Kryeministri Albin Kurti përmes një reagimi të hënën dha të tjera detaje për sulmin terrorist nga grupe të armatosura serbe në veri të vendit. Sipas asaj që tha kryeministri i Kosovës më së fundmi duke iu referuar dokumenteve të konfiskuara e të konfirmuara nga Policia e Kosovës sulmi terrorist kishte qëllim aneksimin e veriut të Kosovës. “Në bazë të dokumentacionit të konfiskuar nga Policia e Kosovës, konfirmohet se sulmi terrorist ishte pjesë e një plani më të madh për të aneksuar veriun e Kosovës, nëpërmjet një sulmi të koordinuar në 37 pozicione të dallueshme. Do të pasonte krijimi i një korridori për në Serbi, për të mundësuar furnizimin me armë dhe me trupa”, tha kryeministri i Kosovës Albin Kurti në një rrjet social të hënën kur ka kaluar mëse një javë nga sulmi terrorist ndaj Policisë së Kosovës, që ndodhi në Banjskë të Zveçanit e ku i vrarë mbeti rreshteri Afrim Bunjaku dhe u plagos zyrtari tjetër policor Alban Rashiti. Policia e Kosovës ka vazhduar me operacionet ku ka konfiskuar arsenal armësh në zonën ku ndodhi sulmi, duke përfshirë këtu: granatahedhës, antiplumb, karikator me fishekë, kapela ushtarake, dorëza, pushkë gjuetie, snjaper, radiolidhje etj. Të gjitha këto sipas Policisë së Kosovës i takonin grupit të armatosur terroristë i cili përbëhej nga më shumë se 30 veta, të cilët pas sulmit u fshehën në Manastirin e Banjskës.
