Mirlind Daku tashmë po konfirmohet si një nga sulmuesit më të mirë të kampionatit të futbollit në Rusi. Këtë fundjavë, lojtari shqiptar ka shënuar dy gola duke i dhënë fitoren 2-1 Rubin Kazanit. Fillimisht në minutën e 12-të Daku ktheu në gol një penallti që vetë e fitoi, dhe në minutën e 78-të shënoi golin e fitores për Rubin, me një goditje me hark, jashtë zonës kundërshtare. Kështu me këto rrjeta të tundura, Daku ka shkuar në kuotën e 3 golave, në po aq ndeshje të zhvilluara në këtë fillim të kampionatit. Me këtë formë që ai po tregon, te Zeniti ndoshta do të jenë penduar që nuk i ofruan pagën e kërkuar Dakut, në mënyrë që të siguronin firmën e tij në qershor. Kjo formë e mirë e tij është edhe një lajm i mirë për trajnerin e Kombëtares sonë Silvinjo, në pragun e ndeshjes së 9 shtatorit kundër Letonisë në Tiranë.
