Krerët demokratë të degëve në rrethe pohojnë se protesta në kryeqytet do vijojë deri sa të largohet qeveria dhe të krijohet një qeveri teknike. Për këtë garantojnë mbështetje për kreun e përgjithshëm Basha, përmes qytetarëve që çdo ditë do të udhëtojnë drejt Tiranës, për të qenë prezentë në protestat kundër qeverisë.
Qytetaret e Lezhës do të jenë masivisht në mbështetje të protestës së opozitës në Tiranë. Konfirmimi ka ardhur nga kreu i degës së PD-së në këtë rreth, Paulin Marku, sipas të cilit lezhianet diten e marte do të udhëtojnë sërish masivisht drejt Tiranes për të protestuar.
Paulin Marku: Lezha e tregoi dhe me datën 18 shkurt dhe Lezha do ta tregojë edhe ditën e martë në vazhdim. Do jetë pjesë e kësaj proteste deri në largimin e kësaj qeverisje.
Më shumë se 2500 persona ka qene numri i qytetarëve nga Lezha të cilët ju bashkuan një ditë më parë protestes në Tiranë, ndërsa një numër i konsiderueshem e kaluan naten në çadra.
Por thirrjes së opozitës për protestë i janë përgjigjur dhe demokratët e Kukësit. Një ditë pas protestës, kryetari i PD-së lokale, Arif Rexhmati, tha se do vazhdojnë protestat deri në rrëzimin e qeverisë.
Arif Rexhmati: E quajtur me të drejtë shtëpia e lirisë, shtëpia e votës së lirë. Aty do të qëndrojnë shqiptarët vazhdimisht, do të jenë protestuesit vazhdimisht deri në përmbushjen e kërkesës sonë që Shqipëria të shkojë në zgjedhje pa Edi Ramën Kryeministër.
Ora News u interesua për aksionin pasues të demokratëve në të gjithë vendin, dhe shumica e krerëve lokalë pohuan përmes telefonit, se vijojnë të jenë në Tiranë, ku po mbështesin në mënyrë direkte kryetarin e PD-së, Lulzim Basha.