Deputeti
Ben Blushi ka folur sot për decentralizimin e pushtetit vendor duke akuzuar
qeverinë se po bën në fakt vetëm dekoncentrim. Ai tha se megjithëse bashkë me
reformën territoriale duhet të vinte edhe decentralizimi, sot ende nuk është
bërë dhe mësues, infermierë, policë trafiku emërohen ngas ministritë që janë
politike.
Blushi
tha se roli i Prefektit aktualisht është zhbërë me rritjen e bashkive dhe mes 2
institucioneve ka përplasje, duke kujtuar një rast nga e kaluara.
Duke i
kujtuar ‘padashje’ një nga punët që ka bërë, Blushi tha se kur Mimi Kodheli
ishte prefekte dhe Edi Rama kryebashkiak ziheshin për copa letrash dhe ishte ai
që i qetësonte dhe ata sot janë bashkë.
Ai e
quajti Ramën ‘fermer të kënetës së Rilindjes që ujit mendjen e vet me ujin e
kalbur të Saliut’.
“A
duhet që qeveria të decentralizohet apo duhet të dekonctrohet. Ndryshimi mes të
dyjave është i qartë. Decentralizimi është lënia e shumë kompetencave për
pushtetin vendor ndërsa dekoncetrimi është lëshimi për ata që ke emëruar vetë.
Bëmë reformë territoriale por jo decentralizim. Kush i emëron mësuesit?
Ministria. Ministritë bëjnë politika, drejtoritë i zbatojnë, bëjnë tendera e
emërime. I thashë ministrit që policët e trafikut t’ia linte bashkive. Policët
kush i emëron? Ministria.
Ky është thelbi i decentralizimit dhe dekoncentrimit.
Prefekti nuk bën më asnjë punë dhe ndoshta është i panevojshëm. Kam eksperiencë
personale. Sa më të mëdha bëhen bashkitë aq më shumë zhbëhet roli i prefektit.
Bashkitë kanë tendencë të mos e pyesin prefektin. Më kujtohet një histori e
Mimit dhe Edit, që ziheshin për copa letrash. Më duhet të qetësoja
njëherë-njërin e njëherë tjetrin. Tani janë bashkë aty”, tha Blushi.
Ish-deputeti
socialist që pritet së shpejti të zyrtarizojë subjektin e tij tha se aktet që
vijnë në parlament duhet të jenë më serioze pasi ato aktuale nuk kanë ndryshuar
asgjë nga të mëparshmet. Ai akuzoi kryeministrin Rama se mburret me ato që nuk
ka arritur.
“Aktet
që vijën duhet të jenë më serioze. Nëqoftëse ky nuk do ishte thelbi i çdo akti
dhe reforme që vjen në parlament, që merakoset ta lustrojë atë që ka qenë pa e
ndryshuar thelbin e saj. E njëjta gjë ndodhi edhe sot. Doli kryeministri i
Shqipërisë dhe foli gjatë. Sot kuptova që një nga sukseset ka qenë si të
rregullojë raportin mes fermerit dhe grosistit. Mu duk si një fermer i kënetës
së Rilindjes. Të gjithë jemi fermerë të mendjes sonë. Ky fermer i rilindjes kur
fliste për kaq shumë suksese, pa asnjë efekt mu duk si një fermer që ujit
mendjen e vetë me ujin e kalbur të Saliut”, tha Blushi.
Ai theksoi se në bujqësi nuk ka patur asnjë ndryshim pozitive e sipas tij,
shqiptarët harxhojnë 800 milionë euro në vit për të blerë ushqime jashtë
Shqipërisë.
“Sa
sukses ka patur në bujqësi? Ka premtuar naftë për akcizë. Ky mburret për ato që
s’ka bërë. Sot u mburr pse ka bërë naftë pa akcizë. Nuk ka naftë pa akcizë.
Mburret pse nuk uli TVSH e imputeve bujqësore. Do e ulte në 6%, 20% është sot.
Ca ndryshimi ka në bujqësi? Blen më shtrenjtë, shet më pak. 800 mln euro në vit
harxhojmë për të blerë ushqime jashtë Shqipërisë”, tha Blushi.
Lidhur
me ligjin e mbetjeve, Blushi kërkoi që dekreti i presidentit Nishani të shkojë
sa më shpejt në parlament.
“U bë
peripeci kjo çështja e mbetjeve. Nuk e kuptoj pse nuk e sillni dekretin që ta
rrëzojmë ligjin? E dini pse nuk po vjen dekreti se duhet të negociojë PS me LSI
për ta kaluar ligjin. Ai ligj duhet rrëzuar. Silleni ligjin në parlament ta
votojmë.”- u shpreh Blushi.
