Edmond Spaho, ish-kreu i Grupit parlamnetar të PD-së, ka sjellë dy dëshmi të forta për të provuar me fakte se Bundestagu gjerman ka kërkuar dhe ngulmuar që PD-ja të mos i djegë mandatet dhe nga ana tjetër, kryetari Lulzim Basha, i ka garantuar ligjvënësit gjermanë se nuk do ta ndërmerrte kurrë atë akt.
Edmond Spaho ka marrë shkas nga deklarata bombë e Kryetares së LSI-së, Monika Kryemadhi, e cila nxori hapur se Basha e kishte gënjyer duke i thënë se për djegien e mandateve kishte mbështetjen e Merkelit dhe PPE-së.
Ndaj sot, Edmond Spaho dha këto fakte për të zbuluar dyfytyrësinë dhe lojën e dyfishtë politike që ka luajtur Lulzim Basha në PD:
“Unë nuk kam qenë dëshmitar në komunikimin e zonjës Kryemadhi me zotin Basha. Këto biseda përgjithësisht janë shumë konfidenciale. Ajo që unë mund të them me siguri, është që në maj 2018 kemi vizituar Bundestagun gjerman dhe zoti Basha pati mundësinë të takojë jo vetëm drejtuesit më të rëndësishëm të CDU/CSU në Bundestag, por edhe njerëz shumë të rëndësishëm të kabinetit të zonjës Merkel. Të gjithë na kërkuan të mos djegim mandatet dhe Basha i siguroi që nuk do t’i djegë mandatet.
Në tetor 2018 si drejtues i Grupit Parlamentar të PD dhe N/Kryetar i PD, kam pasur nderin të pres në ambientet e Kuvendit, zonjën Susan Falatko, Drejtoreshë e Europës Qendrore dhe Lindore në DASH. E sigurova në emër të zotit Basha, që atij as i shkon në mendje që të djegë mandatet.
Pjesa tjetër është histori, Basha jo vetëm nuk po merr përgjegjësitë për çfarë ka bërë, por po manipulon opinionin publik.”
