I përfshirë në kultivimin e kanabisit në Borinage dhe i dënuar në mungesë, një shqiptar është arrestuar në Belgjikë, por betohet se është i pafajshëm. Georges kishte marrë një dënim me 3 vjet burg, të dhënë në mungesë, në lidhje me një rast që përfshin rreth 30 persona, veçanërisht në Borinage.
Më 21 qershor, gjykata penale e Monsit dha një vendim lidhur me të akuzuarit, të përfshirë ose jo në kultivimin e kanabisit të shpërndarë në të gjithë vendin, duke përfshirë Borinage. Edmondi, kreu i këtij grupi është dënuar me 6 vite burg dhe 32 mijë euro gjobë.
Disa të pandehur nuk u paraqitën në gjyqin e tyre, përfshirë Georges, i cili në atë kohë ndodhej në Shqipëri. Ai ishte subjekt i një urdhër-arresti ndërkombëtar. Kur u kthye në Belgjikë, u arrestua në aeroportin e Brukselit. Të mërkurën, ai u paraqit në gjykatë me kundërshtime, duke thënë se ishte dënuar gabimisht. Sigurisht, ai njeh bashkatdhetarë të përfshirë në këtë trafik, pasi ka ndjekur të njëjtat shkolla si ata në Shqipëri, por ai pohon se nuk është i përfshirë në këtë aferë.
Sipas prokurorit publik, ai ka marrë me qira disa automjete të cilat përdoreshin për trafikimin e kanabisit. Një trafikant u arrestua edhe në Holandë teksa drejtonte një makinë të marrë me qira nga Georges. Avokati i tij vëren se ai nuk ka përdorur identitete të rreme për të marrë me qira këto automjete. Kjo do të vërtetonte se ai nuk ishte në dijeni të trafikimit.
Avokati shton se të gjitha vërejtjet në lidhje me të janë negative, përveç një. Ai ka shkuar tek Edmondi në Borinage më 5 shtator 2021, në shoqërinë e një personi tjetër të dënuar për këtë çështje.
Dhe më pas, ai bëri një deklaratë të gjatë në polici dhe, sipas avokatit, hetuesit nuk ishin vërtet të bindur për përfshirjen e tij në trafik. Megjithatë, pyetja është nëse ai me vetëdije ka dhënë ndihmën e tij. Avokati i tij nuk e beson. “Unë jam i pafajshëm,” përsërit Georges, i cili ka një pasaportë greke që e lejon atë të jetojë me familjen e tij në zonën Shengen. Ai shpreson të lirohet nga burgu para Krishtlindjeve.
