INTERVISTA/ Flet për “Telegraf” Mahir Halili, ish-sulmuesi bardheblu ndalet te fenomeni i bankinave
Largimi i trajnerëve, një plagë gangrenë e Superiores
Si një ish, sot si i keni marrëdhëniet me futbollin e luajtur shqiptar?
Nuk them se jam shkëputur, por nuk merrem drejpërdrejt me futbollin. Punoj në biznesin privat dhe shoh shpesh ndeshje, ku në këtë sezon do të thoja se Superioren dhe Kombëtaren i kam ndjekur thuajse në çdo ndeshje, si çdo shqiptar.
Si i përshkruani në tërësi 59 ndeshjet e luajtura në Abissnet Superiore në 12 javë?
Në tërësinë e këtyre ndeshjeve, surprizë mbetet ‘Egnatia’, e cila ka bërë shumë mirë. Këtë sezon ka krijuar grup të mirë lojtarësh dhe po tregohet se është skuadër e konsoliduar, e po kështu edhe Partizani, që ka treguar se është ekip i fortë.
Partizani mundi Vllazninë 4-1 në javën e 12-të, ishte kjo një fitore që i thotë Egnatias kujdes me vendin e parë?
Nuk besoj se Egnatia do dorëzohet para Partizanit me atë fitore. Edhe ajo ka treguar vlera gjatë këtyre 12 javëve të luajtura dhe e shoh si një ekip të fortë që po përballohet me vështirësi. Partizani do jetë rrotë më rrotë me të në kreun e renditjes.
Në javën e kaluar kishim disa barazime dhe gola në ekstrem, çfarë shprehin këto dukuri nga java në javë?
Kjo tregon se ekipet nuk kanë shumë diferenca mes tyre, por problem është mentaliteti që kanë në lojën e tyre. Skuadrat kanë më shumë besim te vetja dhe gjatë ndeshjeve kërkojnë të kujdesen për çdo rezultat, sipas kundërshtarëve.
Mund të themi se largimet e trajnerëve në disa skuadra po e zbehin ecurinë e garës?
Unë mendoj se largimi i trajnerëve mbetet një plagë e kampionatit tonë. Nuk është shumë e mirë në aspektin teknik të përshtatjes së trajnerit me skuadrën ta largosh nisur nga një rezultat humbës. E shoh si një fenomen që duhet luftuar periodikisht.
Sa kanë ndikuar në rezultate ditët e ngjeshura të kalendarit në këto javë?
Mendoj se kjo ngjeshje në çdo tre-katër ditë, është lodhje për lojtarët. Dhe duke shtuar edhe stërvitjen, e mendoj si një mbilodhje, si për ata ashtu edhe për stafet e tyre teknike e drejtuese. Një ritmikë e ngjeshur e zbeh cilësinë e lojës.
Nga ndeshjet e javës së 13-të, cilën prej tyre e veçoni si një kryendeshje?
Natyrisht që mbetet “Kryendeshja” Egnatia-Partizani. Sepse ndeshet kreu i renditjes, dhe këtu njëra nga këto skuadra do të shkëputet. Partizanin e shoh më favorit, dhe duke qenë se ka edhe një ndeshje të prapambetur me Teutën, kryesimi prej tij mbetet evident.
Në gjithçka të zhvilluar në këto 12 javë, çfarë veçoni si elementët më pozitivë të garës?
Me aq sa unë e kam ndjekur Superioren, mendoj se po tregon që është një kampionat i fortë. Skuadrat tona e kanë treguar edhe në kupat e Europës, ku edhe pse janë eliminuar, kanë luajtur mirë dhe pak disnivel ndaj kundërshtarëve.
EGNATIA – PARTIZANI
Përballjet direkte në Superiore
Ndeshje 9, Egnatia 1 fitore, Partizani 3 fitore,
5 barazime, Golat 10:12
ABISSNET SUPERIORE
NDESHJET, JAVA 13
Të shtunën 11 nëntor 2023
Egnatia-Partizani 13:30
Vllaznia-Laçi 17:00
Skënderbeu-Teuta 17:00
Të dielën, 12 nëntor 2023
Tirana-Kukësi 13:30
Dinamo City-Erzeni 17:00
(Në “Niko Dovana”, Durrës)
RENDITJA
Skuadrat Nd Pikë
1.Egnatia 12 26
2.Partizani 11 26
3.Tirana 12 18
4.Laçi 12 15
5.Kukësi 12 14
8.Skënderbeu 12 14
7.Vllaznia 12 13
8.Erzeni 12 13
9.Dinamo City 12 12
10.Teuta 11 12
KOMBËTARJA – EMOCIONET KUQEZI
Silvinjo shpall listën, ka rikthime dhe Broja jashtë
LISTA E LOJTARËVE QË GRUMBULLOHEN
PORTIERË: Etrit Berisha, Thomas Strakosha, Elhan Kastrati.
MBROJTËS: Elseid Hysaj, Ivan Balliu Kampenj, Berat Gjimshiti, Arlind Ajeti, Ardian Ismajli, Frederik Veseli, Mario Mitaj.
MESFUSHORË: Ylber Ramadani, Kristjan Asllani, Keidi Bare, Klaus Gjasula,
Qazim Laçi, Nedim Bajrami.
SULMUES: Ernest Muçi, Myrto Uzuni, Taulant Seferi, Jasir Asani, Arbnor Muja,
Arbnor Muçolli, Sokol Cikalleshi, Mirlind Daku.
Ditën e djeshme, trajneri i Kombëtares sonë, Silvinjo, shpalli listën e futbollistëve që ka menduar të përballojë dy sfidat e fundit për “Euro 2024”, Grupi E, me Moldavinë më 17 tetor dhe më 20 nëntor në Tiranë me Ishujt Faroe. Interesi fillimisht shkon te emri i Armando Brojës, i cili edhe këtë herë mbetet jashtë liste, për shkak të dëmtimit që ka marrë një muaj më parë, i cili që e ka lënë jashtë edhe me Çelsin në Premierligë. Edhe Enea Mihaj nuk është grumbulluar për këto dy sfida, ndërkohë që në këtë listë me 24 lojtarë ka edhe rikthime. Mbrojtësi Ardian Ismajli ka lënë pas dëmtimin e tij dhe është gati të jetë në fushë, gjithashtu në listë është edhe sulmuesi Arbnor Muçolli që aktivizohet me Goteborgun në Suedi.
ATLETIKË – KROSI BALLKANIK
Në pjesëmarrjen e parë, Luiza Gega synon Medaljen e Artë
Luiza Gega do përfaqësojë Shqipërinë në Krosin Ballkanik të atletikës që do zhvillohet sot më 11 nëntor, në qytetin Pirdop të Bullgarisë. Duke marrë pjesë në këtë garë, kampionia dhe rekordmenia shqiptare nuk do jetë më pjesë në disiplinat e saj, ku është kampione Evropë në 3000 m/p. Sepse kjo disiplinë, garën e zhvillon në terren kodrinor dhe malor, një vrapim në natyrë. Kjo është diçka e re për Luizën, e cila pas triumfeve radhazi si kampione e Europës si individe dhe si ekip, pasi medaljes së artë mesdhetare dhe pas vendit të pestë vjet në Kampionatin Botëror në SHBA, provon këtë herë Krosin Ballkanik. Së bashku me trajnerin e saj Taulant Stërmasi, Luiza për gazetën “Telegraf” ka deklaruar se synon Medalje të Artë.
Historia e pjesëmarrjeve në Krosin Ballkanik
Kampionati Ballkanik i Atletikës është një garë rajonale e atletikës e organizuar dhe mbajtur mes kombeve të Ballkanit. Në Bullgari, në krosin ballkanik, Shqipëria ka fituar medaljen e parë dhe të vetme të Artë, pikërisht në vitin 1966. Skuadra e femrave e përbërë nga atletet Elisabeta Muço, Lumturi Markolaj dhe Adile Dani, nën drejtimin e trajnerit Sokol Morina dolën kampione në garën e zhvilluar në Varnë. Ekipi shqiptar la pas Jugosllavinë që udhëhiqej nga kampionia e Europës, Vera Nikoliç. Ndërsa në vitin 1981, në këtë garë ka marrë pjesë edhe atletja Pavlina Evro, e cila u rendit në vendin e 5-të.
KATEGORIA E PARË/ Në fundjavë luhet një “Kryendeshje”, flet për “Telegraf” Elvis Kotorri
Ndaj Bylisit zgjedh fitoren e AF Elbasanit, jo lojën e bukur
Agron Kaja
Java e 11-të e Kategorisë së Parë është e fundit e fazës së parë. Të shtunën dhe të dielën skuadrat do të luajnë 90 minutat e fundit të kësaj faze, ku kalendari sjell ndeshje të forta dhe interesante për të dy kahjet e renditjes. Por kjo javë ka edhe një “kryendeshje”, pasi përballen dy skuadrat e para: AF Elbasani dhe Bylisi. Ballshiotët kryesojnë me +4 pikë nga AF Elbasani, por për ish-portierin verdheblu Elvis Kotorri, kjo renditje nuk ka shumë rëndësi për të arritur objektivin e tyre. “Kategoria e Parë e këtij sezoni është duke u zhvilluar shumë e fortë, por edhe e ashpër në luftën sportive. Mendoj se të gjitha skuadrat janë në pozicione që i kanë merituar, edhe pse ndonjëra mund të ketë gabuar rrugës duke lënë pikë brenda e jashtë fushës. Ndërsa AF Elbasani ka hyrë në këtë sezon me ambicje për t’u ngjitur në Abissnet Superiore. Janë bërë investime të mëdha dhe besoj se skuadra është në rrugën e duhur, por besoj se do ketë përmirësime në dy fazat e tjera”, kështu e filloi Elvis Kotorri bisedën për gazetën “Telegraf”, ndërkohë që për ndeshjen e fundit të fazës së parë kundër Bylisit, ai nuk mendon tjetër rezultat, veç fitores. “Elbasani është skuadër e ndërtuar për t’u ngjitur në Superiore, dhe në ndeshje me kundërshtarë rivalë si Bylisi, alternativa e vetme mbetet fitorja. Ballshiotët kanë skuadër, që kryeson me meritë në këto 10 javë të luajtura. Do të thoja se është bërë një “stekë e vjetër” në këtë kategori, të cilën mendoj se e njeh mirë. Ndaj besoj se kjo do të jetë një sfidë si e Superiores, ku AF Elbasani i ka të gjitha mundësitë që të dalë me pikë të plota. Ne do hyjmë në fushë vetëm për ta fituar ndeshjen dhe fitorja jonë do ta bëjë edhe më interesante luftën për kreun e renditjes, por edhe vazhdimësinë e garës”. Në 10 javët e luajtura, AF Elbasani ka grumbulluar 22 pikë, 4 më pak se Bylisi kryesues. Me 7 fitore, 1 barazim dhe 2 humbje, skuadra e drejtuar në këtë sezon nga Nevil Dede kërkon që t’i bëjë mbylljen më të mirë fazës së parë të kampionatit. “Në fakt, të gjitha ndeshjet e javës së 11-të do të jenë të luftuara, sepse të gjitha skuadrat kanë nevojë për pikë. Referuar kalendarit duket se skuadrat vëndase do jenë favorite, por nuk i dihet surprizave që mund të ndodhin në ndonjë ndeshje të veçantë. Rëndësi ka që AF Elbasani ta kalojë me fitore sfidën me Bylisin”, ishte kjo biseda me Elvis Kotorrin, ish-portierin e Elbasanit dhe Dinamos në Superiore.
Elbasani është skuadër e ndërtuar për t’u ngjitur në Superiore, dhe në ndeshje me kundërshtarë rivalë si Bylisi, alternativa e vetme mbetet fitorja. Ndaj Bylisi zgjedh fitoren e AF Elbasanit, jo lojën e bukur
NDESHJET, JAVA 11
Të shtunën, 11 nëntor 2023
Lushnja-Korabi 13:30
Apolonia-Vora 13:30
Besa-Kastrioti 13:30
Burreli-Luzi2008 13:30
Flamurtari-Tomori 13:30
Të dielën, 12 nëntor 2023
AF Elbasani-Bylis 17:00
RENDITJA
Skuadrat Nd Pikë
1.Bylis 10 26
2.AF Elbasani 10 22
3.Vora 10 19
4.Apolonia 10 18
5.Flamurtari 10 18
6.Korabi 10 11
7.Lushnja 10 11
8.Kastrioti 10 10
9.Burreli 10 10
10.Tomori 10 10
11.Besa 10 9
12.Luzi 2008 10 2
FSHF, Displina iu bllokon merkatos për borxhet
Tirana, Skënderbeu dhe Dinamo janë bërë objekti i KD në FSHF. Skuadrat kanë borxhe të pashlyera të mbartura dhe merret vendim për bllokimin e merkatos së tyre, për mospërmbushje të detyrimeve ndaj lojtarëve apo zyrtarëve, që kanë fituar gjyqet në Dhomën e Zgjidhjes së Konflikteve. Tirana i detyrohet 25 mijë euro Asjon Dajës, Skënderbeu 27 mijë euro Dejvi Bregut dhe Dinamo 3 mijë euro ish-drejtorit të saj, Arbi Laçi. Kështu, klubet nuk mund të licensohen.
