Sezoni i parë i Marash Kumbullës me Romën ka qenë brenda pritshmërive. Me 27 paraqitje në total dhe dy gola të realizuar mes kampionatit, Kupës së Italisë dhe Europa League, mbrojtësi i kombëtares shqiptare ka marrë vlerësimet e tifozëve verdhekuqë.
Në ndeshjet e fundit Kumbulla nuk është aktivizuar rregullisht nga trajneri Fonseca ndërsa shpreson që sezonin e ardhshëm me Jose Mourinhon në stol të marrë më shumë minuta.
Megjithatë për një mbrojtës që ka pak muaj që ka mbushur 21-vjeç dhe që luan vetëm sezonin e tij të dytë në Serie A, statistikat janë pozitive. Në një bashkëbisedim me tifozët e Romës në rrjetet sociale, Kumbulla ka treguar disa detaje interesante të karrierës së tij të deritanishme.
“Çfarë mendova në momentin e parë që Roma më bëri ofertë? Wow. Momenti që më gëzon më shumë dhe bën që zemra të rrahë fort është kur futem në një stadium plot me tifozët. A kam pasur frikë ndonjëherë? Po, ka ndodhur dy vite më parë kur u dëmtova.
Ndërsa momenti më i vështirë i karrierës ishte kur u infektova me COVID-19. Ndeshja më emocionuese? Ndeshja me Milanin, kur shënova gol dhe dolëm 3-3″, u shpreh Marash Kumbulla për të cilin Roma gjatë kësaj vere duhet të derdhë në arkat e Veronas edhe 24 milionë euro të tjera pas atyre 3 milionë që pagoi për huazimin 1-vjeçar.
