Shitja e Sadikut për 1.5 milionë euro, Elbasani dhe Turbina fërkojnë duart

194
Një futbollist mund të kthehet në një “minierë ari” nëse klubet shqiptare do të dinë të sillen si profesionistë. E tillë është edhe situata me elbasanasin Armando Sadiku, i cili këtë merkato vere u shit në radhët e Legias së Varshavës për 1.5 milionë euro.
Sipas një rregulloreje të UEFA-s, pas këtij transferimi duhet të përfitojë një përqindje të shumës edhe klubi mëmë, ndonëse shumë klube nuk janë interesuar për këtë gjë. Me një përllogaritje të thjeshtë, i bie që klubi mëmë të përfitojë një shumë të mirë për një klub shqiptar.

SITUATA
Për Armando Sadikun është një histori më vete se kujt i takojnë këto para, klubit të Elbasanit, Turbinës apo Fushëmbretit. Sulmuesi i Kombëtares e ka nisur në Fushëmbret karrierën me moshat, ekip i një lagjeje të Elbasanit dhe më pas përfundoi me moshat në Elbasan dhe në Cërrik.
Madje, edhe debutimin në atë periudhë e bëri pikërisht me cërrikasit, duke qenë pjesë e moshave. Duke qenë një skuadër amatore nuk dihet nëse Fushëmbreti mund të konsiderohet si një ekip që mund t’i përfitojë këto para, apo ka qenë nën juridiksionin e klubit të Elbasanit.

Sipas informacioneve të “Panorama Sport”, kur Sadiku shkoi të luante me moshat e Turbinës, kartoni u lëshua nga klubi i Elbasanit, çka nënkupton se më parë ka qenë i regjistruar në klubin verdheblu, ndonëse nuk qëndroi gjatë aty. Sipas të njëjtave burime, asnjë skuadër nuk ka tentuar ta shfrytëzojë këtë mundësi që u vjen nga “hiçi”.

Nëse do të konsiderohet Turbina si klubi mëmë, cërrikasit që në atë kohë luanin në Kategorinë e Parë, mund të përfitojnë 20 mijë euro, nga 10 mijë për dy sezone që ai ka qenë pjesë e skuadrës. Por, në garë është edhe Elbasani dhe në rast se i takojnë klubit verdheblu, shuma që merr është më e madhe. Mbetet për t’u parë se si do të veprojnë këto dy klube në këtë situatë të ndodhur, duke qenë se mund të mbushin arkat e tyre në këtë periudhë të vështirë financiare që po kalojnë.

KARRIERA
Fillimet e veta si futbollist Armando Sadiku i ka pasur që në moshën 8-vjeçare dhe fillon të stërvitet nga babai i tij, Durimi, në skuadrën e lagjes së tij, Fushëmbreti. Më pas, rreth moshës 14-vjeçare Sadiku bëhet pjesë e skuadrës së moshave të Elbasanin me trajner Besnik Bashaliun, ku merr edhe mësimet e duhura për t’u bërë një futbollist profesionist.

Pas disa problemeve burokratike, Sadiku largohet nga moshat e Elbasanit, por bashkohet sërish me trajnerin Bashaliu, kësaj here si një lojtar i ekipeve zinxhirë të Turbinës. Më pas nis karriera e tij tek ekipi i parë cërrikas, ende pa i mbushur 17 vjeç. Kështu nis karriera e tij në futbollin e të rriturve, ku pas një viti e gjysmë kalon në radhët e Gramozit në Superiore, rreth moshës 18-vjeçare.

Pas një sezoni në Ersekë, kalon në radhët e Elbasanit deri në dhjetor dhe më pas nis shkëlqimi i tij jashtë vendit. Sadiku është bërë së fundmi një lojtar shumë i rëndësishëm për Kombëtaren shqiptare. Ai shkëlqeu në Europian ku shënoi golin e vetëm dhe të fitores ndaj Rumanisë. Së fundmi, realizoi dy golat e parë në fitoren 3-0 ndaj Izraelit në transfertë.