin e 63-të në ranglistën e FIFA-s për muajin dhjetor, duke u përmërisuar me katër pozicione në raport me muajin nëntor (67). Kështu, Kombëtarja e drejtuar nga italiani Xhani De Biazi ka grumbulluar 518 pikë. Në renditjen botërore, Kombëtarja jonë ndodhet midis Sierra Leones (vendi i 62-të, 521 pikë) dhe Kanadasë (vendi i 64-t, 517 pikë). Shqipëria i bëri një mbyllje vitit ndërkombëtar edhe në renditjen kontinentale, duke u pozicionuar në vendin e 29-të, e duke lënë pas jo pak, por 24 shtete të tjera, përfshirë emra të tillë si Austria, Skocia, Izraeli, Uellsi, Maqedonia, etj. Përsa u përket kundërshtarëve të Grupit E, në eliminatoret e Botërorit “Brazil 2014”, Kuqezinjtë lënë pas dy skuadra. Më konkretisht: Zvicra e Hicfeldit mban vendin e 12-të në këtë renditje për dhjetorin, me një ngjitje prej katër vendesh në krahasim me muajin e kaluar, ndërsa Norvegjia është e 24-ta, me plus 2 vende. Pas nesh renditet Islanda, në vendin e 90-të, që ka rikuperuar plot 6 vende në krahasim me nëntorin, ndërsa e 132-ta është Qiproja, e cila ka zbritur 5 shkallë. Kuqezinjtë e mbyllën këtë vit kalendarik me ndeshjen miqësore të 14 nëntorit kundër Kamerunit të Samuel Etosë, të cilën e barazuan 0-0 në Zvicër, ndërsa kanë marrë dy fitore në fushatën eliminatore të Grupit E, në start me Qipron, me rezultatin 3-1, dhe në ndeshjen e katërt me Slloveninë, me rezultatin 1-0. Skuadra e De Biazit ka humbur 2-0 me Zvicrën, në fushën e kësaj të fundit, dhe është mundur 2-1 nga Islanda, në “Qemal Stafa”. Në këtë mënyrë, kemi grumbulluar 6 pikë, që na pozicionojnë në vendin e tretë, me 6 pikë, aq sa ka edhe Islanda, por me golaverazh më të dobët se ne. Kualifikuesja e radhës e kuqezinjve do të luhet pikërisht ndaj Norvegjisë, në fushën e këtyre të fundit, më 22 mars 2013. Norvegjezët kanë 7 pikë nga katër ndeshjet e para.
Spanja, në krye të Botës
Spanja e nisi dhe e mbylli vitin 2012 në krye të listës botërore. Kampionia e Europës dhe Botës ka grumbulluar 1606 pikë, e ndjekur nga Gjermania (vendi i 2-të, 1437 pikë) dhe Argjentina (3, 1290). Në “Top 10” janë dhe Italia (4, 1165), Kolumbia (5, 1164), Anglia (6, 1151), Portugalia (7, 1144), Holanda (8, 1124), Rusia (9, 1070) dhe Kroacia (10, 1064).
900 ndeshje në vitin 2012
Për renditjen e muajit dhjetor u morën në konsideratë 143 ndeshje në të gjithë botën, ndërkohë që gjatë gjithë vitit 2012 u zhvilluan në total 900 ndeshje, ku më shumë se gjysma (465) ishin miqësore, ndërkohë që 257 takime ishin të vlefshme për kualifikueset e Kampionatit Botëror. Renditja e re do të publikohet, më 17 janar 2013.
RENDITJA NË ZONËN EUROPIANE
FIFA UEFA Ekipi Pikë
1 1 Spanja 1606
2 2 Gjermania 1437
4 3 Italia 1165
6 4 Anglia 1151
7 5 Portugalia 1144
8 6 Holanda 1124
9 7 Rusia 1070
10 8 Kroacia 1064
11 9 Greqia 1033
12 10 Zvicra 1004
17 11 Franca 949
20 12 Suedia 870
21 13 Belgjika 868
23 14 Danimarka 821
24 15 Norvegjia 810
27 16 Bosnja 788
29 17 Çekia 781
31 18 Mali i Zi 756
32 19 Hungaria 750
33 20 Rumania 700
38 21 Serbia 659
40 22 Turqia 627
42 23 Irlanda 609
47 24 Sllovakia 595
47 25 Ukraina 595
49 26 Sllovenia 591
50 27 Bullgaria 585
55 28 Polonia 553
63 29 SHQIPËRIA 518
65 30 Bjellorusia 516
70 31 Austria 492
72 32 Skocia 490
73 33 Gjeorgjia 481
75 34 Armenia 457
78 35 Izraeli 454
81 36 Maqedonia 436
82 37 Uellsi 435
83 38 Finlanda 431
86 39 Estonia 425
90 40 Islanda 392
96 41 Irlanda Ver. 367
106 42 Letonia 334
116 43 Lituania 284
118 44 Azerbajxhan 277
128 45 Moldavia 255
132 46 Qiproja 248
142 47 Kazakistani 200
146 48 Malta 178
148 49 Luksemburgu 172
153 50 Ishujt Faraoe 151
154 51 Liehtenshtejni 146
204 52 Andorra 11
207 53 San Marino 0
