SUPERIORE/ Ish-futbollisti i 17 Nëntorit, Luan Metani, në këndvështrimin e profesionistit
Nga Agron KAJA
Fundjava e kaluar në futbollin shqiptar i luajti të gjitha ndeshjet në mbrëmje, ora 19:00. Dhe menjëherë solli edhe ndërprejen e përkohshme të kampionateve, pasi këtë javë Kombëtarja jonë e futbollit do të luajë dy ndeshjet e radhës në Ligën e Kombeve. Për gjithçka është zhvilluar në garën e tetë javëve në Abissnet Superiore dhe në shtatë javë në kampionatin e Kategorisë së Parë, dje për gazetën “Telegraf” foli ish-futbollisti i 17 Nëntorit dhe i Shkëndijës së Tiranës, Luan Metani. Madje ai shprehu keqardhje edhe për nivelin aktual, duke thënë se është i dobët. “Unë i kam ndjekur të gjitha ndeshjet e këtyre javëve të luajtura në Superiore, por edhe në Kategorinë e Parë. Dhe ju shpreh me sinqeritet mendimin tim, pasi aktualisht kemi një futboll në nivel të ulët. Kjo javë e Superiores i luajti të gjitha ndeshjet në ora 19:00, dhe në mendimin tim profesional është një orar i përshtatshëm. Por skuadrat nuk e ngritën nivelin e lojës, ku u shënuan gola pa shkëlqim, me penallti që edhe mund të kaloheshin”, kështu e nisi bisedën Luan (Ili) Metani, i cili iu referua ndeshjeve të javës së 8-të. “Duke sjellë në kujtesë vetëm ndeshjet e javës së 8-të, unë do thoja se asnjerën prej tyre nuk do ta veçoja. Nuk ka ndonjë skuadër që të bëjë diferencën, të gjitha thuajse janë aty-aty. Madje të gjithë lojtarët janë në nivele të ulëta, nuk kanë ritëm nga ndeshja në ndeshje. Ndaj edhe më sipër u shpreha se është një kampionat jo në nivelin që kërkon tani futbolli shqiptar. Janë shumë për të dëshiruar, si Superiorja edhe Kategoria e Parë, e cila është edhe më e vështirë. Dhe çfarë bëjnë drejtuesit? Fajin ua kalojnë trajnerëve. Largimi i tyre në këtë kohë ka krijuar defekte te skuadrat dhe si profesionist ndjej shumë keqardhje për të gjitha skuadrat. Këtu më vjen keq për Laçin që nuk po gjen ekuilibrin e duhur me trajnerin, ndërsa te Tirana, trajneri Shkëmbi do ketë shumë punë me elementët e rinj që ka në dispozicion”. Ndërkohë që futbolli shqiptar do të ndëpritet zyrtarisht për më shumë se 10 ditë, dhe për këtë Metani mendon se nuk ndikon njësoj te të gjitha skuadrat. “Kjo ndëprerje nuk është njësoj për të gjitha skuadrat, por ndikon për mirë tek ato që nuk kanë vijueshmëri pozitive në këto tetë javë, ndërsa te Laçi edhe për të vendosur trajnerin e ri e për tu rekuperuar. Jemi në mbyllje të fazës së parë dhe nga sa janë shprehur skuadrat, shikoj se Partizani, Vllaznia, Elbasani, Egnatia e Dinamo do jenë më pretendentet. Ardhja e Ilir Dajës e ka bërë Dinamon më tërheqëse në kampionat, ndërsa do jenë tre-katër skuadra që fundin e renditjes duhet ta quajnë “alarm” për vazhdimësinë e tyre”, kështu e mbylli bisedën ish-sulmuesi bardheblu, Luan (Ili) Metani.
SHUHET NJË LEGJENDË
Sefedin Braho, “Shigjeta” e heshtur ndahet nga jeta!
E diela e parë e tetorit 2024 solli hidhërim në familjen Braho në Gjirokastër, por edhe në gjithë komunitetin shqiptar të futbollit, e më gjerë. U nda nga jeta një LEGJENDË, Sefedin Braho, një nga sulmuesit anësorë më të mirë në futbollin shqiptar të të gjitha kohrave. Driblues, i shpejtë dhe i saktë para porte, Braho ka lënë në memorrjen e historisë së topkëmbës shqiptare mbresat që koha në të cilën ai luajti, ishte e vështirë ta shpërblente në të gjitha drejtimet, brenda dhe jashtë fushe. Karrerën e nisi si futbollist i Luftëtarit të Gjirokastrës në vitin 1968, dhe duke e zbuluar talentin e tij, dy vite më pas ishte Partizani që e rekrutoi, duke u mobilizuar për të kryer shërebimin e detyrueshëm ushtarak. Këtu ai u formua më shumë si futbollist, duke shtuar përvojë me Kombëtaren dhe në ndeshje ndërkombëtare. Dy vite më pas u rikthye në Gjirokastër, dhe për më shumë se një dekadë ishte pjesë e treshes së madhe Kalluci-Braho-Seitaj. Pas lënies së futbollit Braho ka qënë gjithë kohën Inpektor në Klubin e Futbollit “Luftëtari” dhe pas daljes në pension nuk kishte aktivizim me futbollin. Gazeta “Telegraf” ka biseduar disa herë me Sefedin Brahon, i cili edhe pse e kishte si të vështirë komunikimin, “dorëzohej” shpejt dhe fliste dy fjalë, sa për dyzet të tilla. Do mbetesh i paharruar Sefedin Braho!
CV/ SEFEDIN BRAHO
Datëlindja: 18 gusht 1953
Vendlindja: Gjirokastër
Sporti: Futboll
Roli në fushë: Sulmues
Skuadrat si futbollist
1970-1972 Luftëtari
1972-1974 Partizani
1974-1988 Luftëtari
1979-1980 Huazim Partizani
Me Kombëtaren
1973-1983 në 9 ndeshje
Ndarja nga jeta: 6 tetor 2024
Lëvizje të trajnerëve, 2024-2025
Skuadrat Larguar Afruar
Dinamo D. Mehmeti I. Daja
Bylis E. Egbo N. Dede
Laçi A. Cungu ?
ABISSNET SUPERIORE
Ndeshjet-Java 9
E shtunë, 19 tetor 2024
Elbasani-Partizani 14:00
Bylis-Skënderbeu 14:00
Egnatia-Teuta 14:00
Tirana-Dinamo C 14:00
Laçi-Vllaznia 14:00
RENDITJA
Skuadrat Nd Pikë
1.Partizani 8 15
2.Egnatia 8 14
3.Vllaznia 8 14
4.Dinamo C 8 14
5.AF Elbasa 8 13
6.Teuta 8 13
7.Tirana 8 9
8.Skënderbe 8 7
9.Bylis 8 5
10.Laçi 8 3
KATEGORIA E PARË
Ndeshjet-Java 8
E dielë, 20 tetor 2024
Apolonia-Burreli 14:00
Erzeni-Besa 14:00
Flamurtari-Pograd 14:00
Valbona-Korabi 14:00
Kukësi-Kastrioti 14:00
Vora-Lushnja 14:00
RENDITJA
Skuadrat Nd Pikë
1.Besa 7 19
2.Flamurtari 7 18
3.Vora 7 18
4.Burreli 7 11
5.Kastrioti 7 10
6.Pogradeci 7 9
7.Lushnja 7 9
8.Kukësi 7 9
9.Apolonia 7 5
10.Korabi 7 5
11.Valbona 7 5
12.Erzeni 7 1
