Rreth 300 nxënës të shkollës 9-vjeçare ”Rruhi Allko” në fshatin Katjel të qytetit të Prrenjasit kanë tashmë mundësinë që të studiojnë në kushte optimale, falë edhe mbështetjes së Ministrisë së Arsimit dhe Sportit.
Sekretari i Përgjithshëm i PS-së, Damian Gjiknuri, njëherësh dhe drejtues politik i qarkut Elbasan i shoqëruar dhe nga kreui Bashkisë së Prrenjasit Nuri Belba inspektuan rehabilitimin e kësaj shkolle e cila ka edhe sistemin parashkollor.
“Kjo shkollë natyrshëm, meriton më shumë investime. Bashkia ka bërë gjithçka ka pasur mundësi. Ambienti është shumë i mirë. Klasat janë shumë të pastra! Duket që administrata dhe vetë personeli arsimor di ta mbajë siç duhet këtë shkollë dhe këtu meritoni një përgëzim. Nga ana tjetër ka ardhur momenti që të kemi një investim më serioz në këtë shkollë”.
Gjiknuri siguroi se ky investim do të pasohet me një tjetër investim të rëndësishëm me qëllim sigurimin e mjediseve sa më të mira për fëmijët e kësaj shkolle.
“Kjo shkollë ka qenë prioritet dhe një nga planet tona, por për shkak se investimet kanë shkuar në drejtime të tjera si pasojë e krizave, njëherë pandemia dhe tashmë situata me krizën e çmimeve të energjisë, ka bërë që pushteti qendror të devijojë një pjesë të mirë të investimeve dikur tjetër. Dua të garantoj se do të jetë një nga investimet e para në këtë zonë sepse është një fshat i rëndësishëm. Na keni në krah për çdo gjë”, nënvizoi Gjiknuri.
