1
Nano po e ke vërtet,
Dil or dil në selamet,
Turbulloje sërish lumin,
Që në breg të nxjerrësh llumin!
2
Turbulloje more burrë,
Ndryshe nuk pastrohet kurrë,
Nuk pastrohet me magji,
Kjo kolere e pocaqi!
3
Hiç mos u fikso te Rama,
Se atij i ka rënë flama,
Po ngri popullin në këmbë,
Luaj fort e luaj rëndë!
4
Rrugë e re për t’u bitisur,
S’niset me këpucë të grisur,
S’kalohen ato gremina,
Me këpucët vrima vrima!
5
Dhe ti e kupton patjetër,
Rama është këpucë e vjetër,
Ke përvojë e ke talent,
Krijo tjetër detashment!
6
Krijo kundër maskarenjve,
Ti Partinë e fukarenjve,
Se ata shumica janë,
I dalin lumit matanë!
7
Po e ke me të vërtetë,
Dil mor dil se nuk humbet,
Dil e hidh të parat hapa,
Gjithë vendin e ke nga mbrapa!
8
Gjithë njerëzit i ke me vete,
Shkumëzojnë porsi dete,
Ngrihu se ka vdekur frika,
Gjer në kockë ka vajtur thika!
9
Gjithë mbas teje do thërrasin,
Se nuk kanë me ç’të humbasin,
Që të gjithë mirë e dinë,
Do humbasin varfërinë!
