Ministria e Infrastrukturës dhe Energjisë shpalli ofertat fituese për dy koncesione të tjera të rrugëve dhe konkretisht për Kashar-Pezë-Lekaj dhe Milot-Thumanë. Në njoftimin e MIE bëhet e ditur vetëm se oferta është pranuar pa dhënë specifika mbi atë që kanë ofruar kompanitë, por nëse i referohemi të dhënave të bëra të ditura më herët në dokumentet e tenderit vlera potenciale e investimit është rreth 520 milionë euro pa Tatimin mbi Vlerën e Shtuar. Konkretisht për procedurën “Dhënia me koncesion/partneritet publik privat për projektimin, ndërtimin, operimin, mirëmbajtjen, rehabilitim dhe transferimin e segmentit rrugor Kashar – Pezë – Lekaj” fitues është shpallur një bashkim shoqërish ku bëjnë pjesë Gjoka Konstruksion” sh.a, “Junik” sh.p.k., “Cobial” sh.p.k., “Pepa Group” sh.p.k, “UDHA” sh.p.k., “Geoportal” sh.p.k. dhe “A&E Engineering” sh.p.k.
Kompanitë do të kenë detyrimin e “Projektim, ndërtim, operim, mirëmbajtje, rehabilitim dhe transferim i segmentit rrugor Kashar – Pezë – Lekaj, ku gjurma e kësaj rruge fillon pranë nyjës së Kasharit në seksionin Tiranë – Durrës dhe përfundon me nyjën pranë seksionit rrugor Plepa – Rrogozhinë (pranë zonës së Lekaj). Kohëzgjatja e kontratës së koncesionit/PPP: 35 vjet”. Sipas përllogaritjes vlera e investimit të kësaj rrugë është rreth 475 milionë euro ndërkohë që mbetet për t’u parë cila është vlera finale që është dakordësuar me palët.
Sa i takon kontratës tjetër që ka në objekt “Dhënia me koncesion/partneritet publik privat për projektimin, ndërtimin operimin, mirëmbajtjen, rehabilitimin dhe transferimin e segmentit rrugor Milot – Thumanë” fitues është shpallur Bashkimi i Përkohshëm i Shoqërive “Gener 2” sh.p., “Illyrian Consulting Engineers” sh.p.k. / dhe “I.D.K – Konstruksion” sh.p.k
Kontrata do të ketë në thelb “Projektim, ndërtim, operim, mirëmbajtje, rehabilitim dhe transferim i segmentit rrugor Milot – Thumanë, ku gjurma e kësaj rruge fillon pranë nyjës së Milotit dhe përfundon pranë rrethrrotullimit të Thumanës. Aksi shtrihet në rrugën kombëtare SH1(A1). Kohëzgjatja e kontratës së koncesionit/PPP: 35 vjet”. Vlera fillestare e publikuar e investimit në fazën e prokurimit ishte 44.6 milionë euro.
Sa do paguajnë mjetet
Të dyja rrugët parashikohet të jenë më pagesë dhe të ardhurat e koncesionarit të gjenerohen në këtë formë ndërkohë që edhe shteti do të ofrojë garanci. Në fazën aktuale elementët e saktë të tarifës mbeten objekt i negocimit deri në nënshkrimin e kontratës me palët ku afati për këtë procedurë është 60 ditë. Referuar dokumenteve në skenarin bazë qeveria përllogariste se në rrugën Milot-Thumanë do të kalojnë çdo ditë rreth 25 mijë mjete. Vlera e toll apo pagesës për çdo kilometër në skenarin bazë përllogaritej në rreth 60 cent. Ndërkohë që për aksin tjetër Kashar-Pezë-Lekaj në skenarin bazë pritshmëria është që çdo ditë të kalojnë mesatarisht 37.7 mijë mjete ndërkohë që vlera e tarifës të jetë mesatarisht 3.2 euro. Më herët vitin e shkuar qeveria njoftoi fituesin e koncesionit Lekaj-Konjat-Fier ku vlera e investimit përllogaritet 320 milionë euro dhe skenari potencial për tarifën ishte 2 euro.
