Xhelal Mziu, deputeti i Partisë Demokratike, ka realizuar disa takime të rëndësishme në qytetet dhe fshatrat e Shqipërisë, ku ka shprehur angazhimin maksimal për zgjedhjet e 11 majit 2025. Në takimet e tij, ai ka diskutuar me qytetarët për shqetësimet që kanë dhe mundësitë për përmirësimin e kushteve të jetesës, duke theksuar rëndësinë e zërit të qytetarëve në këtë proces.
Në qytetin e Peshkopisë, ai theksoi mbështetjen e qytetarëve ndaj Partisë Demokratike dhe angazhimin e strukturave të PD-së për një ndryshim të madh në vend. Mziu i bëri thirrje qytetarëve për të kontribuar në ndryshimin e politikës dhe në përmbysjen e qeverisë së rilindjes, e cila është në një pikë kulmore të krizës, për shkak të skandaleve, korrupsionit, vjedhjeve, monopoleve dhe varfërisë që ka sjellë.
Ai gjithashtu theksoi se, struktura efiçiente e PD, platforma e saj dhe mbështetja amerikane janë mjaftueshëm për të triumfuar në zgjedhjet e 11 majit 2025 dhe për të sjellë një ndryshim të vërtetë. Mziu foli gjithashtu për luftën kundër narkoshtetit dhe oligarkisë kriminale, duke siguruar qytetarët se PD është e angazhuar për të rikthyer Shqipërinë në standardet evropiane. Takimet e tij në fshatra si Grevë në njësinë administrative Melan dhe në Arras, kanë theksuar gjithashtu angazhimin e fortë të strukturave dhe qytetarëve të këtyre zonave për ndryshim.
