Ndahet nga jeta shkrimtari, poeti dhe pedagogu i mirënjohur Musa Vyshka, në moshën 81-vjeçare. Lajmin e bënë të ditur familjarët e tij. Vyshka lindi në Elbasan, më 28 qershor të vitit 1942. Jeta e tij profesionale dhe artistike ishte shumë e gjerë. Shkrimtari u diplomua në degën “Gjuhë-Letërsi” në Tiranë, në vitet 1960-1964. Që nga krijimi i Institutit Pedagogjik të Elbasanit Vyshka ishte pedagog i Letërsisë. Ai gjithashtu ka ushtruar profesionin e gazetarit. Në vitet 1981-1991 ishte Kryetar i Degës së Shkrimtarëve të Elbasanit dhe libretist në Teatrin “Skampa”. Më pas më 1992-shin u kthye në Universitetin “Aleksandër Xhuvani” në Elbasan, shef katedre i Letërsisë deri më 2002-shin, aty kur doli në pension. Për më tepër, ai ishte gjithashtu themelues i gazetës “Fjala e lirë”, anëtari Këshilli Bashkiak i Elbasanit më 1992-1996. Musa Vyshka më 2022-shin është nderuar me titullin “Nderi i qarkut të Elbasanit”.
Tek unë
Tek unë rrojnë djalli dhe poeti;
Ditën në paqe, natën n’armiqësi.
Kur djalli shpirtin ma trazon si deti,
poeti prapë e vë në qetësi.
Tek unë rron stuhia me dremitjen,
tallazi me parimet gjithë dritë.
Kur djalli del, ma zhyt me dhimbje dhimbjen,
poeti del e ma mbulon me dritë…
Tek unë rrojnë djalli dhe poeti,
veçse, kur turpi është mjft i rëndë,
djalli mbyll derën, struket, qan i shkreti.
Poeti ngrihet… Hop
E vdes në këmbë.
Pleqëria
Po vjen moj shtrige, po vjen
e s’të largohem dot!
E di ti ku më gjen;
të fshihem…është e kotë!
E di ti ku më gjen
me thinja e më lot…
Po vjen, moj shtrigë, po vjen,
e s’të pranokam dot.