Bashkia e Fierit i ka bërë thirrje taksistit që ka transportuar katër anëtarët e familjes nga Fieri që rezultuan pozitiv me koronavirus, që të vetë-izolohet dhe të kërkojë ndihmë mjekësore.
Nëpërmjet një postimi në facebook, Bashkia shkruan se familja është transportuar nga Zogu i zi në Dërmënas në datën 3 mars, rreth orës 7:00.
Po ashtu është bërë edhe njëherë apel për qytetarët që të qëndrojnë brenda dhe të kujdesen maksimalisht për higjienën personale.
Postimi i plotë:
Njoftim
Në vijim të masave të ndërmarra për parandalimin e virusit COVID-19,
i bëjmë thirrje shoferit që ka transportuar familjen e E.S nga Zogu i zi në Dërmënas që të vetë-izolohet dhe të kërkojë menjëherë ndihmën mjekësore, pasi kjo familje është e prekur nga virusi. Transporti i kësaj familjeje është bërë në datën 3 mars, rreth orës 7:00.
Kërkojmë bashkëpunimin e të gjithëve për të kuptuar rëndësinë e kësaj situate dhe respektimin e rregullave bazë:
qëndrimin në shtëpi dhe higjenë maksimale personale për veten dhe të tjerët.
