Disa mendime për librin me kujtime të shkruar nga Osman Murati “Një jetë me emocione”
Luan Shahollari
- Osman Murati me këtë libër ka përmbushur një detyrë që duhet ta kryejë çdo intelektual që mendon se veprimtaria e tij shtetërore apo private ka vlerë jo vetëm për rreth të ngushtë familjar apo shoqëror por edhe për një opinion të gjerë publik.
- Ky libër me kujtime është një rrëfim i sinqertë i autorit që prek të gjitha fazat e jetës së tij nga vegjëlia e deri në ditët e sotme,kur edhe pse ka tejkaluar moshën për pension, ende nuk i është zbehur dëshirë për punë, pasi kështu është mësuar ai një jetë të tërë.
- Osman mbron me pasion arritjet e shënuara në vitet 1945-1990 pasi për këto arritje kanë punuar e sakrifikuar dy breza: ai që bëri LANÇ dhe filloi reformat e para si dhe brezi që punoi për ndërtimin e shoqërisë socialiste. Osmani hyn në grupin e dytë dhe punoi me përkushtim e ndërgjegje të lartë në gjitha detyrat ku patën caktuar organet partiake apo shtetërore.
- Osman mund të jetë i pari, apo nga të parët, që një pjesë të Kujtimeve i a ka kushtuar veprimtarisë së tij në fushën e biznesit të pas viteve 1990, duke dëshmuar se është po aq transparent dhe i aftë si dhe para këtij viti në funksione të ulëta apo të larta shtetërore.
- Duke përshkruar vështirësitë e tij në biznes, autori sjell edhe një panoramë të reformave të tregut të lire në Bullgari, pasojave të tyre në mungesën e mallrave të vendit, të cilat ngjajnë si dy pika uji me gjendjen në Shqipëri. Ai sjell edhe tipare e zakone përafërta të jetës shoqërore në të dy vendet.
- Në këto kujtime autori shprehet edhe për personalitete apo figura politike dhe historike bashkëkohore të para dhe pas vitit 1990 duke shfaqur mendimin e tij hapur ,edhe pse mund të bjerë ndesh me mendime të ndryshme të shumë të tjerëve.
- Për aq sa e kam njohur, dëshiroj të ve në dukje një tipar themelor të karakterit të Osman Muratit: Vendosmërinë e tij për t’i çuar gjerat deri në fund,pavarësisht nga vështirësitë që i dalin rrugës.
- Sigurisht Kujtimet janë pronë e autorit dhe nuk diskutohen. Por, po ta kisha lexuar më parë, do të sugjeroja që të shmangte disa përsëritje dhe hollësi të jetës së përditshme në fushën e biznesit dhe atë shoqërore. Po kështu, për argumentim të mendimeve të tij,mund të përdorte më shumë të dhëna statistikore ekonomike apo financiare.
- Më në fund le t’i urojmë sh. Osman shëndet e mbarësi në jetë!
