VIDEO/ Monika Kryemadhi i parashikon fundin, Edi Ramës: E rrëzoi nga pushteti rinia, por e dënoi me pak vonesë drejtësia!

175
Kryetarja e LSI, Monika Kryemadhi, ka marrë fjalën në Kuvend duke sulmuar kryeministrin “ që për hir të karriges së tij, nuk ka kursyer as njerëzit e tij më të afërt, bashkëpunëtorët dhe deri familjarët e tij.” Teksa Kryemadhi mbante fjalimin, Rama bashkëbisedonte me përkushtim me ministrin Arben Ahmetaj.
Në fund të fjalës së Rama, Kryemadhi bëri dhe një parashikim se cili do të ishte fundi i Ramës si kryeministër:”E rrëzoi nga pushteti rinia por e dënoi me pak vonesë, drejtësia!” theksoi ajo.
Nga fjala e kryetares së LSI:
“Kjo qeveri po i rreh për vdekje qytetarët me taksa. Ujin e pijshëm po e paguajnë ujin e papijshëm si naftë dhe naftën po e paguajnë si danezë. Kjo qeveri heq nga listat 25 mijë familje të varfra dhe nga ana tjetër thotë se ka 250 mijë vende pune.
Rama, ky njeri që erdhi në pushtet me arrogancën e një banditi, nga ata që bredhin rrugëve, erdhi në pushtet me forcën e Malavita-s.
Drejtësia që pas zgjedhjes së Prokurores së përkohshme po shndërrohet në një vegël të Edi Ramës. Ky njeri nuk u ka kthyer përgjigje ende qytetarëve se ku janë drejtuesit e policisë të larguar, se ku është ministri që kanabizoi Shqipërinë? A ka dijeni për pasurinë e tij dhe njerëzve të tij? Po për njerëzit e tij milionerë që nuk justifikojnë dot as makinën e tyre?
Rama duhet të kthejë pak kokën në vathën e tij për pasurinë e pajustifikuara sepse një ditë do të përgjigjet. Unë e njoh mirë dhe frikërat e tij për prangat. Rama e kupton që pas fasadës së tij gjysëm moderne shihen kulisa politike të ngjashme me ato të diktatorëve të egër, që për fat të keq i adhuron ato.
Edi Rama ëndërron çdo natë para se të flejë, në rast se arrin të flejë, që të jetë pjesë e historisë së këtij kombi sepse deliret e tij janë të forta dhe unë e siguroj se do jetë në librat pas 50 vjetësh, ku do të shkruhet se me mënyrën si qeverisi me bandat, largoi shqiptarët nga vendi. Dua ta siguroj zotin kryeministër se në kapitullin e fundit do të shkruhet se e rrëzoi nga pushteti rinia, por e dënoi me pak vonesë, drejtësia.”