Gazeta Telegraf/
Një nga
prioritetet e ALUIZNI-t ka qenë dhe është identifikimi i zonave informale,
formalizimi dhe integrimi i tyre në realitetin urban. Përcaktimi dhe miratimi i
kufirit të zonave ndihmon për një qasje objektive të fenomenit të
informalitetit në raport me premisat dhe dinamikat e zhvillimit urban. Në këtë
mënyrë ato jo vetëm kthehen në faktor gjatë procesit të hartimit të dokumenteve
të planifikimit të territorit por edhe iu vinë në ndihmë njësive të qeverisjes
vendore të saktësojnë prioritetet në lidhje me projektet e urbanizimit.
Janë identifikuar dhe miratuar
në Këshillin e
Rregullimit të Territorit
gjatë kësaj periudhe 277 zona
informale me një sipërfaqe të përgjithshme prej 205 hektarësh, të shpërndara në
gjithë territorin e Shqipërisë. Nga një vrojtim i tyre vlerësohet se numri i ndërtimeve
pa leje në këto zona
është rreth 218.000,
me një numër të përafërt prej
300.000 familjesh. Qarqet me numrin më të lartë të ndërtimeve informale e si
rrjedhim me numrin më të madh të zonave të miratuara janë Durrësi, Tirana,
Shkodra, Fieri dhe Elbasani. Urbanizimi
i zonave informale
po vlerësohet gjithnjë
e më shumë
nga ana e Agjencisë krahas legalizimit. ALUIZNI po
luan një rol konkret dhe të drejtpërdrejtë në procesin e hartimit të planeve
vendore në bashkëpunim të ngushtë me Agjencinë Kombëtare të Planifikimit të
Territorit. Parimet kryesore të pjesëmarrjes së Institucionit lidhen me; vënien
në dispozicion të informacionit (treguesve) që disponon, në mënyrë që t’iu vijë
në ndihmë studiove projektuese
hartuese të planeve;
ndërgjegjësimi i aktorëve
kyç në procesin
e planifikimit të territorit, për të përfshirë plotësisht realitetin e
ndërtimeve informale në suazat e planifikimit. Duke lënë pas mentalitetin
negativ mbi informalitetin, pavarësisht natyrës kaotike të tij, e ardhmja e
qyteteve nuk mund ta anashkalojë atë, përkundrazi, duhet të hidhen bazat e
shëndosha për urbanizimin
e drejtpërdrejtë dhe
integrimin e tyre
me përmbylljen e procesit të legalizimit.
