Frank Shkreli: Dorëheqja si një akt patriotik dhe njerëzor!

61

Nga Frank Shkreli

Ish-Drejtor i VOA-s për Euro- Azinë

Para nja 10-ditësh botova artikullin me titull “Ambasadori amerikan që ka dhënë dorëheqjen për të shpëtuar Shqipërinë”, në kujtim të një miku të madh të shqiptarëve, ish-diplomatit, ish anëtarit të Kongresit dhe ish ambasador i Shteteve të Bashkuara të Amerikës, në Greqi dhe në Mal të Zi, më shumë se një shekull më parë, njëkohësisht edhe mik i Presidentit Woodrow Wilson – Xhorxh Fred Uilliams.

Gjatë një vizite në Shqipëri në vitin 1914, Ambasadori Williams u bë dëshmitar i disa tmerreve se çfarë po bënin të huajt përballë Kombit shqiptar në atë kohë, një fat tragjik për të cilin ai, në rolin e ambasadorit amerikan, kishte njoftuar Washingtonin.  Ndoshta ishte periudha më tragjike për shqiptarët, sipas disa historianëve.  Si dëshmitar i situatës së mjeruar, ku fqinjët e Shqipërisë, të përkrahur nga fuqitë e mëdha europiane të saj kohe, donin veç të kafshonin pjesë të tokës shqiptare nga veriu në jug, nga lindja e deri në perëndim të territorit të Kombit shqiptar.  Si përfundim, në protestë për krimet që kishte parë gjatë një vizite në Shqipëri, ai ka dhënë dorëheqjen nga detyra e ambasadorit amerikan në Greqi dhe në Malin e Zi, me qëllim për të ngritur zërin ndaj asaj “çnjerëzie të vërtetë”, siç e ka quajtur ai gjendjen tepër të rëndë me të cilën përballej në atë kohë Kombi shqiptar, sepse ishte i bindur, moralisht dhe politikisht, se “kështu duhej të veproja”, i ka komunikuar ai Washingtonit pas dorëheqjes së tij për shkak të tmerreve që po bëheshin kundër shqiptarëve, sidomos nga ana e Greqisë, e cila kish shpërgullur dhjetëra mijëra shqiptarë me dhunë dhe kishte bërë masakra të tmerrshme kundër shqiptarëve,  e për të cilat kishte qenë vetë dëshmitar. https://telegraf.al/opinion-2/frank-shkreli-ambasadori-amerikan-që-ka-dhënë-dorëheqjen-për-të-shpëtuar-shqipërinë/

Duket se historia po përsëritet, megjithëse në një nivel tjetër dhe me aktorë të tjerë, natyrisht.  Njëqind vjet më vonë, ende në Ballkan flitet për “shkëmbime territoresh”, “korigjim kufijsh” e ku ta di unë, midis Serbisë dhe Kosovës, gjithmonë në kurriz të interesave shqiptare, por kësaj radhe,  jo nga të huajt, historikisht, mbështetës të interesave anti-shqiptare të fqinjëve, por nga të vetët, nga udhëheqësit e votuar nga votuesit shqiptarë.

Le të kujtojmë se para nja një viti ose më shumë, ideatorët e idesë së “shkëmbimit” ose “ndarjes” të territoreve midis Serbisë dhe Kosovës,  siç i quan ata John Bolton, ish këshilltari i Sigurisë Kombëtare në Shtëpinë e Bardhë,  donin t’ia “shisnin” botës idenë se nuk ishin ata baballarët e këtij  projekti, por ishte Amerika që donte një gjë të tillë, në kuadër të procesit për normalizimin e marrëdhënieve ndërmjet të dy vendeve.

Gjatë një konferencë shtypi në Ukrainë pothuaj një vit më parë, John Bolton ishte shprehur në lidhje me këtë temë duke thenë se, “Politika jonë, politika e Shteteve të Bashkuara është që nëse të dyja palët arrijnë marrëveshje, ne nuk e përjashtojmë rregullimin territorial.”  Kjo nuk është një deklaratë që mund të quhet “ideatore” e shkëmbimit të territoreve midis Kosovës dhe Serbisë. Por, për të justifikuar planet e tyre absurde, ideatorët e vërtetë të kësaj ideje donin t’ia veshnin Boltonit dhe Shteteve të Bashkuara se shkëmbimi ose korigjimi i territoreve midis Kosovës dhe Serbisë, ishte një ide që, jo vetëm mbështetej, por vinte nga Washingtoni.  Për një kohë, kjo gënjeshtër, në të vërtetë, edhe besohej nga disa.

Ky debat u ri ndez ditët e fundit nga deklarata e ish Këshilltarit të Shtëpisë së Bardhë për Sigurinë Kombëtare, John Bolton, i cili u shpreh se ideatorët e vërtetë për “shkëmbimin e territoreve” ishin Hashim Thaçi dhe Aleksandër Vuçiç.  “Nuk ka qenë ideja ime shkëmbimi i tokave, janë udhëheqësit e Kosovës dhe Serbisë që e kanë kërkuar një gjë të tillë”.  Ndërkaq, John Bolton,  nuk e përmendi me emër Kryeministrin e Shqipërisë, Edi Rama, si njërin prej ideatorëve të shkëmbimit të territoreve midis Kosovës dhe Serbisë, por kjo ide ka filluar moti, të pakën katër vjet më pare, në takimin e parë në Nish, midis Vuçiçit dhe Ramës, pa pjesëmarrjen e Kosovës, por ka vazhduar të diskutohet edhe në takimin në Nish, midis këtyre dy udhëhëqësve, dy vjet më parë, siç shkruan edhe aktivistja serbe për të drejtat e njeriut, Sonja Biseko. Kryeministri Rama mund të mohojë se bënte pjesë në këtë project,  megjithëse nuk jam i sigurt nëse mund të bindë njeri me mohimin e tij.  Nuk   besoj se ai mund të mohojë se,  në minimum,  Kryeministri shqiptar i kishte dhënë bekimin e tij këtij projekti për shkëmbimin e territoreve shqiptare midis Kosovës dhe Serbisë.  Për më tepër, nuk është e qartë se çfarë roli ka luajtur në këto bisedime edhe këshilltari i Z. Rama, ish-Kryeministri britanik Tony Blair.

Two days ago, in southern of Albania, Tony Blair has arrived to spend the holidays with Prime Minister of Albania Edi Rama.
He arrived by helicopter in the area called Dhermi and he is resting in government residences. We don’t know who cover the costs, but his visit was held in secret until the media discovered.
***IMAGE SUPPLIED VIA IAN BIRRELL***

Pika e parë e 14 pikave të Woodrow Wilsonit kërkon që, “Pasi të jenë arritur marrëveshjet publike për paqë, në mënyrë transparente, nuk duhet të ketë asnjë marrëveshje private ose ndërkombëtare, por vetëm duhet të vazhdojë gjithmonë diplomacia e sinqertë dhe në syrin e publikut”.  Ideatorët e shekullit XXI për shkëmbim të territoreve shqiptare midis Serbisë dhe Kosovës, janë gjithashtu në kundërshtim edhe me pikën 11 të 14 pikave të Wilsonit për pavarësinë e kombeve, ku thuhet se, “…marrëveshjet midis vendeve të Ballkanit dhe me njëri- tjetrin, duhet të vendosen në bazë të marrëdhënieve miqësore dhe në përputhje me kufijtë e caktuar historikisht, sipas kombësisë dhe identifikimit si dhe në bazë të garancive ndërkombëtare për pavarësi politiko-ekonomike dhe integritet territorial të disa shteteve ballkanike”. Siç dihet, bisedimet midis aktorëve të lartpërmendur, për shkëmbim territoresh midis Serbisë dhe Kosovës, nuk janë mbajtur as në publik, as nuk ishin transparente.  Në të vërtetë, ishin një shkelje flagrante e garancive ndërkombëtare për,të drejtat “ekonomiko-politike dhe për sovranitetin territorial” të Republikës së Kosovës.  Prandaj, ato bisedime të fshehta anti-shqiptare përfunduan kështu si përfunduan – në dështim të plotë dhe në dëm afatgjatë të Republikës së Kosovës në veçanti, dhe të interesave kombëtare të shqiptarëve në përgjithësi, pasojat e të cilave është tepër herët të llogariten. Kur e pa situatën tragjike që po pësonte Kombi shqiptar, ambasadori amerikan George Fred Williams, i shtyrë nga ndjenjat morale dhe njerëzore, vendosi të jipte dorëheqjen nga posti i tij lartë diplomatik, vetëm e vetëm për të ngritur zërin e tij dhe për të njoftuar Amerikën dhe botën për tmerret dhe për tragjeditë që fqinjët po u shkaktonin shqiptarëve.  Por jo vetëm kaq.  Ai jep dorëheqjen duke e justifikuar  ketë akt, si jo vetëm “një detyrë njerëzore”, por edhe “për t’i nxjerrë maskën diplomacisë europiane dhe të zbulojë faqen e saj me gjak të kësaj race heroike, shqiptarëve”.

Prej ideatorëve të vërtetë të shekullit XXI-të dhe mbështetësve të tyre në Prishtinë dhe Tiranë, për shkëmbim ose ndarje territoresh midis Republikës së Kosovës dhe Serbisë,  nuk pritet asgjë më pak se dorëheqja e juaj,  si një akt patriotik dhe njerëzor.  Mjaft me “punët e liga” ndaj këtij Kombi, ta nxjerrim njëherë e mirë, “Shqipërinë dhe shqiptarët nga vuajtjet dhe të mbytur në gjak”, do të ngulte këmbë ambasadori amerikan George Scott Williams, i cili me dorëheqjen e tij në mbrojtje të interesave të shqiptarëve, më shumë se një shekull më parë, na jep një mësim të vyer sot se si duhet të mbrohen të drejtat dhe interesat kombëtare të shqiptarëve. “Kështu duhet të veproni”, do u porosiste ambasadori George Scott Williams, Engjëlli mbrojtës i interesave të shqiptarëve nga grabitësit e huaj, në fillim të shekullit të kaluar. Sot, shqiptarët kanë nevojë për një ëngjëll mbrojtës, jo nga të huajt, por nga të vetët.