Qeveria jep me koncension Portin e Vlorës, pas Terminalit të Durrësit
Shqipëria në shitje para zgjedhjeve!
Shqipëria është vënë në shitje disa muaj para zgjedhjeve të përgjithshme të 25 qershorit. Pasuritë publike po jepen me koncesion me ritme të shpejta, duke ngjallur dyshime të mëdha se gjithçka po bëhet për pasurimin e “një dorë njerëzve”. Më herët, ‘Boldnews’, raportoi se Ministrja e Infrastrukturës, Belinda Balluku, dhe Drejtori i Portit të Durrësit, Pirro Vengu, realizuan tenderin me afat 5-vjeçar për shërbimin dhe menaxhimin në terminalin e kontenierëve, me një vlerë rreth 30 milionë dollarë. Fituesi, i cili sipas dokumentave të tenderit nuk do të kryejë asnjë investim, do të përfitojë shumën e jashtëzakonshme të parave, nga të ardhurat publike. Pa u tharë ende “boja” e tenderit të Portit të Durrës, ministrja Balluku ka urdhëruar nisjen e procedurave për një koncesion tjetër në ekonominë detare. Bëhet fjalë për Portin e Vlorës, qytet ku është përqëndruar e gjithë vëmendja qeveritare pas njoftimit të kryeministrit Edi Rama se do të jetë kandidat për deputet në zgjedhjet e përgjithshme të 25 Prillit. Me urdhërin e Ballukut, qeveria shqiptare po përgatitet të japë me koncension 30-vjeçar portin e Vlorës, për një projekt me qëllime turistike, të emërtuar “Marina Vlorë”.
Njoftimi i koncesionit
Sipas dokumenteve, Ministria e Infrastrukturës dhe Energjisë ka vendosur të implementojë projektin për dhënien me konçesion/partneritet publik privat të portit turistik “Marina Vlorë”. Në dokumente thuhet se kohëzgjatja e kontratës koncesionare do të jetë 35 vjet nga hyrja në fuqi. Pra, një zyrtare momentale politike, e cila nuk dihet nëse do të jetë edhe për shumë kohë në atë post, ka vendosur të dorëzojë për një kohë jashtëzakonisht të gjatë një prej pasurive më të rëndësishme publike në duart e kompanive private, të cilat do të synojnë të përfitojnë sa më shumë nga kontrata e majme me qeverinë e “Rilindjes”. Sipas dokumenteve, vendndodhja e parashikuar e objektit është në qender te qytetit të Vlorës dhe konkretisht në portin aktual të këtij qyteti, i cili është nën administrimin e Ministrisë se Infrastrukturës dhe Energjisë. Nisur nga pozicioni mjaft i mirë gjeografik, ky port ndodhet në bregdetin jugor të Shqipërisë, afërsisht 150 km në veri të kufirit tokësor me shtetin e Greqisë dhe konkretisht 157 km larg nga pika kufitare më e madhe me Greqine që është Kakavia rreth 140 km në vijë detare, me Portin e Korfuzit dhe vetëm 90 km nga rajoni i Puglias në Itali.
Gjurma e portit që do jepet me koncesion
Sipas dokumenteve të publikuar bashkë me thirrjen për oferta koncensionare, qyteti i Vlorës është afërsisht 250 km larg nga pika doganore e Morinës, si edhe vetëm 170 km larg nga pika doganore me Republikën e Maqedonisë së Veriut. Në letra thuhet se Porti konsiderohet të bëhet pjesë e Master Planit të Lungomares në Vlorë, e cila do ti marrë një pjesë të konsiderueshme nga sipërfaqja e portit, ndërsa Rruga e Re Trans-Ballkanike ose siç quhet ndryshe “Korridori Kulturor”, pjesa e parë e së cilës ka përfunduar, do të shtohet me një segment të dytë që fillon nga rruga ekzistuese për në port. Gjithashtu, së fundi, nga Qeveria Shqiptare, është promovuar edhe projekti i Parkut Publik i shtrirë në hapësirën këmbësore nga rrethrrotullimi i Skelës deri tek porti, ku do të lidhë bulevardin e ri Ismail Qemali me Lungomaren. Konstatohet se një pjesë e konsiderueshme e këtij parku shtrihet brenda territorit të Portit të Vlorës. BoldNews.al
