PARASHIKIM/ Këtë javë, futbolli në Shqipëri vazhdon rrugëtimin e fundsezonit 2023-2024
Agron Kaja
Pse mos themi se, tashmë pas ndeshjeve të Kombëtares, kjo është java e futbollit tonë Superior dhe të Kategorisë së Parë. Madje ajo do nisë që të enjten me ndeshjet e javës së 26-të të Kategorisë së Parë, ndërsa të premten dhe të shtunën e ka radhën java e 28-të e Abissnet Superiore. Dhe pikërisht kjo kategori elitare e futbollit shqiptar që ka nisur fazën e katërt të këtij sezoni, në kalendar ka përballje të forta, delikate dhe interesante. Duke e quajtur këtë një “sinfoni” të futbollit tonë superior, ku do të “vallëzojnë” të dhjetë skuadrat, çiftet duken interesantë. Referuar edhe kuotimit që i bëjnë kompanitë e basteve, duket se do kemi një javë ku dallimet mes skuadrave në ballafaqimet mes tyre janë shumë të vogla. Gjithsesi, e shpërndarë në dy ditë, kjo javë do të nisë pikërisht me Egnatian kryesuese, ndaj Kukësit të fundit në tabelë, ndërsa do të mbyllet me një sfidë për “Final 4”, Dinamo-Skënderbeu.
Ja atmosfera që përcjellin çiftet, do na rrëmbejnë emocionet në këtë javë të 28-të:
1.EGNATIA-KUKËSI
Të premten 29 mars 2024/ 15:00
Ekstremet e renditjes për tri pikët e radhës
1=40% X=30% 2=30%
Rrogozhinasit kryesues të Abissnet Superiore, të premten kanë mundësinë që të rikthehen tek fitoret e munguara. Ndeshen me Kukësin që mbyll tabelën e renditjes me 25 pikë, por skuadra kuksiane në tre ndeshjet e fundit ka grumbulluar 7 pikë, dhe mbetet skuadra më në formë në nisje të fazës së katërt. Me 51 pikë, Egnatia mban kreun e Abissnet Superiores në 28 javë të luajtura dhe kompanitë e basteve e kanë kuotuar më shumë fitoren e tyre. Por referuar koefiçientëve, barazimi dhe fitorja e Kukësit kapin 60% të mundësive.
2.VLLAZNIA-ERZENI
Të premten 29 mars 2024/ 19:00
Për shkodranët, ndeshja për kreun
1=70% X=20% 2=10%
Skuadra shkodrane Vllaznia, është duke ecur me hap kryesuesi në Abissnet Superiore, dhe në 28 javë ka grumbulluar 49 pikë, duke u renditur në vendin e dytë. Përballja të premten me Erzenin do jetë një konfirmim për kreun, pas Humbjes 0-2 në Kukës javën e kaluar. Trajneri Qatip Osmani nuk tundohet nga dy mungesat e titullarëve, ndërkohë që Deliallisi i Erzenit ka ende shpresë mbijetese dhe është duke e përgatitur skuadrën për sukses. Ndërsa bastet nuk i lënë shumë hapësirë shijakasve për tri pikë, madje edhe barazimi duket larg me 20%.
3.TIRANA-TEUTA
Të premten 29 mars 2024/ 19:00
Bardheblutë e “djemtë e detit” si të barabartë
1=45% X=20% 2=35%
Kjo është si një “klasike”, pasi luajnë dy skuadra që në mesin e renditjes kanë synime të kundërta. Bardheblutë kërkojnë ngjitje në tabelë për të hyrë në zonën “Final 4”, ndërkohë që “Djemtë e detit” kërkojnë t’i largohen vendeve në fundin e tabelës së renditjes. Trajneri Erbim Fagu e ka të plotë formacionin titular dhe ka kërkuar kujdes në menaxhimin e lojës kundër durrsakëve. Nga ana e tyre, futbollistët durrsakë kanë deklaruar se Teuta është gati që t’ia dalë me Tiranën. Bastet nuk janë shumë favoritë për Teutën, Tirana shikohet fituese me 45%.
4.LAÇI-PARTIZANI
Të shtunën 30 mars 2024/ 15:00
Ndeshen dy ekstreme, dy alternativa
1=30% X=40% 2=30%
Kjo është ndeshja e parë e ditës së shtunë për javën e 29-të, dhe Laçi është përballë një skuadre së cilës në fushën e vet i ka marrë maksimumin. Partizani është formacioni më i shtrenjtë i Abissnet Superiore me një vlerë totale 6.45 milion euro, ndërkohë që Laçi mbetet në shifra financiare të përgjysmuara me të kuqtë. Një transfertë për rikonfirmim për Partizanin, ndërsa për Laçin ndeshja që tri pikët e bëjnë më të largët mbijetesën në Superiore. Ndërkohë, kuotat e basteve më shumë favorizojnë barazimin e kësaj sfide, fitoret janë në kuota të barabarta për të dyja skuadrat.
5.DINAMO CITY-SKËNDERBEU
Të shtunën 30 mars 2024 / 18:00
Fitorja dinamovite, detyrim për “Final 4”
1=40% X=30% 2=30%
Dinamovitët duken të favorizuar në përballjen e ditës së shtunë me Skënderbeun. Jo vetëm se 4 pikë diferencë i ndajnë në renditje, por edhe për faktin se dinamovitët luajnë mesjavën e ardhshme ndeshjen e prapambetur kundër Teutës. Ndaj 6 pikë e futin Dinamon në grupin e skuadrave që do luajnë në “Final 4”, ndërsa Skënderbeu shkon i qetë në këtë transfertë. Edhe parashikimet në kompanitë e basteve e vendosin Dinamo City-n si favorite me kuota mbi 40%, ndërsa fitoren e Skënderbeut dhe barazimin e kuotojnë në shifra të njëjta, 30%.
ABISSNET SUPERIORE
NDESHJET, JAVA 29
E premte, 29 mars 2024
Egnatia-Kukësi 15:00
Vllaznia-Erzeni 19:00
Tirana-Teuta 19:00
E shtunë, 30 mars 2024
Laçi-Partizani 15:00
Dinamo C.-Skënderbeu 18:00
RENDITJA
Skuadrat Nd Pikë
1.Egnatia 28 51
2.Vllaznia 28 49
3.Partizani 28 46
4.Skënderbeu 28 40
5.Tirana 28 39
6.Dinamo City 27 36
7.Laçi 28 31
8.Teuta 27 31
9.Erzeni 28 27
10.Kukësi 28 25
KATEGORIA E PARË
NDESHJET, JAVA 26
E mërkurë, 27 mars 2024
Korabi-Flamurtari 14:00
Kastrioti-AF Elbasani 14:00
Burreli-Bylis 14:00
Besa-Bylis 14:00
Apolonia-Tomori 14:00
E enjte, 28 mars 2024
Lushnja-Vora 14:00
RENDITJA
Skuadrat Nd Pikë
1.AF Elbasani 25 59
2.Bylis 25 58
3.Flamurtari 25 46
4.Vora 25 45
5.Apolonia 25 36
6.Korabi 25 36
7.Lushnja 25 28
8.Burreli 25 28
9.Kastrioti 25 26
10.Luzi 2008 25 21
11.Besa 25 19
12.Tomori 25 14
Pas “FINAL 4”, ja si shkojnë skuadrat në Evropë
FSHF-ja ka përcaktuar se si do të jetë pjesëmarrja e klubeve tona në Kupat e Europës, ku gjithçka do të varet nga “Final 4”. Në bazë të nenit 17, pjesëmarrja e ekipeve në kompeticionet Liga e Kampioneve dhe të Konferencë Ligë, do të bëhet: Ekipi fitues i ‘Final 4’ merr pjesë në turin e parë të Ligës së Kampionëve, ekipet e renditura në vendin e dytë dhe të tretë marrin pjesë në turin e parë të UEFA Konferencë Ligë. Ndërsa ekipi fitues i Kupës së Shqipërisë merr pjesë në turin e parë të UEFA Konferencë Ligë. Por, nëse ekipi fitues i Kupës është i renditur në zonën ‘Final 4’, vendin e tij do ta zërë ekipi i renditur më mirë.