Në maskën e vendimeve autonome, shefat e këtyre shoqërive Ujësjellës-Kanalizime, që nuk do jenë më pas 6 muajsh, po zhvatin sa të munden, madje edhe duke sajuar kontrata financiare false për gjoja blerje pajisjesh, materialesh konsumi, shërbime, udhëtime, nxjerrje automjetesh jashtë përdorimit, pagesa punëtorësh provizorë etj.
Ka dhënë efektin e parë me një skemë vjedhjeje, vendimi i qeverisë i datës 11 maj 2022, për përqendrimin e shoqërive Ujësjellës- Kanalizime të Bashkive, në kompani rajonale me model koncesioni shtetëror, të kontrolluara nga Ministria e Infrastrukturë- Energjisë.
Sipas vendimit, 61 ndërmarrjet Ujësjellës- Kanalizime do shkrihen e do krijohen vetëm 15 të tilla në të gjithë vendin, të cilat nuk do jenë më autonome, me borde që kanë bërë çfarë kanë dashur me financat, por 51% do administrohen nga qeveria e do kontrollohen prej saj.
Shkrirja e tyre, ka krijuar një “front” të ri vjedhjesh nga drejtorët dhe shefat e këshillave Mbikëqyrës të ujësjellësve, të cilët i janë vërsulur llogarive bankare e të ardhurave nga faturat, duke bërë letra false për gjoja investime, shpenzime emergjence e humbje në rrjet.
Kjo batërdi, po bëhet në 46 Ujësjellës- Kanalizime që do shkrihen brenda muajit tetor 2022, të cilat për shkak se janë “Shoqëri anonime”, nuk mund të ndalohen në shpenzimet, që bëjnë, madje as për fondin bazë të pagave, që ua financon shteti.
Burime nga Ministria Ekonomi-Financave, që deri tani është enti financues buxhetor i tyre për pagat e 60% investime, thanë se gjatë 15 ditëve pas daljes së vendimit të qeverisë, në 46 Ujësjellës- Kanalizime të bashkive të vogla, ka filluar boshatisja e llogarive bankare dhe arkave ditore e javore.
Bankat nuk mund t’i ndalojnë dot as me urdhër qeverie, mbasi ato janë shoqëri me veprime financiare, shërbimesh e investimesh direkte dhe emergjente, të cilat komandohen vetëm nga Këshillat Mbikëqyrës përkatës.
Pra, në masën e vendimeve autonome, shefat e këtyre shoqërive Ujësjellës- Kanalizime, që nuk do jenë më pas 3 apo 6 muajsh, po zhvasin sa të munden, madje dhe duke sajuar kontrata financiare false për gjoja blerje pajisjesh, materialesh konsumi, shërbime, udhëtime, nxjerrje automjetesh jashtë përdorimit, pagesa punëtorësh provizorë etj.
Në këto ujësjellës, po veprohet tamam si me vjedhjen e llogarive bankare dhe pasurive të ish-kooperativave bujqësore në vitet 1991- ‘92, kur kryetarët e tyre i vodhën dhe nisën biznesin e u bënë deputetët e parë të PD- PS, ndërsa ish-Presidenti i atëhershëm, shpalli dekretin për zerimin e llogarive e pasurive të tyre dhe amnistinë për kryetarët hajdutë.
Kështu po ndodh dhe tani, madje nuk është çudi, që pas shkrirjes së 46 ujësjellës- kanalizimeve, dhe Edi Rama ashtu si në vitin 1992, t’i amnistojë vjedhjet e llogarive bankare të Ujësjellësve, duke i quajtur “humbje teknike”.
Nëse nuk do veprojë kështu, kryeministri Edi Rama, ministresha Balluku si autoritet epror i Ujësjellës-Kanalizimeve dhe ministresha Ibrahimaj si autoritet financues i tyre, duhet t’i evidentojë vjedhjet e të bëjnë kallëzime në SPAK.
pamfleti
