SUPERIORE/ Mjeshtri i futbollit korçar, Dhimitër Xhambazi, i analizon tetë javët si interesante
Agron KAJA
“Ndeshjet e prapambetura janë zhvendosur për arsye të ndryshme, por kështu e humbasin ritmin e garës. Nga njëherë është edhe si detyrim që të shtrëngohen skuadrat me ngjeshje e shpërndarje të tilla nga java në javë”
Dje, Abissnet Superiore mbylli ndeshjet e javës së tetë, të cilat u shtrinë në tri ditë të zhvillimit të tyre. Me rezultate që edhe nuk priteshin, apo edhe me gola të shumtë, ndoshta kjo ishte pasqyra e kësaj jave, ndërsa specialist i futbollit Dhimitër Xhambazi, një prej më të mëdhenjve në historinë e Skënderbeut, thekson se duhet të luhen sa më shpejt të gjitha ndeshjet e prapambetura. “Nga njëherë është edhe si detyrim që të shtrëngohen skuadrat me ngjeshje e shpërndarje të tilla në zhvillimin e ndeshjeve nga java në javë. Sepse do luhen 42 ndeshje e në momente të caktuara do ketë edhe të tilla shtrëngime. Për ndonjë skuadër edhe mund të mos ndikojë mirë, por mirë është që të mos kemi ndeshje të prapambetura pa u luajtur, kur mendojmë që edhe nga java e parë ka një të tillë. Ato janë zhvendosur për arsye të ndryshme, por unë mendoj se humbasin ritmin e garës, dhe skuadrave nuk i japin atë hijeshi sikundër do të ndodhte nëse ato do të luheshin në datat respektive”, kështu e nisi bisedën për “Telegraf”, Mjeshtri Xhambazi, i cili në analizën e tij për javën e 8-të të Abissnet Superiore, midis të tjerave theksoi se është shpejt të përcaktosh më të mirët dhe më të dobëtit. “Duke qenë se janë luajtur tetë javët e para të këtij kampionati dhe jemi një javë nga mbyllja e fazës së parë, unë mendoj se nuk e përcakton dot plotësisht se cila është skuadër më e mirë, apo më e dobët. Ndaj them se është ende herët për një përfundim teknik”. Por për ish-sulmuesin e Skënderbeut nuk kalon dot bisedën në tjetër moment, pasi ai ka merak humbjen e djeshme të Skënderbeut në Laç. “Skënderbeu është skuadër me lojtarë të rinj, 24.5 vjeç mesatarja e moshës, por edhe në eksperiancën e tyre në Superiore. Mendoj se dje në Laç nuk ishte për të humbur, sepse luajti në përgjithësi mirë, por nuk i shfrytëzoi si duhet rastet e krijuara, edhe pse mund të dilte si e barabartë nga fusha. Ndërsa si javë e 8-të, mendoj se kishte rezultate që edhe nuk priteshin, por skuadrat duhet të jenë të ndërgjegjshme se edhe befasitë janë pjesë e garës”. Duke qënë se këtë javë Kombëtarja luan një ndeshje vendimtare me Çekinë, Xhambazi uron fitoren, njëherësh edhe ka një kritikë. “Unë mendoj se në listën e Kombëtares duhet të kishte lojtarë nga Superiorja, edhe nëse ata nuk do të aktivizoheshin. Gjithsesi, uroj një fitore, që Europiani most ë mbetet ëndër”, ishte kjo biseda e Mjeshtrit të Merituar të Sportit, Dhimitër Xhambazi për gazetën “Telegraf”.
MARATONA E ELBASANIT
“Skampa 2023” bën bashkë 1600 shqiptarë dhe të huaj
Dita e djeshme në qytetin e Elbasanit ishte parashikuar edhe si një ditë pa makina, pasi u zhvillua mini-maratona ndërkombëtare “Skampa 2023”, ku 1600 garues vendas dhe të huaj të grupmoshave të ndryshme, mjaft prej tyre edhe nga më të njohurit në garat kombëtare e ndërkombëtare. Në maratonën që u zhvillua për herë të parë në qytetin e Elbasanit, pjesëmarrësit ishin edhe nga Gjermania, Ukraina, Italia etj. Maratona u nda në 3 grupe garuesish ku grupi i parë pati sfidën e 20 kilometrave, grupi i dytë 10 kilometra dhe grupi i tretë atë të 5 kilometrave. Në përfundim të aktivitetit u ndanë edhe çmimet për fituesit.
“Botërori 2030”, më i gjati në histori!
Nuk kishte ndodhur herë tjetër kështu! FIFA konfirmoi vendet që do të organizojnë Botërorin 2030, ku Uruguaj, Argjentina dhe Paraguaj i janë bashkuar kandidaturës së Spanjës, Portugalisë dhe Marokut. Këto tri skuadrat e fundit do të luajnë ndeshjen e parë në territorin e tyre dhe më pas turneu do të kalojë në Evropë dhe Afrikë. Ky vendim i organit më të lartë të futbollit botëror është i ri, pasi është hera e parë që do të mbahet në tre kontinente. FIFA do ta shpallë zyrtarisht organizimin e Kupës së Botës 2030, në dhjetor 2024.
ABISSNET SUPERIORE
NDESHJET, JAVA 8
Të premten, 6 tetor 2023
Egnatia-Dinamo 3-0
Të shtunën, 7 tetor 2023
Vllaznia-Tirana 0-1
Të dielën, 8 tetor 2023
Laçi-Skënderbeu 2-0
Partizani-Kukësi 4-3
Teuta-Erzeni 0-1
RENDITJA
Skuadrat Nd Pikë
1.Egnatia 8 16
2.Laçi 8 13
3.Tirana 7 13
4.Skënderbeu 8 12
5.Partizani 6 11
6.Erzeni 8 11
7.Vllaznia 8 9
8.Teuta 7 8
9.Dinamo City 8 7
10.Kukësi 8 7
KATEGORIA E PARË
NDESHJET, JAVA 7
Të shtunën, 7 tetor 2023
Vora-Bylis 2-3
Lushnja-Luzi2008 2-1
Apolonia-Tomori 4-1
Besa-Flamurtari 1-2
Të dielën, 8 tetor 2023
Kastrioti-Korabi 1-0
AF Elbasani-Burreli 2-0
RENDITJA
Skuadrat Nd Pikë
1.Bylis 7 19
2.AF Elbasani 7 16
3.Apolonia 7 14
4.Vora 7 12
5.Flamurtari 7 12
6.Tomori 7 9
7.Kastrioti 7 9
8.Korabi 7 8
9.Lushnja 7 7
10.Burreli 7 4
11.Besa 7 4
12.Luzi 2008 7 2
Kategoria e Parë përforcoi ekstremet në renditje
Ndeshjet e javës së shtatë të Kategorisë së Parë u mbyllën dje, ku AF Elbasani fitoi pastër 2-0 me Burrelin, ndërkohë që Kastrioti morri tri pikë ndaj Korabit vetëm me një gol. Në tërësi, në gjashtë ndeshje u shënuan 19 gola, një shifër e lartë kjo, ndërkohë që renditja mbeti e pa ndryshuar në dy ekstremet e saj, Bylisi kryesues dhe Luzi 2008 mbyll tabelën 2 pikë. Ngjitje të dukshme këtë javë bënë AF Elbasani, Apolonia dhe Flamurtari, ndërsa Burreli, Besa dhe Luzi2008 mbeten në fund, ndoshta si paralajmërim për zbritje nga kategoria. Java e 9-të do të luhet më 22 tetor 2023.
