Pas barazimit 0-0 kundër Irlandës së Veriut në raundin e fundit të kualifikuese të Kupës së Botës, Italia është një nga 12 kombëtaret evropiane që do të luftojë për një nga tre vendet e mbetura për në Katar. Azurrëve u duhet të luajnë një gjysmëfinale dhe një finale marsin e ardhshëm dhe për të arritur synimin atyre u duhet të punojnë shumë si në aspektin fizik dhe atë taktik.
E pikërisht për këtë ka menduar Seria A, e cila mund t’i japë dorë kombëtares së saj.
Kështu, siç zbulohet nga “Gazzetta dello Sport”, pritet të miratohet një propozim i cili synon shtyrjen e ndeshjeve të javës së 30-të (fundjavë 19 dhe 20 mars). Kjo do t’i mundësonte Roberto Mancinit të kishte grupin sa më shpejt që të jetë e mundur në mënyrë që të përgatitet për ndeshjet që do të zhvillohen midis 24 dhe 29 marsit 2022.
Pas mungesës në Kupën e Botës në vitin 2018, Italia nuk dëshiron të rijetojë një tjetër traumë të tillë dhe për këtë arsye nuk dëshiron të kapet e papërgatitur. Në listën e fundit të Roberto Mancinit, vetëm Gianluigi Donnarumma (PSG), Emerson Palmieri (Lyon) dhe Jorginho (Chelsea) luanin jashtë Italisë, kështu që kjo masë do të kishte kuptim.
