INTERVISTA/ Flet për “Telegraf” ish-kapiteni i Partizanit, Igli Allmuça, veçon sfidën me Vllazninë
Agron Kaja
Edhe gjashtë javë deri në mbyllje të Superiores, cili është këndvështrimi juaj për zhvillimin e garës, nga java e 1-rë e deri tek e 29-ta?
Ekipet janë treguar me oshilacione, ku vetë rezultatet e tyre nga java në javë kanë treguar se nuk kanë stabilitet. Ndërsa Egnatia ka qënë konstante, por me luhatje të vogla. Në tërësi në 29 javët e luajtura nuk ka patur shumë stabilitet.
Abissnet Superiore luan javën e 30-të, jemi në një moment të kampionatit ku të gjitha ndeshjet veçohen si kryendeshje më vehte?
Janë të gjitha ndeshje delikate dhe të forta, për vetë pozicionin që kanë skuadrat në renditje, njëherësh edhe në raport me synimet që kanë. Sepse edhe Kukësi i ka rritur ambiciet e mbijetesës, ndaj janë ndeshje të paparashikueshme.
Për zonën “Final 4”, në cilat ndeshje të javës së 30-të fokusohet më shumë vëmendja?
Në këtë javë janë tre ndeshje të cilat mund të sjellin lëvizje edhe në zonën “Final 4”. Ndeshjet e tjera do tu shërbejnë skuadrave vetëm për pikët. Teuta-Laçi për ti shpëtuar rënies, ndërsa Egnatia-Erzeni ndeshja më e lehtë e javës.
Sa ndikim do të kenë rezultatet në takimet e para të gjysmëfinaleve të Kupës së Shqipërisë në javën e 30-të?
Ndeshjet gjysmëfinale të Kupës së Shqipërisë që u luajtën në mesjavë, nuk do kenë ndikim tek sfidat e javës së 30-të në kampionat. Sepse ato nuk janë ndeshjet e kthimit, dhe vetënm në aspektin fizik mund të ketë ndikim te ekipet.
Cilën skuadër në fundin e tabelës së renditjes e shikoni si më të rrezikuar në javën e 30-të?
Përveç Kukësit, i cili ka ngritje në lojë e rezultate, mjafton të kujtojmë fitoren 2-0 në Kupë me Tiranën, mendoj se edhe Erzeni është shumë i rrezikuar. Laçi dhe Teuta janë dy skuadrat e tjera, por durrsakët në javët e fundit kanë ngjitje.
Gjatë kësaj jave, disa skuadra kanë deklaruar rikthime të lojtarëve, është kjo një “luftë” mediatike e tyre?
Përderi sa çdo skuadër jep informacione për mediat, normalisht që edhe kjo formë shfrytëzohet nga trajnerët. Por çdo formacion vendoset edhe në çastet e fundit, sepse nuk duhet të harrojmë se jemi drejt fundit të kampionatit.
Cili është mendimi juaj, do ketë lëvizje në renditje për skuadrat e “Final 4” dhe ato të mbijetesës?
Patjetër që do ketë lëvizje, dhe këtë bëri Dinamo City të mërkurën me fitoren 1-0 ndaj Teutës. Kështu pritet edhe sfida Partizani-Vllaznia, e cila si kryendeshje e kësaj jave, luhet për të tre rezultatet, 1 X 2.
Në raport me renditjen, si i parashikoni 35 ndeshjet e fundit deri në mbylljen e kampionatit?
Duke qënë se ka edhe përplasje direkte mes skuadrave që kanë të njëjta synime në renditje, besoj se nga java në javë mund të kemi edhe ndryshime e lëvizje në tabelë. Nëse Teuta fiton me Laçin, do jetë pretendente për “Final 4”.
NDESHJET PARTIZANI-VLLAZNIA
Në historinë mes tyre, Partizani e Vllaznia janë ndeshur 173 herë. Ndeshja e parë është luajtur në vitin 1946, ndërsa ndeshja e fundit më 28 janar 2024, 1-1. Partizani është shpallur 17 herë kampion; Vllaznia është shpallur 9 herë kampione.
PARTIZANI-VLLAZNIA
SEZONI 2023-2024
Java e 3-të/ 14.09.2023
Vllaznia-Partizani 0-0
Java e 12-të/ 06.11.2023
Partizani-Vllaznia 4-1
Java e 21-të/ 28.01.2024
Vllaznia-Partizani 1-1
ABISSNET SUPERIORE
NDESHJET, JAVA 30
E dielë, 7 prill 2024
Kukësi-Dinamo City 15:00
Teuta-Laçi 18:00
Partizani-Vllaznia 20:00
E hënë, 8 prill 2024
Erzeni-Egnatia 15:00
(Në “Arena e Demave”)
Skënderbeu-Tirana 18:00
RENDITJA
Skuadrat Nd Pikë
1.Egnatia 29 54
2.Vllaznia 29 50
3.Partizani 29 47
4.Dinamo City 29 42
5.Skënderbeu 29 40
6.Tirana 29 39
7.Teuta 29 34
8.Laçi 29 32
9.Erzeni 29 28
10.Kukësi 29 25
KUPA E SHQIPËRISË
Fitoi gjysmëfinalen e parë, Devolli: Kukësi mendon finale.
GJYSMËFINALET
Ndeshjet e para
E mërkurë, 3 prill 2024
Kukësi-Tirana 2-0
Egnatia-Vllaznia 1-0
Ndeshjet e kthimit
E mërkurë, 24 prill 2024
Tirana-Kukësi 15:00
Vllaznia-Egnatia 18:00
NDESHJA FINALE
E martë, 14 maj 2024
Në mesjavë, skuadra e Kukësit tregoi se situata në fundin e renditjes në 29 javët e Abissnet Superiore, nuk e pengoi që të kalonte Tiranën në ndeshjen e parë gjysmëfinale të Kupës së Shqipërisë. Madje edhe me një rezultat të pastër 2-0, e kështu kuksianët duket se janë më afër finales së 14 majit. Këtë e pohoi dje për gazetën “Telegraf” edhe trajneri Bledar Devolli: “Ne luajtëm futboll dhe çunat kanë meritën kryesore. Tani po mendojmë për kampionatin, natyrisht edhe për finale e Kupës”. Ndërsa Egnatia nuk e ka shumë të sigurtë shkuarjen në finale, pasi vetëm me një gol fitoi në takimin e parë ndaj Vllaznisë. Nisur nga loja që zhvilluam rrogozhinasit, madje edhe kur Vllaznia mbeti me 9 lojtarë pas dy kartonëve të kuq, gjithçka mbetet e hapur në takimin e kthimit më 24 prill.
