Banka Evropiane për Rindërtim dhe Zhvillim deklaron se Shqipërisë dhe disa vendeve rajonale do t’u duhet të paktën 200 vite për të kapur mesataren e të ardhurave të vendeve të BE. Shkaqet për vendin tonë janë; mungesa e lirisë së sipërmarrjeve, lidhjet klienteliste të disa kompanive me qeverinë si dështim për të tërhequr investime të huaja dhe PPP-të korruptive
Nëse vazhdojnë të zhvillohen me të njëjtat ritme të ulëta ekonomike, vendet e Ballkanit Perëndimor do t’u duhet të paktën 200 vite për të kapur mesataren e të ardhurave të vendeve të Bashkimit Evropian. Ky është opinioni i drejtoreshës së zyrës rajonale të Bankës Evropiane për Rindërtim dhe Zhvillim (BERZH), Zsuzsanna Hargitai, opinion për të cilin Exit.al vuri re se kishte zënë vend në të gjitha agjencitë e lajmeve serbe.
Drejtoresha e BERZH-it për Ballkanin Perëndimor ka folur për mediat serbe duke analizuar se përse rajoni – Serbia, Bosnje e Hercegovina, Mali i Zi, Kosova, Shqipëria dhe Maqedonia e Veriut – në tërësi po vonon për sa i përket zhvillimit ekonomik. Sipas saj, disa nga arsyet janë se “rregullat dhe procedurat komplekse ndaj biznesit, teksa ndërmarrjet më kryesore zotërohen nga shteti dhe kanë avantazhe të theksuara ndaj kompanive private”. Shkaqë të tjera janë: mungesa e lirisë së sipërmarrjeve, lidhjet klienteliste të disa kompanive me qeveritë, dështimin për të tërhequr investime të huaja dhe dhënia e PPP-ve pa kriter .
Edhe pse thotë se për përafrimin me standardet e vendeve të BE-së do të duhen rreth 2 shekuj, Hargitai thotë gjithsesi se “rajoni ka mundësi që ta shkurtojë këtë kohë zhvillimi pasi ka njerëz të mirë-arsimuar të cilët mund të jenë produktivë po aq sa kolegët e tyre në Evropën Perëndimore”.
Ndryshe nga Shqipëria, Serbia ka mundur të përfitojë më tepër fonde nga BERZH-i. Sipas raportimeve të mediave lokale, kjo bankë do të investojë 500 milionë euro vetëm gjatë këtij viti dhe 70 për qind e këtij fondi do të shkojë për sektorin privat./Exit.al
