Demokratët kanë përzgjedhur një format amerikan për zgjedhjet në Forumin Rinor të Partisë Demokratike. Hapje dhe anëtarësime të reja, përballje platformash, debat alternativash, shpalosje vizionesh.
Kjo është mënyra që do t’i paraprijë votimit nga të rinjtë demokrat. Çdo i ri që dëshiron t’i bashkohet Forumit Rinor të demokratëve do të ketë një muaj kohë. Të gjithë ata që duan të futen në garën për kryetar të FRPD kanë dy javë kohë në dispozicion të paraqitjes së kandidaturës.
Më pas në një format amerikan kandidatët për kryetar të FRPD do të zhvillojnë debate për platformat e tyre në çdo degë të PD-së. Pas shpalljes së platformave kandidatët do t’i përgjigjen pyetjeve të njëri-tjetrit dhe të të rinjve që do ta ndjekin debatin.
Në fund të çdo debati që parashikohet të zhvillohet me 12 raunde sipas qarqeve, të rinjtë anëtar të degëve përkatëse për çdo qark do të votojnë me votë të fshehtë për kryetarin e FRPD-së. Kandidati që merr më shumë vota në të 12 debatet e marra së bashku do të jetë kryetari i ri i FRPD.
