Pakësimi i fuqisë punëtore në bizneset që i shfrytëzojnë punonjësit me orë të gjata, pa ditë pushimi, pa raporte mjekësore e paga sa 10-15% e pagave që jepen në vendet e BE, ka vënë në lëvizje kryeministrin Rama, të bëjë ligj kërkesën e mikut peshkatar Gjergj Luca, për të hequr trajtimin social, si presion për t’i detyruar të punojnë te bizneset shfrytëzuese
Pas ligjit “Fusha” për kullat te Teatri, i anuluar prej presionit të Këshillit të Europës, kryeministri Edi Rama ka nisur inskenimin e një ligji tjetër klientelist të quajtur “Luca”, në favor të mikut peshkatar Gjergj Luca dhe biznesmenëve klientë të tij.Nëse ju kujtohet, 1 vit më parë Gjergj Luca në gjendje “esëll”, publikoi në disa media e në rrjetet sociale, një thirrje drejtuar Edi Ramës si kryeministër, që t’u hiqte ndihmën ekonomike dhe asistencën qytetarëve të Lezhës, Elbasanit, Gramshit, Librazhdit e Prrenjasit.Këtë ide, Gjergj Luca e quajti mundësi punësimi të tyre te fabrikat e tij “Rozafa” në këto qytete, me logjikën se duke u hequr pagesën e papunësisë, do detyroheshin të shkonin në punë nga halli, ose do mbeten pa asnjë të ardhur financiare.Një muaj pas kësaj thirrjeje, provën e parë bëri kryebashkiaku i Elbasanit, Gledian Llatja, bashkë me Lisiena Matoshin, këshilltare e Bashkisë Elbasan dhe administratore e firmës “Rozafa Shpk”, duke hequr 70 familje nga skema e ndihmës ekonomike, me mendimin se do shkonin të kërkonin pune të fabrikat e Gjergj Lucës.
Por nuk shkoi asnjë, sepse e dinin që ishin paga lëmoshë, më të vogla se asistenca sociale e ndihma ekonomike mujore që merr një familje; ishin pa sigurime shoqërore, pa të drejtë raporti mjekësor , por dhe punohej në mjedis kancerogjen prej mbetjeve e erës së rëndë.
Mirëpo në mbështetje të mikut të tij peshkatar, është vënë kryeministri Edi Rama, i cili ka aktivizuar “grupin e gatshëm” të deputetëve kukulla që i përdor për firmosje nismash ligjore.Tre ditë më parë, ata janë urdhëruar që brenda muajit shkurt 2022, të paraqesin në Komisionin për Punën e çështjet Sociale dhe në Komisionin e Ekonomi-Financës, një projekt-draft për ndryshimin e ligjit të ndihmës ekonomike. Ky draft, do hartohet sipas propozimit të Gjergj Lucës, për heqjen e ndihmës ekonomike, gjithë të papunëve të moshës 18-45 vjeç, si mundësi për të krijuar krahë pune skllevërish për fabrikat “Rozafa” dhe në biznese ndërtimi, bujqësi, fasoneri etj.
Me këtë draft ligjor, parashikohet heqje e ndihmës ekonomike për afro 30 mijë persona, nga 52 mijë të kësaj fashe moshore që trajtohen aktualisht, të cilët do kenë vetëm këto tre rrugë:
- Punësim te bizneset e llojit “Rozafa” të dallkaukut Gjergj Luca dhe “Alba Shoes” të mashtruesit Nikolin Lleshi, që japin sa 30%-50% e pagës minimale zyrtare.
- Do detyrohen të punojnë në të zezë më paga normale.
- Do detyrohen të largohen nga Shqipëria, ku do bëjnë të njëjtat punë si në Shqipëri, por me paga 8-10 herë më të larta se pagat që jepen nga bizneset në Shqipëri.
Sipas listës tatimore të pagave, rezulton se firma “Rozafa Shpk”, mbi 40% të punonjësve i paguan si skllevër me nga 3-5 mijë lekë të reja në muaj, ndërsa të tjerët me pagë bruto 30 mijë lekë, sepse ka mburojë paprekshmërie mikun e tij kryeministër./Pamfleti
