Pazaret e bëra për interesa private prej drejtuesve shtetërorë kanë trajtuar e kthyer në copa letrash “defterë bakalli” ligje, vendime e udhëzime që kanë lidhje me probleme deri jetike për shqiptarët dhe me aftin e integrimit në BE. Shumë prej këtyre akteve zyrtare e ligjore, publikohen me bujë si “reforma rilindëse me standarde europiane” e në fakt teorikisht, kështu janë. Por pas demagogjisë mediatike dhe zhvatjes së fondeve e tenderëve në miliona euro, shumica e të cilave përfundojnë në xhepat e OJF-ve të familjarëve e ortakëve të ministrave, deputetëve e politikanëve të lartë, këto vendime jo vetëm nuk zbatohen, por edhe “harrohen” e hidhen në koshin e plehrave.
Ministri mashtron BE, sikur ka bllokuar automjetet që helmojnë mjedisin
Rasti konkret, tipik skandaloz i hedhjes në koshin e plehrave të një akti ligjor që duhej të ishte futur në zbatim dje në datën 1 korrik 2016 është shpërfillja e Ministrit të Transporteve Edmond Haxhinasto, ndaj Udhëzimit Nr. 1, datë 04. 03. 2015, të nxjerr, të firmosur e vulosur prej… Ministrit të Transportit Edmond Haxhinasto, me objekt “Mbi disa ndryshime në Manualin mbi kontrollin teknik të mjeteve”, botuar në “Fletore Zyrtare” Nr. 37, datë 16 Mars 2015, i cili ka lidhje me bllokimin e futjes në territorin e Shqipërisë dhe me nxjerrjen jashtë qarkullimit, të automjeteve ekzistuese ndotëse që janë futur e janë ende në qarkullim. Këtë udhëzim e ka vendosur si detyrim BE-ja e jo se ka dashur ministri pazarxhi Haxhinasto, i cili lëpihet edhe pazare për një celular! Edhe pse ka dalë e është futur prej 15 muajsh, ky udhëzim i ministrit Haxhinasto është “harruar”. Dje më 1 korrik 2016, nëpër rrugët e Shqipërisë, nuk duhej të kishte asnjë automjet më nivel gazrash ndotës që ndalohen prej udhëzimit “Haxhinasto”. Por këto automjete vazhdojnë të qarkullojnë, mbasi ky detyrim ligjor nuk është zbatuar nga vetë ministri Haxhinasto, duke mos bllokuar automjetet helmues, por duke bllokuar zbatimin e udhëzimit!
Por nuk është harruar e nuk është toleruar prej BE, të cilët e kanë diktuar si një nga kushtet për integrimin e Shqipërisë në BE. Më një shkresë zyrtare, BE i ka kërkuar dje ministrit Haxhinasto e për më tepër kryeministrit Edi Rama, që të japin shpjegime se përse nuk është zbatuar ky kusht! Ndërkohë, mësohet se BE ka denoncuar faktin, që ministri Haxhinasto ka guxuar e ka mashtruar BE, duke i dërguar një raport zyrtar, sikur gjoja është bërë plotësisht “pastrimi” i automjeteve ndotëse nga qarkullimi. Ministri Haxhinasto i ka raportuar BE, se në bashkëveprim me shërbimin e kolaudimit “SGS”, me shërbimin e transportit rrugor dhe me policinë e shtetit, ka bllokuar e çuar për skrap gjithë automjetet nuk plotësojnë standardet për t’u lejuar në qarkullim. Në fakt ky udhëzim nuk është zbatuar. Në rrugët dhe qytetet e Shqipërisë, sidomos në qendrat e qyteteve kryesore Tiranë, Durrës, Gjirokastër, Korçë, Berat, Lezhë, Dibër, Burrel, Fier, Elbasan Shkodër, Vlorë e të çdo qyteti tjetër, mjediset publike e madje dhe shtëpitë e banimit mbushen, nxihen dhe helmohen nga shtëllungat e blozës që nxjerrin automjetet “skrap”, të lëna ende në qarkullim për shkak të pazareve të ministrit Haxhinasto me mafien e importit dhe tregut vendas të makinave “rrangallë”, mbështetur e bërë këto pazare të Haxhinastos në bashkëveprim me shërbimin e kolaudimit, këtij koncesioni që ministri nuk pranon ta shfuqizoj si monopol zhvatës e vrarës të shqiptarëve në aksidente prej falsitetit të kontrollit teknik! Sipas udhëzimit në fjalë, dje më 1 korrik 2016 duhej të kishin dalë nga qarkullimi 247 mijë automjete që helmojnë mjedisin shqiptar e madje që shkaktojnë 55% të aksidenteve rrugore prej gjendjes së rrënuar teknike në të cilën janë!
Ministri Haxhinasto, pazar me tregtarët e makinave “rrangallë”
Se për çfarë interesash është bërë, këtë e di më mirë ministri Haxhinasto dhe disa tregtarë importi makinash të vjetra, me të cilat po vazhdojnë të mbushin Shqipërinë, duke u lejuar të importojnë, tregtojnë e certifikojnë si “me standarde” automjete rrangallë të cilët i nxjerrin si “skarco” jo vetëm vendet e BE, por edhe Mali i Zi, Maqedonia, Turqia, madje edhe Bosnja e ndonjë shtet tjetër më i “mbaruar” ekonomikisht dhe më i degraduar administrativisht e ligjërisht se Shqipëria! Është fjala për bllokimin dhe nxjerrjen jashtë qarkullimit rrugor e përdorimit publik, të automjeteve ndotës, të cilët tejkalojnë normat e lejuara të nivelit të gazrave, nivel që përcaktohet me testin e gazrave që bëhet në kontrollin teknik të detyrueshëm të automjeteve. Sipas udhëzimit “Haxhinasto” me Nr. 1, datë 04. 03. 2015, qeveria shqiptare, konkretisht ministria e transporteve, ishte e detyruar edhe prej BE, që në datën 30 qershor 2016 të finalizohej ky detyrim. Pra, dje në datën 1 korrik 2016, nëpër rrugët dhe mjediset e qyteteve të Shqipërisë nuk duhej të futej për qarkullim asnjë automjet që ka nivelin e gazrave, mbi standardin e përcaktuar në udhëzimin “Haxhinasto”. Ky detyrim nuk është plotësuar. Rrugët dhe mjediset publike të qendrave të banuara të Shqipërisë vazhdojnë të helmohen nga gazrat e automjeteve “skrap”.
Skandali/ 1560 automjete të administratës shtetërore duhen bllokuar
Gazeta “Telegraf” ka denoncuar këtë fakt disa herë, por skandali vazhdon. Në qarkullim janë ende të pa bllokuara edhe automjete “skrap”, që janë në inventar – përdorim nga policia, ushtria, KESH, OSHE, Ujësjellësi, shëndetësia, bujqësia, prefekturat, bashkitë, qarqet, doganat, tatimet, garda, arsimi e madje dhe nga kryeministria. Nuk janë makinat që përdoren nga “agallarët” e institucioneve se ata kanë më luksoze se edhe drejtuesit e BE e SHBA dhe se sheikët naftës, por është fjala për makinat “llamarina me rrota” që përdoren nga “qehallarët” e shtetarëve e të administratës. Madje, këto makina, prej vitesh janë edhe të pa siguruara e të pa kolauduara! Skandali është ky: 1560 automjete të administratës shtetërore, janë jashtë standardit dhe sipas Udhëzimit Nr. 1, datë 04. 03. 2015, dje më 1 korrik 2016 duhej të ishin çuar për skrap, sipas Direktivës Mjedisore Evropiane në Transportin Publik “2009/40/BE”. Kujtojmë, që ky udhëzim u prezantua bujshëm, shoqëruar edhe me ultimatumin e Zv/kryeministrit Niko Peleshi, i cili 1 vit më parë, deklaroi se brenda datës 1 korrik 2015, gjithë automjetet në Shqipëri do të kalonin në “filtrin” e evidentimit dhe në procesin e seleksionimit dhe brenda datës 30 qershor 2016, do të nxirreshin jashtë qarkullimit, nëse nuk plotësonin normat e BE për nivelin e gazrave! Por as udhëzimi i Haxhinastos, as ultimatumi i Peleshit dhe as kushti i vendosur prej BE… nuk u zbatuan!
