Kryetari i Shoqatës Prof. Ago Nezha: Në 25 vjet Shoqata Labëria, ka qenë promotor i veprimtarive patriotike

Sot, ora 11-00, në Muzeun Historik Kombëtar, Shoqata Patriotike Atdhetare “Labëria”, feston 25-vjetorin e krijimit

Kryetari i Shoqatës Prof. Ago Nezha: Në 25 vjet Shoqata Labëria, ka qenë promotor i veprimtarive patriotike

 

Kam privilegjin dhe kënaqësinë që në emër të Shoqatës Kulturore Atdhetare Labëria, “Nderi i Kombit”, të përshëndes Festën tradicionale të Shoqatës çdo fund viti. Puna e Shoqatës sonë përcjell në breza paqe dhe dashuri, por që sot ka një veçanti, pasi në këtë ditë të shënuar, bën bilancin e 25 vjetëve.  Historia shekullore e një kombi, e merr shkëlqimin e tij nga ngjarje madhore, që e bëjnë krenar para vetes dhe të tjerëve. Por ajo që na bën krenar në sytë e botës, është lufta heroike e një populli të vogël e të varfër para perandorive dhe shteteve të mëdha e të fuqishëm. Krahina e Labërisë, ka qenë jo thjeshtë pjesëmarrëse, por lider dhe aktorja kryesore në të gjitha luftërat e Kombit tonë, për liri, pavarësi dhe prosperitet shoqëror. E në këtë kuadër, Drashovica e përfshirë në të gjitha luftërat që janë zhvilluar në Labëri, është një meteor, që ndriçon në kostelacionin e ngjarjeve të pashlyeshme në kujtesën e popullit tonë. Realitetet e heroizmit të luftërave të Labërisë, kundër pushtuesve nazi- fashist, duke hedhur gunën mbi tela me gjemba dhe me heroizëm të pa shoq bënë që ti zënë armikut topat nga gryka, janë veprime që sot ngjajnë si legjenda epike. Drashovica ka qenë djepi i luftërave për liri e pavarësi, ku janë kryqëzuar shumë beteja të përgjakshme me rëndësi historike. Ajo, ka qenë nyje e koordinimit të aksioneve luftarake ndaj një armiku të fuqishëm pakrahasimisht, jo vetëm numerikisht, por edhe nga municionet e armatimi modern që dispononin. Ndërsa luftëtarët tanë, që zbritën nga malet duke braktisur kopetë e bagëtive, lanë të korrat arave, për armë kishin kërrabën dhe parmendën, që i kthyen në pushkë dhe me heroizmin e idealin e tyre, arritën ta  mundin armikun duke i marrë municionet, që i përdorën për të vazhduar luftën fitimtare ndaj pushtuesve. Një shembull që rrallëkush në botë mund ta demonstronte. Në luftërat ndaj pushtuesve, te labët  janë mishëruar cilësitë më përfaqësuese të shqiptarit, si patriotizmi, trimëria, guximi, besnikëria, deri te akti më sublim për atdheun, duke sakrifikuar edhe jetën. Lufta e ’20-ës ndaj Italisë, ishte një epope jo pak e lavdishme. Aty, nga mbarë Labëria dhe  Shqipëria, u tregua një solidaritet dhe heroizëm i pashoq. Në këtë luftë u përfshinë nga gjithë vendi, pa dallime krahinore, klasore, ideore dhe fetare. Shembulli më unikal është pjesëmarrja në këtë luftë e një nga korifenjve të letrave shqipe At Shtjefën Gjeçovi, që ishte ipeshkëv në Elbasan. Prej aty shkoi e luftoi në Vlorë kundër pushtuesve italianë, ku evidentoi disa veti themelore të Labërisë. Ai, i shkruante Kryepeshkopit të Shkodrës se: “Kur të vij në Shkodër, do ju bëj të flisni labçe, se Vlonjati për lirinë e vendit, fal fëmijën, jep pasurinë dhe djeg shtëpinë. Monumentet madhështore që janë ngritur në Labëri, tregojnë se në këtë stacion të heroizmit, labët janë përgjakur në shumë luftëra, si ajo e 1920-ës, Nacional-Çlirimtarja etj, por nuk janë përgjunjur,  janë kërcënuar nga pushtuesit, por nuk janë frikësuar e nënshtruar, edhe pse kanë qenë të varfër, s’kanë qenë kurrë lypsa. E këto cilësi të rralla të genit lab, i kanë manifestuar dukshëm, në të gjitha rrjedhat e historisë drashoviçiotët. Labët i ka bashkuar historikisht lufta ndaj pushtuesit dhe kënga gjatë ceremonive të gëzueshme. Po të dëgjosh vargjet e këngëve polifonike do gjesh në përmbajtjen e tyre historinë e luftërave dhe luftëtarëve që përjetësojnë epope të lavdishme të popullit tonë në shekuj. Në një mënyrë origjinale ajo është një histori e transmetuar në breza, që edhe pse e pa shkruar i ka rezistuar kohës dhe ka ardhur deri në ditët tona nëpërmjet grupeve polifonike të krahinave të ndryshme të Labërisë.  

Box 1

Lindja e Shoqatës Kulturore Atdhetare “Labëria”

Për krijimin e shoqatës “Labëria” nga mezi i vitit 1991 u krijua një Grup Nismëtar. Ndër aktivistët më aktivë ishin intelektualët labë si Agim Shehu, Nimet Balili, Ibrahim Gani, Guro Zeneli, Pandeli Koçi, Bardhosh Gaçe, Ismet Elezi me banim në Tiranë dhe të tjerë me banim në qytete të ndryshme të Trevës së Labërisë. Krahas disa takimeve me labët në Tiranë, nismëtarët bënë të tilla edhe në qytetin e Gjirokastrës dhe të Vlorës me pjesëmarrje nga gjithë treva labe. Përmes debateve të shumta, rezervave të natyrshme e deri diku edhe qëndrimeve të kundërta, u arrit në një mendim të përbashkët për nevojën e themelimit të shoqatës “Labëria.”

Mbi këtë bazë, Grupi Nismëtar përgatiti përfundimisht projekt-programin e statutin e shoqatës dhe i miratoi ato në mbledhjen e vet të datës 25 Tetor 1991. Pas miratimit dokumentet u përcollën për zyrtarizimim pranë Ministrisë së Kulturës, Rinisë dhe Sporteve të asaj kohe. Ministri i kohës, Preç Zogaj, më 12 Dhjetor 1991, nxori urdhrin përkatës me nr. 63 që konfirmonte krijimin e shoqatës “Labëria”. Mbledhja e parë për krijimin e Degës së Tiranës u bë në fillim të muajit Dhjetor 1992. Kryetar i parë i Degës u zgjodh Prof. Dr. Ismet Elezi. Në kryesi u zgjodhën 30 vetë që përfaqësonin të gjitha trevat e Labërisë.

 

Kuvendi i Parë

Për thirrjen e mbajtjen e Kuvendit të Parë të Përgjithshëm të shoqatës “Labëria”, Dega e Tiranës zgjodhi dy veta në përfaqësinë e Kuvendit, Halil Qëndro dhe Xhafer Peçi, ndërsa në përfaqësi u autorizuan të merrnin pjesë dhe pjesëtarë të grupit nismëtar të vitit 1991; Agim Shehu, Nimet Balili, Ibrahim Gani, Guro Zeneli dhe Halo Abazi.Grupi Organizatorët vendosën që Kuvendi të mbahej në Tiranë, në fillim të muajit Qershor. Në mënyrë simbolike u caktua data 5 Qershor, që përkonte me përvjetorin e fillimit të Luftës së Vlorës të vitit 1920.

Më 5 Qershor 1998, u mbajt Kuvendi i Parë i Shoqatës “Labëria”. Hapja e Kuvendit të parë u bë një nga themeluesit e shoqatës “Labëria” Ibrahim Gani dhe raportin e Shoqatës “Labëria” e mbajti Nimet Balili. Kuvendi analizoi punën e bërë dhe hodhi vështrimin përpara, mbështetur mbi gjithçka që bashkon, përcaktoi rrugën që do të ndiqte shoqata në të ardhmen dhe zgjodhi organet e reja drejtuese të shoqatës, me kryetar shkrimtarin e njohur lab Halil Qëndro dhe sekretar të përgjithshëm Xhemil Çeli. Kryerdaktor i gazetës “Labëria” u caktua Pullumb Tare. Kuvendi zgjodhi dhe Kryetarin e nderit të shoqatës ku, u vendos njëzëri Kryetar nderi të zgjidhej Akademik Rexhep Qosja, personalitet i shquar i çështjes kombëtare.

 


    Sot, në Muzeu Historik Kombëtar shoqata atdhetare "Labëria" ora 11.00, zhvillon aktivitetin me rastin e 25 vjetorit të shoqatës. Në aktivitet do të ketë të ftuar personalitete të shquara të fushave të ndryshme dhe si çdo vit do të ndahen certifikata  me titullin "Personalitet i lartë i Labërisë". Ju mirëpresim tek salla Unesco!

https://ssl.gstatic.com/ui/v1/icons/mail/images/cleardot.gif